តុលាការកោះហៅលោកសុខ ឥសាន និងលោក អ៊ូវីរៈ ក្នុងរឿងបរិហារកេរ្តិ៍
តុលាការក្រុងភ្នំពេញ បានចេញដីកាកោះហៅលោក សុខ ឥសាន អ្នកនាំពាក្យគណបក្សប្រជាជនកម្ពុជាឱ្យចូលខ្លួនដើម្បីផ្តល់សក្ខីកម្មពីបណ្តឹងបរិហារកេរ្តិ៍លោកអ៊ូ វីរៈ។ លោកសុខ ឥសានអះអាងថាមានភស្តុតាងរឹងម៉ាំនៅក្នុងដៃ។ ដោយឡែកលោកអ៊ូ វីរៈវិញ បានលើកឡើងថាបណ្តឹងនេះតុលាការមិនគួរចាត់វិធានការទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
នៅថ្ងៃទី៦ ឧសភាខាងមុខនេះ លោក សុខ ឥសាន នឹងត្រូវចូលខ្លួនផ្តល់ចម្លើយទៅតុលាការក្នុងសំណុំរឿងបណ្តឹងលោកអ៊ូ វីរៈ។ ដោយឡែកលោកអ៊ូ វីរៈវិញ នឹងត្រូវឆ្លើយបំភ្លឺនៅចំពោះមុខតុលាការនៅថ្ងៃទី១២ ឧសភាខាងមុខនេះ។ ក្នុងសំណុំរឿងនេះ លោក សុខ ឥសាន បានអះអាងថា លោកមានភស្តុតាងយ៉ាងរឹងម៉ាំដើម្បីចោទប្រកាន់ចុងចោលពីបទបរិហារកេរ្តិ៍គណបក្សជាសាធារណៈ។ ភស្តុតាងនោះគឺខ្សែអាត់សំឡេងរបស់លោកអ៊ូវីរៈ។
សូមបញ្ជាក់ថា លោក សុខឥសាន បានដាក់ពាក្យបណ្តឹងលោកអ៊ូ វីរៈ អ្នកវិភាគសង្គមនយោបាយ និងជាប្រធានអង្គការវេទិកាអនាគតកាលពីថ្ងៃទី២៤ មេសា ពីបទបរិហារកេរ្តិ៍គណបក្សប្រជាជនកម្ពុជាជាសាធារណៈ បន្ទាប់ពីអ្នកវិភាគរូបនេះ បានផ្តល់ការអត្ថាធិប្បាយរិះគន់គណបក្សកាន់អំណាចនៅលើប្រព័ន្ធផ្សព្វផ្សាយ។ បណ្តឹងនេះ លោក សុខ ឥសាន បានទារសំណងជំងឺចិត្ត១០០ លានរៀល។
ដោយឡែកខាងលោកអ៊ូ វីរៈវិញ បានត្រៀមមេធាវីរួចហើយចំពោះករណីនេះ។ សម្រាប់អ្នកវិភាគសង្គមនយោបាយរូបនេះ តុលាការមិនគួរចាត់ការលើបណ្តឹងរឿងនេះទេព្រោះថា ការអត្ថាធិប្បាយរបស់លោក គឺគ្រាន់តែជាសិទ្ធនៃការបញ្ចេញមតិតែប៉ុណ្ណោះ។
យ៉ាងណាក៏ដោយ លោកអ៊ូវីរៈនៅតែរិះគន់ចំពោះចំណាត់ការនេះថា គឺជាគំនាបដើម្បីបំបិទសិទ្ធិសេរីភាពក្នុងការរិះគន់រដ្ឋាភិបាល។ អ្នកវិភាគដែលមានសញ្ជាតិខ្មែរ និងអាមេរិកកាំងរូបនេះ បានអះអាងក្រៅពីយន្តការនៅក្នុងស្រុក លោកក៏មានជម្រើសជាយន្តការក្រៅស្រុកផងដែរប្រសិនបើលោកទទួលរងភាពអយុត្តិធម៌។
សូមរំលឹកបន្តិចថា សំណុំរឿងក្តីក្តាំរវាងលោក សុខ ឥសាន និងលោក អ៊ូវីរៈ គឺហូរចេញពីសំណុំរឿងអាស្រូវភ្លូវភេទរវាងស្ត្រីម្នាក់ និងលោក កឹម សុខា ប្រធានស្តីទីគណបក្សសង្គ្រោះជាតិ។ ហើយបច្ចុប្បន្ន សំណុំរឿងស្នេហាដ៏ស្មុគស្មាញនេះ បានអូសទាញសង្គមស៊ីវិលមួយចំនួន និង មន្ត្រីជាន់ខ្ពស់គ.ជ.ប ឱ្យជាប់ក្នុងសំណាញ់តុលាការផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ