ឥណ្ឌាព្រមតាមកម្ពុជាផ្អាកការសាងសង់ប្រាសាទដែលយកលំនាំពីប្រាសាទអង្គរវត្ត
រដ្ឋាភិបាលឥណ្ឌាបានតម្រូវឲ្យក្រុមហ៊ុនឯកជនក្នុងស្រុកផ្អាកបណ្ដោះអាសន្នការសាងសងប្រាសាទដែលយកលំនាំពីប្រាសាទអង្គរវត្តកម្ពុជា។ ឥណ្ឌាក៏បានឲ្យក្រុមហ៊ុនដដែលកែប្រែរចនាបថឡើងវិញធ្វើយ៉ាងណាកុំឲ្យយកលំនាំដូចប្រាសាទអង្គរវត្ត។ ជំហររបស់ឥណ្ឌាយ៉ាងដូច្នេះធ្វើឡើងនៅក្នុងជំនួបរវាង ឯកអគ្គរដ្ឋទូតឥណ្ឌាថ្មីប្រចាំកម្ពុជានិងលោកឧបនាយករដ្ឋមន្រ្តី ហោ ណាំហុង នៅព្រឹកថ្ងៃទី០៨កញ្ញានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
នៅទីបំផុតប្រទេសឥណ្ឌាក៏យល់ព្រមតាមកម្ពុជាផ្អាកគម្រោងត្រៀមសាងសងប្រាសាទដែលយកលំនាំពីប្រាសាទអង្គរវត្ត។ ដោយសារតែឥណ្ឌាមិនចង់ឲ្យទំនាក់ទំនងល្អរវាងប្រទេសទាំងពីរជួបភាពល្អក់កករ ព្រោះតែលំនាំប្រាសាទនេះ។ ម្យ៉ាងទៀតឥណ្ឌាក៏បានយល់ច្បាស់អំពីតម្លៃប្រវត្តិសាស្ត្រនិងតម្លៃវប្បធម៌របស់ប្រាសាទអង្គវត្ត។ នេះជាជំហររបស់ លោក Naveen Srivastara ឯកអគ្គរដ្ឋទូតឥណ្ឌាថ្មីប្រចាំកម្ពុជាថ្លែងក្នុងជំនួបជាមួយលោកឧបនាយករដ្ឋមន្រ្តី ហោ ណាំហុង នៅព្រឹកថ្ងៃទី០៨កញ្ញានេះ។
ជាថ្មីទៀត លោក ហោ ណាំហុង ក៏បានប្រាប់ពីបំណងរបស់កម្ពុជាដែលមិនអនុញ្ញាតឲ្យឥណ្ឌាយកលំនាំតាមប្រាសាទអង្គរគឺអង្គរវត្តជាដួងព្រលឹង និងជានិមិត្តរូបរបស់កម្ពុជាតាមរយៈការដាក់នៅលើទង់ជាតិ។
សូមបញ្ជាក់ថា គម្រោងរបស់ឥណ្ឌាដែលចង់សាងសង់ប្រាសាទចម្លងតាមប្រាសាទអង្គរវត្ត បានលេចលឺតាំងពីឆ្នាំ២០១២មកម្ល៉េះ។ គម្រោងប្រាសាទដំបូងនោះ ត្រូវបានដាក់ឈ្មោះថា Virat Angkor Wat Ram Mandir ប៉ុន្តែក្រោយមកបានប្ដូរឈ្មោះមកជា Viraat Ramayan Mandir វិញ។ កាលពីខែមិថុនាកន្លងទៅ ក្រសួងការបរទេសកម្ពុជា បានផ្ញើកំណត់ទូតតវ៉ាទៅក្រសួងការបរទេសឥណ្ឌា ឲ្យមូលនិធិឥណ្ឌា Mahavir Mandir Trust បញ្ឈប់គម្រោងសាងសង់ប្រាសាទដែលចម្លងតាមប្រាសាទអង្គរវត្ត។ រដ្ឋាភិបាលកម្ពុជាបានចាត់ទុកការសាងសង់ប្រាសាទ ចម្លងតាមប្រាសាទអង្គរវត្ត ដើម្បីផលប្រយោជន៍ពាណិជ្ជកម្មនេះថា គឺជាការរំលោភបំពានយ៉ាងធ្ងន់ធ្ងរដល់សម្បត្តិបេតិកភណ្ឌពិភពលោក។
តាមការបញ្ជាក់របស់លោក ជុំ សុន្ធរី អ្នកនាំពាក្យក្រសួងការបរទេសកម្ពុជា នៅក្នុងជំនួបដដែលនោះភាគីទាំងពីរក៏បានពិភាក្សាបន្ថែមសម្រាប់ការត្រៀមទទួលដំណើរទស្សនៈកិច្ចរបស់អនុប្រធានាធិបតីឥណ្ឌា ដែលគ្រោងមកកម្ពុជានៅពាក់កណ្ដាលខែកញ្ញានេះតបតាមការអញ្ជើញរបស់លោកនាយករដ្ឋមន្ត្រី ហ៊ុន សែន។ ភាគីទាំងពីរសន្យានឹងពង្រឹងបន្ថែមផ្នែកសេដ្ឋកិច្ច ការផ្លាស់ប្ដូរពាណិជ្ជកម្ម និងវិនិយោគទុន។ លោក ហោ ណាំហុង ក៏បានបង្ហាញពីបំណងចង់បង្កើតជើងហោះហើរត្រង់រវាងឥណ្ឌា និងកម្ពុជា ដើម្បីសម្រួលការធ្វើដំណើររបស់ភ្ញៀវទេសចរ ប្រទេសទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ