អង្គការសមាគមអំពាវនាវមិនឲ្យសភាអនុម័តច្បាប់ស្តីពីសមាគម និងអង្គការ ខណៈបក្សប្រជាជនគាំទ្រ
ក្រុមតំណាងសមាគម និងអង្គការមិនមែនរដ្ឋាភិបាលប្រមាណ ៤០០នាក់ បានទាមទារ និងអំពាវនាវមិនឲ្យសភាអនុម័តច្បាប់ស្តីពីសមាគម និងអង្គការមិនមែនរដ្ឋាភិបាល ក្នុងព្រឹកថ្ងៃទី២៨ ខែមិថុនានេះ។ ការទាមទារនេះ បានធ្វើឡើងនៅខាងមុខរដ្ឋសភាជាតិ ដោយមានការដើរហែរក្បួនជុំវិញរដ្ឋសភា និងបង្ហោះប៉េងប៉ោងផងដែរ។ ការអំពាវនាវនេះ បានធ្វើឡើងម្តងហើយម្តងទៀត ដើម្បីកុំឲ្យសភាអនុម័តច្បាប់នេះ ព្រោះវាប៉ះពាល់ដល់សកម្មភាពបំពេញការងាររបស់សមាគម និងអង្គការក្រៅរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០៤:៥០
នេះជាសម្លេងរបស់ក្រុមតំណាងសមាគម និងអង្គការមិនមែនរដ្ឋាភិបាល ដែលបានស្រែកអំពាវនាវមិនឲ្យរដ្ឋសភាជាតិអនុម័តច្បាប់សមាគមអង្គការ។ នៅព្រឹកនេះ មានការចូលរួមពីសមាគម និងអង្គការមិនមែនរដ្ឋាភិបាល ដែលមានដូចជាសមាគមអាដហុក អង្គការលីកាដូ ជាដើម។ លោក ធន សារ៉ាយ ប្រធានសមាគមអាដហុកបានបញ្ជាក់ប្រាប់អ្នកសារព័ត៌មាន អំពីការមកចូលរួមនៅទីនេះថា ដើម្បីអំពាវនាវមិនឲ្យមានការអនុម័តច្បាប់នេះ ដោយសារតែវាមិនបានបំរើប្រយោជន៍សង្គមទូទៅទេ។ តែវាគឺជាច្បាប់ ដែលចងដៃចងជើងសមាគម និងអង្គការក្រៅរដ្ឋាភិបាល។
លោកធន សារ៉ាយ បន្តថា បើមានគណបក្សនយោបាយណាបន្តអនុម័តច្បាប់នេះ នោះក្រុមអង្គការសង្គមស៊ីវិល នឹងអំពាវនាវឲ្យប្រជាពលរដ្ឋជាម្ចាស់ឆ្នោតមិនឲ្យបោះឆ្នោតឲ្យពួកអ្នកនយោបាយទាំងនោះទៀតទេ។ ម្យ៉ាងវិញទៀត លោកថា គណបក្សសង្រ្គោះជាតិ និងគណបក្សប្រជាជនកម្ពុជា មានវប្បធម៌សន្ទនា ចុះហេតុអ្វីរដ្ឋាភិបាលមិនបង្កើតឲ្យមានការសន្ទនាគ្នារវាងអង្គការក្រៅរដ្ឋាភិបាលដែរទៅ។
យ៉ាងណាមិញ បើតាមអ្នកនាំពាក្យរដ្ឋសភា លោក ឈាង វុន ដែលធ្លាប់បានប្រាប់វិទ្យុបារាំង កាលពីថ្ងៃទី១៦ ខែមិថុនាកន្លងទៅថា គណៈកម្មាធិការអចិន្ត្រៃយ៍នៃរដ្ឋសភា នឹងបញ្ជូនសេចក្ដីព្រាងច្បាប់នេះទៅកាន់គណៈកម្មការជំនាញ ដើម្បីសិក្សា ស្រាវជ្រាវ និងផ្ដល់យោបល់ជាមុនសិន។ ហើយក្រោយពីនោះ នឹងមានការពិភាក្សាជាមួយរដ្ឋាភិបាល មុននឹងរៀបចំឲ្យមានសិក្ខាសាលាពិគ្រោះយោបល់ជាមួយភាគីពាក់ព័ន្ធ ផ្សេងទៀត។
ចំណែកឯប្រធានគណបក្សប្រជាកម្ពុជាបានថ្លែងក្នុងពីធីគំរប់ខួប ៦៤ឆ្នាំនៃការបង្កើតគណបក្សប្រជាជនកម្ពុជាថា គណបក្សនេះគាំទ្រការបង្កើតច្បាប់ស្តីពីសមាគម និងអង្គការមិនមែនរដ្ឋាភិបាល ដើម្បីការពារសិទ្ធិសេរីភាព និងផលប្រយោជន៍របស់សមាគម ព្រមទាំងធានាឲ្យកិច្ចដំណើរការរបស់អង្គការទាំងនេះ ប្រព្រឹត្តិទៅប្រកបដោយប្រសិទ្ធភាព។
សូមបញ្ជាក់ថា ច្បាប់នេះបានទៅដល់រដ្ឋសភាជាតិកាលពីថ្ងៃទី១៦ ខែមិថុនា ក្រោយពីបានលុបចោល២មាត្រា និងកែសម្រួល២មាត្រា ដោយទីស្តីការគណៈរដ្ឋមន្ត្រីកាលពីថ្ងៃទី៥ ខែមិថុនា។ ចំពោះពេលវេលសម្រាប់ការពិភាក្សាជាផ្លូវការលើសេចក្តីព្រាងច្បាប់ ៩ជំពួក និង៣៩មាត្រានេះ ដោយរដ្ឋសភាជាតិ មិនទាន់បានញ្ជាក់ច្បាស់លាស់នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ