NGO Forum ៖រាជធានីភ្នំពេញមានអត្រាវិវាទដីធ្លីកើតឡើងខ្ពស់ជាងគេ
រាជធានីភ្នំពេញឈរនៅលំដាប់ថ្នាក់ទីមួយដែលមានអត្រាវិវាទដីធ្លីកើតឡើងខ្ពស់បំផុត ហើយបន្ទាប់មកខេត្តរតនគិរីស្ថិតក្នុងលំដាប់ទីពីរ។ នេះបើយោងតាមការវិភាគស្ថិតិស្ដីពីវិវាទដីធ្លីនៅកម្ពុជាក្នុងឆ្នាំ២០១៤ដែលផ្សព្វផ្សាយដោយវេទិកានៃអង្គការមិនមែនរដ្ឋាភិបាលស្ដីពីកម្ពុជានៅថ្ងៃទី២២កញ្ញានៅភោជនីយដ្ឋានទន្លេបាសាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
មូលហេតុដែលធ្វើឲ្យរាជធានីភ្នំពេញនាំមុខខេត្តក្នុងរឿងវិវាទដីធ្លីដោយសារតែការអភិវឌ្ឍន៍ក្រុងប៉ះចំកន្លែងរស់នៅរបស់ពលរដ្ឋ និងកំណើនប្រជាជនក្រីក្រដែលកំពុងរស់នៅលើដីសាធារណៈរបស់រដ្ឋ។ ចំពោះខេត្តរតនគិរីដែលសំបូរទៅដោយជនជាតិដើមភាគតិចរស់នៅនោះគឺដោយសារការអភិវឌ្ឍន៍របស់ក្រុមហ៊ុនដែលទទួលបានសិទ្ធវិនិយោគដីសម្បទានសេដ្ឋកិច្ចអភិវឌ្ឍន៍ប៉ះពាល់ដល់ធនធានរួមរបស់ជនជាតិដើមភាគតិច។ ដូច្នេះហើយទើបធ្វើឲ្យមានវិវាទកើតឡើងរវាងក្រុមហ៊ុននិងជនជាតិដើមភាគតិច។ នេះបើតាមការបញ្ជាក់របស់លោកតឹក វណ្ណារ៉ា នាយកប្រតិបត្តិ វេទិកានៃអង្គការមិនមែនរដ្ឋាភិបាល។
បើតាមលោក តឹក វណ្ណរ៉ា វិវាទដីធ្លីទាំងនេះគឺជាផ្នែកមួយដែលរកឃើញនៅក្នុងការវិភាគស្ថិតិស្ដីពីវិវាទដីធ្លីនៅកម្ពុជាក្នុងឆ្នាំ២០១៤របស់វេទិកានៃអង្គការមិនមែនរដ្ឋាភិបាលស្ដីពីកម្ពុជា(NGO Forum)។ បើតាមរបាយកាណ៍វិភាគនេះឆ្នាំ២០១៤វិវាទដីធ្លីនៅទូទាំងប្រទេសកើតមាន៣៥២ករណី ហើយក្នុងមួយករណី NGO Forum ធ្វើការវិភាគទៅលើជម្លោះដែលមានផលប៉ះពាល់ខ្លាំងចាប់ពីប្រាំគ្រួសារឡើងទៅ។ ក្នុងចំណោមវិវាទដីធ្លីកើតមាន៣៥២ករណីនេះគឺ ៦៨ករណីត្រូវបានដោះស្រាយ ១៤ករណីត្រូវបានបោះបង់ចោលដោយភាគីក្រុមហ៊ុននិងប្រជាពលរដ្ឋ និង ២៧០ ករណីកំពុងធ្វើការដោះស្រាយបន្ត។ ក្នុងចំណោម ២៧០ ករណីដែលកំពុងដោះស្រាយបន្តនេះមាន៤៩ករណីបានប៉ះពាល់ដល់ជនជាតិដើមភាគតិចរស់នៅក្នុងខេត្តចំនួនប្រាំបី។
លោក អេ ប៊ុនអឿន ជាមន្ត្រីគណៈកម្មការសុរិយោដីថ្នាក់ជាតិរបស់ក្រសួងដែនដីដែលចូលរួមក្នុងវេទិកានេះមិនបានបង្ហាញព័ត៌មានឲ្យបានច្បាស់លាស់អំពីការចូលរួមរបស់ក្រសួងក្នុងការដោះស្រាយវិវាទដីធ្លីដែលនៅសេសល់ចំនួន២៧០ករណីនោះទេ។ ព្រោះក្រសួងមិនដែលបានទទួលពាក្យបណ្ដឹងទាំងនេះទេ។ តែយ៉ាងណាក៏ដោយលោក អេ ប៊ុនអឿន បានបញ្ជាក់ដោយខ្លីថា ការអនុវត្តទៅតាមគោលនយោបាយចុះបញ្ជីដីតាមបទបញ្ជា០១ចាប់ពីឆ្នាំ២០១២មកទំនាស់ដីធ្លីមានការថយចុះ។
ការវិភាគដដែលបង្ហាញទៀតថា សម្បទានដីសេដ្ឋកិច្ចគឺជាមូលហេតុចម្បងនៃវិវាទដីធ្លីមានចំនួនរហូតដល់ទៅ៨៦ករណីហើយបង្កទៅជាផលប៉ះពាល់ដល់ប្រជាពលរដ្ឋចំនួន១៧.១៥០គ្រួសារ។ សូមបញ្ជាក់ថា គោលបំណងនៃរបាយការណ៍នេះគឺដើម្បីផ្ដល់ភស្ដុតាងជាឯកសារនៃវិវាទដីធ្លីដែលបានកត់ត្រាក្នុងឆ្នាំ២០១៤និងចូលរួមចំណែកលើកកម្ពស់ការយល់ដឹងអំពីស្ថានភាពបច្ចុប្បន្នពាក់ព័ន្ធវិវាទដីធ្លី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ