ថវិកាជាតិសម្រាប់ចំណាយឆ្នាំ២០១៦កើនជាង១៦ភាគរយ
គណៈរដ្ឋមន្ត្រីនៃប្រទេសកម្ពុជាបានសម្រេច និងអនុម័តការចំណាយថវិកាថ្នាក់ជាតិតាមរយៈសេចក្តីព្រាងច្បាប់ស្តីពីថវិកាឆ្នាំ២០១៦ ត្រូវបានគ្រោងឡើងក្នុងទឹកប្រាក់ ជាង១៧ពាន់លានរៀល ស្មើនឹងជាង ៤២០០លានដុល្លារ។ គឺមានកំណើនប្រមាណជា១៦,១ភាគរយ ធៀបនឹងច្បាប់ថវិកាជាតិ ឆ្នាំ២០១៥ ដែលស្មើនឹង២១,៣១ភាគរយនៃផលិតផលសរុបក្នុងស្រុក(ផ.ស.ស)។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ការកំណត់សេចក្តីព្រាងច្បាប់ថវិកា២០១៦នេះ បានធ្វើឡើងនៅក្នុងកិច្ច ប្រជុំគណៈរដ្ឋមន្ត្រីពាក់កណ្តាលសប្តាហ៍មួយនៅព្រឹកថ្ងៃពុធ ទី២១តុលានេះ នៅឯវិមានសន្តិភាព។
តាមសេចក្តីប្រកាសទីស្តីការគណៈរដ្ឋមន្ត្រី សេចក្តីព្រាងច្បាប់ថវិកាឆ្នាំ២០១៦ ដែលមានថវិកាសរុបជាង ៤២០០លានដុល្លារនេះ គ្រោងនឹងបែងចែកទៅលើការចំណាយក្នុងវិស័យអត្ថិភាពជាច្រើន ក្នុងនោះមានវិស័យសេដ្ឋកិច្ច ត្រូវបានគ្រោងចំនួនជាង ២៨៣លានដុល្លារ កើន១៦,១%។ ក្រសួងកសិកម្ម ៤៦លានដុល្លារ កើន ២៥,១%។ ក្រសួងធនធានទឹក និងឧតុនិយមចំនួន ២៣លានដុល្លារ កើន ២៥,៤%។ ក្រសួងសាធារណការ និងដឹកជញ្ជូន ៩០លានដុល្លារ កើន ១៣,២% និងក្រសួងអភិវឌ្ឍន៍ជនបទប្រមាណជា ៣៦លានដុល្លារ កើន ១៣,៩%។
ក្រៅពីនេះក៏មានការចំណាយទៅលើវិស័យរដ្ឋបាលទូទៅផងដែរ ដែលត្រូវបានគ្រោងចំនួន ១.៥៩៧.១៨០លានរៀល ស្មើប្រមាណ ៣៩១ លានដុល្លារ កើន២១% ធៀបនឹងច្បាប់ឆ្នាំ២០១៥។
រីឯវិស័យការពារជាតិ សន្តិសុខ និងសណ្តាប់ធ្នាប់សាធារណៈវិញច្បាប់ថវិកាឆ្នាំ២០១៦ក៏ ត្រូវបានគ្រោងចំនួន ២.៧៧២.៨៥៧ លានរៀល ស្មើប្រមាណជា៦៥០លានដុល្លារ កើន១៩,៧% បើធៀបនឹងច្បាប់ឆ្នាំ២០១៥។ រីឯវិស័យសង្គមកិច្ចវិញ ត្រូវបានគ្រោងថវិកាចំនួន ៤.២៩១.៤៤១ លានរៀល ស្មើប្រមាណ ១.០៥០ លានដុល្លារ កើន១៩,៧%។ ក្នុងនោះ ក្រសួងអប់រំ យុវជន និងកីឡាស្មើប្រមាណ ៤៩៧លានដុល្លារ កើន២៨,២%។ ក្រសួងការងារ និងបណ្តុះបណ្តាលវិជ្ជាជីវៈ ៤២លានដុល្លារ កើន៤៥,៨%។ ក្រសួងសុខាភិបាល ២៧២ លានដុល្លារ កើន៨,៦%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ