ក្រសួងព័ត៌មានត្រៀមដាក់សេចក្ដីព្រាងច្បាប់ស្ដីពីសិទ្ធិទទួលបានព័ត៌មានអោយអ្នកជំនាញពិភាក្សា
ក្រសួងព័ត៌មាន នឹងបើកកិច្ចប្រជុំមួយ នៅថ្ងៃទី៨ខែធ្នូខាងមុខនេះ ដើម្បីពិភាក្សាលើដំណើរការតាក់តែង សេចក្ដីព្រាងច្បាប់ ស្ដីពី សិទ្ធិទទួលបានព័ត៌មាន។ កិច្ចពិភាក្សានឹងធ្វើឡើងនៅទីស្តីការក្រសួងព័ត៌មាន ដោយមានអ្នកជំនាញមកពីអង្គការសង្គមស៊ីវិល, អង្គការ UNESCOនិងភាគីពាក់ព័ន្ធជាច្រើនទៀតចូលរួមពិភាក្សា។
ចុះផ្សាយនៅថ្ងៃ៖
ស្តាប់ - ០២:០២
សេចក្ដីព្រាងច្បាប់ដ៏ចម្រូងចម្រាស ស្ដីពី សិទ្ធិទទួលបានព័ត៌មាន កំពុងត្រូវបានក្រសួងព័ត៌មានធ្វើការសិក្សាស្រាវជ្រាវពីបណ្ដាប្រទេសមួយចំនួន និង សហការជាមួយក្រសួងពាក់ព័ន្ធ ដើម្បីដាក់ជូនកិច្ចប្រជុំក្រុមការងារបច្ចេកទេសពិភាក្សា នៅថ្ងៃទី៨ខែធ្នូខាងមុខនេះ។ កិច្ចពិភាក្សាដែលមានការចូលរួមពីអ្នកជំនាញមកពីអង្គការ UNESCO, ក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច និងពីដៃគូអង្គការសង្គមស៊ីវិលជាច្រើនទៀត រួមទាំងក្លឹបអ្នកកាសែតកម្ពុជា និង មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ CCIMផងដែរ។ ជាកិច្ចពិភាក្សា ដែលបានធ្វើឡើងជាបន្តបន្ទាប់ ដើម្បីប្រមូលមតិយោបល់របស់អ្នកជំនាញ ហើយនៅក្នុងវេទិការនោះដែរ អ្នកជំនាញមកពីអង្គការ UNESCO នឹងធ្វើបទបង្ហាញមួយ ស្តីពី នីតិវិធី និងវិធីសាស្ត្រអនុវត្តការងារក្នុងការតាក់តែងសេចក្តីព្រាងច្បាប់នេះ។ មុននឹងសេចក្តីព្រាងច្បាប់នេះ ត្រូវបានតាក់តែងឡើង ក្រសួងព័ត៌មាននិងអង្គការ UNESCO ក៏មានគំរោងរៀបចំវេទិកាសាធារណៈនៅតាមបណ្តាខេត្តមួយចំនួនផងដែរ ដើម្បីស្ទង់មតិយោបល់របស់ប្រជាពលរដ្ឋ។ នេះបើតាមការបញ្ជាក់ពីលោក អ៊ុក គឹមសេង ទីប្រឹក្សាក្រសួងព័ត៌មាន។
សូមបញ្ជាក់ថា ក្រសួងព័ត៌មានបានរៀបចំសេចក្ដីព្រាងច្បាប់ ស្ដីពីសិទ្ធិទទួលបានព័ត៌មាននេះ តាំងពីខែកុម្ភៈ ឆ្នាំ២០១៤ រហូតមកដល់ពេលនេះ បន្ទាប់ពីរាជរដ្ឋាភិបាលបានប្រគល់ភារកិច្ចជាអ្នករៀបចំផែនការសកម្មភាព កសាងច្បាប់ ដោយបានសិក្សាស្រាវជ្រាវទៅលើច្បាប់មកពីបណ្ដាប្រទេស ចំនួន១០ និងបណ្ដាច្បាប់នានាក្នុងប្រទេស ក៏ដូចជាសេចក្ដីព្រាងច្បាប់ចាស់ ដែលតាក់តែងឡើងដោយ ក្រសួងទំនាក់ទំនងជាមួយរដ្ឋសភា ព្រឹទ្ធសភា និង អធិការកិច្ច កាលពីឆ្នាំ២០០៧ មកពិនិត្យនិងសិក្សា, ហើយកិច្ចការទាំងនេះ ក៏ត្រូវបានអនុគណៈកម្មការរៀបចំរបស់ក្រសួងព័ត៌មាន បានធ្វើរួចរាល់អស់ហើយដែរ។
បើតាមលោក អ៊ុក គឹមសេង សេចក្តីព្រាងច្បាប់ស្តីពីសិទ្ធិទទួលបានព័ត៌មាននេះ នឹងផ្តល់ប្រយោជន៍ច្រើនដល់ប្រជាពលរដ្ឋក្នុងការទទួលបានព័ត៌មាន ខណៈដែលសង្គមស៊ីវិលមួយចំនួនបានរិះគន់ពីតម្លាភាពក្នុងការលាតត្រដាងជាសាធារណៈលើសេចក្តីព្រាងច្បាប់នេះ។បើតាមលោក អ៊ុក គឹមសេង គេត្រូវការពេលវេលាជាង៣ឆ្នាំ ដើម្បីតាក់តែងលើសេចក្តីព្រាងច្បាប់នេះ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ