ទស្សនៈកិច្ចរបស់អនុប្រធានាធិបតីឥណ្ឌាជាការចាប់ផ្តើមដំណើរឆ្ពោះទៅទិសខាងកើត?
ចុះផ្សាយនៅថ្ងៃ៖
ស្តាប់ - ០៤:៣៥
តាមរយៈទស្សនៈកិច្ចរបស់អនុប្រធានាធិបតីឥណ្ឌារយៈពេល៣ថ្ងៃនៅកម្ពុជា ក្រៅពីរិតចំណងទ្វេភាគីបន្ថែមទៀត ត្រូវគេមើលឃើញថាអាចជាយុទ្ធនាការស្វែងរកសម្លេងគាំទ្រពីបណ្តាប្រទេសនៅទិសខាងកើតរបស់ខ្លួន ខណៈដែលឥណ្ឌាធា្លប់មានប្រវត្តិទំនាក់ទំនងជិតស្និតយូរអង្វែងជាមួយកម្ពុជា១ដែរ តែមានភាពយឺតយ៉ាវជាងចិន។ ជាមួយគ្នានេះកម្ពុជាក៏មិនអល់ឯកក្នុងការបង្កើនភាពស្អិតរមួតជាមួយឥណ្ឌាដែរ ដោយកម្ពុជាមាននយោបាយបើកចំហរនិងមិនប្រកាន់ពណ៌សម្បុរ។
ឥណ្ឌានិងកម្ពុជាធ្លាប់មានប្រវត្តិទំនាក់ទំនងជាមួយគ្នាតាំងពីបុរាណកាលមក ពោលគឺចាប់តាំងពីជាងពីរពាន់ឆ្នាំមកហើយ តាមរយៈវប្បធម៌ អរិយធម៌ ប្រពៃណី សាសនា។ មិនថាតែទំនាក់ទំនងបែប ប្រពៃណី ការទូតរវាងគ្នានៅសម័យបុរាណទេ ជាបន្តបន្ទាប់ឥណ្ឌានិងកម្ពុជាតែងមានទំនាក់ទំនងគ្នា គ្រប់ជំនាន់លើកលែងតែដំណាក់កាលដែល ប្រទេសកម្ពុជាស្ថិតនៅក្នុង ភ្លើងសង្គ្រាម។
កាលពីថ្ងៃអង្គារអនុប្រធានាធិបតីឥណ្ឌា លោក ម៉ូហាម៉ាត់ ហាមីឌ អានសារី បានចាប់ផ្តើមបំពេញទស្សនកិច្ចជាផ្លូវរដ្ឋរបស់លោកនៅកម្ពុជាសម្រាប់រយៈពេល៣ថ្ងៃគឺពីថ្ងៃទី១៥ដល់ថ្ងៃទី១៧កញ្ញា។ លោកអនុប្រធានាធិបតី ដែលមានការស្វាគមន៍យ៉ាងគគ្រឹកគគ្រេងគួរសមដែរនោះ បានជួបជាមួយប្រមុខរដ្ឋាភិបាលកម្ពុជា និងថ្នាក់ដឹកនាំរដ្ឋាភិបាលឯទៀត។
ដោយប្រើភាសាការទូត ជំនួបជាមួយថ្នាក់ដឹកនាំនិងមន្ត្រីជាន់ខ្ពស់កម្ពុជា គឺជាការសម្តែងការគួរសម និងរឹតចំណងមេត្រីភាព ទំនាក់ទំនងទ្វេរភាគីដែលមានស្រាប់ឲ្យកាន់តែប្រសើរបន្ថែមទៀត។ ជាការពិតទស្សនកិច្ចរបស់មេដឹកនាំលំដាប់ទី២របស់ប្រទេសដែលមានប្រជាជនច្រើនទី២លើពិភពលោក បន្ទាប់ពីចិននេះ ក៏ដោយសារតែកន្លងមកក៏ដូចជាបច្ចុប្បន្ន កម្ពុជាតែងគាំទ្រឥណ្ឌា ទាំងឆាកតំបន់ អន្តរជាតិ និងទ្វេរភាគី។
ជាការកត់សម្គាល់ឥណ្ឌាថ្វីត្បិតតែមានទំនាក់ទំនងទាំងប្រពៃណី និងការទូតយូរអង្វែងជាមួយកម្ពុជាមែនក៏ប៉ុន្តែ សកម្មភាពនានាដែលបានកើតមាននៅក្នុងសម័យទំនើបនេះជាមួយកម្ពុជា ហាក់ដូចជានៅមានតិចតួចនៅឡើយ បើប្រៀបធៀបទៅនឹងប្រទេសចិននិងប្រទេសអាស៊ីដទៃទៀត។ ជាក់ស្តែងលើវិស័យសេដ្ឋកិច្ច ពាណិជ្ជកម្ម វិនិយោគ និងទេសចរណ៍ជាដើម ដែលគ្រប់ប្រទេសសំលឹងភ្នែករកប្រភពសក្តានុពលនៃវិស័យទាំងអស់នេះមកកម្ពុជា បែរជាឥណ្ឌា ដែលជាប្រទេសមានលទ្ធភាពខ្ពស់ដែរនោះកន្លងមកបានរំលងលើបញ្ហានេះ។ ទំហំពាណិជ្ជកម្មទ្វេរភាគីរវាងឥណ្ឌានិងកម្ពុជាមានប្រមាណជាង១០០លានដុល្លារបន្តិចបន្តួចប៉ុណ្ណោះ ក្នុងមួយឆ្នាំ ហើយភាគច្រើនជាការនាំចូលពីឥណ្ឌា។
តាមរយៈវត្តមានអនុប្រធានាធិបតី ម៉ូហាម៉ាត់ ហាមីឌ អានសារី នៅលើទឹកដីអង្គរជាលើកដំបូង ឥណ្ឌាទំនងជាប្រឹងប្រែងពិនិត្យមើលឡើងវិញនូវគោលការណ៍នៃចលនាវិនិយោគរបស់ខ្លួនឆ្ពោះទៅទិសខាងកើត ពោលគឺសំដៅប្រទេសកម្ពុជា វៀតណាម ឡាវ និងភូមា។ ហេតុដូច្នេះហើយទើបនៅក្នុងជំនួបជាមួយលោកនាយករដ្ឋមន្ត្រី ហ៊ុន សែន កាលពីម្សិលមិញ តំណាងប្រទេសឥណ្ឌារូបនេះអះអាងពីការជម្រុញការវិនិយោគមកកាន់ប្រទេសកម្ពុជា លើវិស័យធនធានរ៉ែ កសិឧស្សាហកម្ម និងប្រព័ន្ធ ព័ត៌មានវិទ្យា IT ជាដើម។
ម្យ៉ាងទៀត ការដែលឥណ្ឌាជាប្រទេសធំមួយទើបនឹកឃើញចង់ពង្រីកឥទ្ធិពលទៅលើប្រទេសតូចតាចដូចជាកម្ពុជាគឺចាំបាច់ត្រូវធ្វើយ៉ាងណាពង្រឹងខ្លួនឯងលើវិស័យបញ្ហាសេដ្ឋកិច្ច ដើម្បីជាការពង្រីកហិរញ្ញវត្ថុលើបណ្តាប្រទេសនៅទិសខាងកើត។ លើទិដ្ឋភាពនយោបាយឥណ្ឌាពិតជាចង់ប្រកួតប្រជែងជាមួយចិន ដោយសារតែឥណ្ឌាជាប្រទេសធំមួយដែរ តែមិនទាន់បានក្លាយជាប្រទេសមហាអំណាច ឬប្រទេសនៅក្នុងសមាជិកគណៈកម្មការអចិន្ត្រៃយ៍នៃអង្គការសហប្រជាជាតិ។ ទោះចង់ឬមិនចង់ ឥណ្ឌាតែងចង់ចាប់កម្ពុជា ដែលនេះជាយុទ្ធនាការប្រមូលកំលាំងមិត្តមួយដែរដើម្បីបង្កើនសម្លេងគាំទ្រដល់ខ្លួន។
ដោយឡែកកម្ពុជាវិញ ជាប្រទេសប្រជាធិបតេយ្យបែបបើកចំហរ មិនខុសគ្នាទេកម្ពុជាក៏ត្រូវការឥណ្ឌា និងប្រទេសឯទៀតដែរ ដោយកម្ពុជាដែលជាប្រទេសកំពង់អភិវឌ្ឍន៍បានប្រកាន់យកទស្សនៈ«ការទទួលបានផ្កាចំរុះព័ណ៌នៅក្នុងសួន» គឺជាការចាំបាច់ និងមិនមានអ្វីខាតបង់នោះទេ។
ទោះយ៉ាងនេះក្តី ឥណ្ឌានៅមិនទាន់អាចឈានទៅដល់ដំណាក់កាលដៃគូរសហប្រតិបត្តិការគ្រប់ជ្រុងជ្រោយ ដូចជាកម្ពុជា-ចិន នៅឡើយទេ ដរាបណាប្រទេសដែលប្រើម្រាមដៃជាសម ស្លាបព្រាមួយនេះនៅមិនទាន់មានឥទ្ធិពលសេដ្ឋកិច្ច និងហិរញ្ញវត្ថុខ្លាំងមកលើប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ