តំបន់ខ្ពង់រាបនៅកម្ពុជា នឹងបន្តទទួលរងគ្រោះជំនន់ទឹកភ្លៀង
កម្ពុជានឹងទទួលរងឥទ្ធិពលវិសម្ពាធ ដែលបច្ចុប្បន្នកំពុងស្ថិតនៅក្នុងសមុទ្រចិនខាងត្បូង នៅក្នុងសប្តាហ៍នេះ។ ឥទ្ធិពលនៃវិសម្ពាធនេះ នឹងធ្វើដំណើរឡើងទៅកៀកនឹងឆ្នេរភាគកណ្តាលនៃប្រទេសវៀតណាម ដែលអាចបង្កជាភ្លៀងធ្លាក់ជោកជាំខ្លាំង ដល់តំបន់ខ្ពង់រាប និងតំបន់ទំនាបកណ្តាល មួយចំនួននៅក្នុងប្រទេសកម្ពុជា។ សូមបញ្ជាក់ថា វិសម្ពាធនេះនឹងធ្វើការអូសបន្លាយរហូតដល់ថ្ងៃទី ១៨ ខែ កញ្ញានេះ។អត្ថបទដោយ៖ ព្រឿន បញ្ញារី
ចុះផ្សាយនៅថ្ងៃ៖
ស្តាប់ - ០១:៤៨
លោក ចាន់ យុត្ថា អ្នកនាំពាក្យ និងជាប្រធានខុទ្ទកាល័យនៃក្រសួងធនធានទឹក និងឧតុនិយមបាន បា្រប់វិទ្យុបារាំងថាវិសម្ពាធនេះនឹងជះឥទ្ធិពលយ៉ាងខ្លាំងដល់តំបន់ខ្ពង់រាប គឺនៅចន្លោះព្រំដែនប្រទេសឡាវ និងកម្ពុជា ដែលនឹងធ្វើដំណើរពីភាគខាងជើងនៃខេត្តស្ទឹងត្រែង។ ឥទ្ធិពលថ្មីនេះបានបង្កអោយមានជាភ្លៀងធ្លាក់រាយប៉ាយកាន់តែច្រើននៅក្នុងតំបន់ខ្ពង់រាប ហើយជាបណ្តោះអាសន្នទាំងតំបន់ខ្ពង់រាប និងតំបន់ទំនាបកណ្តាលមួយចំនួន បានទទួលនូវរបាយទឹកភ្លៀងលើសពី ១០០មមនៅក្នុងរយៈពេល២៤ម៉ោង។
សូមជម្រាបថា នេះគឺជាកម្រិតទឹកភ្លៀងបរិមាណច្រើន ដែលអាចបង្កអោយមានទឹកជំនន់ជន់លិចភ្លាមៗ។ រហូតមកដល់ពេលនេះ វិសម្ពាធនេះបានជះឥទ្ធិពលនៅក្នុងតំបន់ខ្ពងរាបមួយចំនួនរួមមាន ស្រុកក្រឡាញ់ ដែលមានទីតាំងស្ថិតនៅក្នុងខេត្តសៀមរាប ដោយតំបន់នេះបានទទួលរបាយទឹកភ្លៀងរហូតទៅដល់ ១០៥មម។ ក្រៅពីតំបន់នេះ អាងតាម៉ុក ដែលមានទីតាំងស្ថិតនៅក្នុងខេត្តឧត្តរមានជ័យក៏កំពុងតែរងឥទ្ធិពលពីវិសម្ពាធនេះផងដែរ ដោយនៅក្នុងនោះចរន្តទឹក ដែលមានកម្រិតខ្លាំងបានហូរពីលើស្ពាន ដែលបណ្តាលអោយផ្អាកដំណើរការធ្វើចរាចរមូយរយៈ។
ជុំវិញបញ្ហានេះ ក្រសួងធនធានទឹកក៏បានចេញនូវវិធានការណ៍មួយចំនួនដូចជា ការត្រៀមនូវគ្រឿងចក្រមួយចំនួនធ្វើយ៉ាងណា ដើម្បីបើកផ្លូវទឹក ដើម្បីអោយចរន្តទឹកភ្លៀងហូរទៅកាន់បឹងទន្លេសាបអោយកាន់តែឆាប់រហ័ស។ នេះគឺជាវិធានការណ៍ចម្បងមួយ ដែលក្រសួងធនធានទឹកនិងឧតុនិយមបានត្រៀមលក្ខណៈរួចជាស្រេច នៅក្នុងការទប់ស្កាត់ការកើតមាននូវការជន់លិចទឹកភ្លៀង ក៏ដូចជាជៀសវាងការខូចខាតផ្សេងៗ ដែលអាចកើតមាន។
សូមបញ្ជាក់ថា ឥទ្ធិពលរបស់ប្រព័ន្ធសម្ពាធទាប និងវិសម្ពាធនេះបាននឹងកំពុងបន្តគំរាមកំហែងនៅស្ទើរតែគ្រប់ក្របខណ្ឌនៅក្នុងប្រទេសកម្ពុជា។ យ៉ាងណាក៏ដោយ ក្រសួងបានអះអាងថា មានទីតាំង ដែលប្រឈមនូវឥទ្ធិពលនេះខ្ពស់ជាងគេគឺ តំបន់ខ្ពង់រាបភាគឥសានរួមមានខេត្ត ក្រចេះ ស្ទឹងត្រែង រតនគីរី មណ្ឌលគីរី តំបន់ខ្ពង់រាបភាគខាងជើងរួមមានព្រះវិហារ និងខេត្តឧត្តរមានជ័យ ព្រមទាំងតំបន់ទំនាបកណ្តាលចំនួន ២ខេត្តគឺ ខេត្តបន្ទាយមានជ័យ និងខេត្តសៀមរាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ