លោកអ៊ូ វីរៈផ្ញើលិខិតចំហទៅកាន់ប្រមុខបក្សទាំងពីរពីគោលនយោបាយកម្ពុជាជាមួយចិននិងអាមេរិក
ប្រធានវេទិកាអនាគតលោក អ៊ូ វីរៈ នៅថ្ងៃទី៩វិច្ឆិកានេះបានផ្ញើលិខិតចំហមួយជូនលោក ហ៊ុន សែន និង លោក សម រង្ស៊ី ទាក់ទងនឹងគោលនយោបាយការបរទេសរួមសម្រាប់ប្រទេសកម្ពុជាអនុវត្តជាមួយអាមេរិក និងចិនមុនការបោះឆ្នោតថ្នាក់ជាតិឆ្នាំ២០១៨។ ជាគោលនយោបាយមួយដើម្បីបង្ហាញទៅសហគមន៍អន្តរជាតិនិងប្រទេសជិតខាងថា«កម្ពុជានឹងមិនអាចក្លាយជាកូនអុកដែលគេប្រើនៅក្នុងការលេង ល្បែងអំណាចនយោបាយភូមិសាស្ត្ររបស់មហាអំណាចជាថ្មីទៀតឡើយ» ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
លិខិតចំហដែលមានកម្រាស់១៦ទំព័ររបស់លោក អ៊ូ វីរៈ ដែលគេស្គាល់ថាជាមន្ត្រីសង្គមស៊ីវិលមួយរូបហ៊ានរិះគន់រដ្ឋាភិបាលនិងបក្សប្រឆាំងដោយមិនសំចៃមាត់នោះបានផ្ដល់អនុសាសន៍មួយចំនួនទាក់ទងគោលនយោបាយការបទេសទៅកាន់លោក ហ៊ុន សែន ប្រធានគណបក្សប្រជាជននិងលោក សម រង្ស៊ី ប្រធានគណបក្សសង្គ្រោះជាតិជាមួយប្រទេសចិននិងសហរដ្ឋអាមេរិកមុនការបោះឆ្នោតថ្នាក់ជាតិឆ្នាំ២០១៨។ លិខិតចំហរបស់ លោក អ៊ូ វីរៈដែលផ្ដោតសំខាន់ទៅលើចលនាមិនចូលបក្សសម្ព័ន្ធ ដែលកម្ពុជាត្រូវធានាខ្លួនថាគោរពចំពោះឋានៈមួយនេះ ហើយត្រូវស្ថិតនៅអព្យាក្រឹត្យ។
សម្រាប់ទំនាក់ទំនងជាមួយប្រទេសចិននិងសហរដ្ឋអាមេរិកគឺកម្ពុជាត្រូវតែធ្វើជាមិត្តជាមួយមហាអំណាចទាំងពីរនិងត្រូវស្ថិតនៅក្រៅជម្លោះនៅថ្នាក់តំបន់និងថ្នាក់អន្តរជាតិ។ ក្នុងន័យនេះ លោក អ៊ូ វីរៈ រម្លឹកថា ប្រសិនបើកម្ពុជាបង្ហាញយ៉ាងច្បាស់ជាសាធារណៈអំពីការគាំទ្រប្រទេសចិនទាក់ទងជម្លោះបញ្ហាសមុទ្រចិនខាងត្បូងនោះ កម្ពុជាអាចបង្កហានិភ័យនៃការបែងចែកថ្មីមួយទៀតដែលជាកត្តាបង្អាក់ដល់ការអភិវឌ្ឍន៍រវាងប្រទេសកម្ពុជានិងប្រទេសវៀតណាមដែលប្រទេសទាំងពីរនេះអាចជាកូនអុកដ៏សំខាន់នៅក្នុងយុគថ្មីនៃសង្គ្រាមត្រជាក់។
ទាំងអាមេរិកនិងចិនគឺផ្ដល់ប្រយោជន៍ជាក់ស្ដែងនិងប្រកបដោយសក្ដានុពលដល់កម្ពុជា ប្រសិនបើជម្លោះមិនកើតឡើងឬមុនពេលដែលជម្លោះកើតឡើង។ អាមេរិកគឺជាម្ចាស់ជំនួយដ៏ធំស្រាប់ហើយដោយបានវិនិយោគតាមរយៈការផ្ដល់ជំនួយជាងពាន់លានដុល្លារចាប់តាំងពីដើមទសវត្សរ៍១៩៩០មកនោះ។ អ្វីដែលកម្ពុជាត្រូវការពីអាមេរិកផ្នែកសេដ្ឋកិច្ចគឺពាណិជ្ជកម្មនិងការវិនិយោគ។ ប្រទេសចិនក៏បានវិនិយោគយ៉ាងច្រើននៅក្នុងគម្រោងហេដ្ឋារចនាសម្ព័ន្ធ។ នេះជាការបន្ថែមរបស់លោក អ៊ូ វីរៈ។
ប៉ុន្តែជាការគត់សម្គាល់ដោយលោក អ៊ូ វីរៈ គ្រោះថ្នាក់នៃការពឹងផ្អែកជ្រុលទៅលើប្រទេសចិនគឺប្រទេសផ្សេងទៀតដែលបានជួយដល់កម្ពុជាពីមុនមកដូចជាអាមេរិកជាដើមអាចមើល ឃើញថាកម្ពុជាហាក់ដូចជាជំពាក់គុណចិនខ្លាំងពេករហូតដល់ពួកគេមានការពិបាក់ក្នុងការជះឥទ្ធិពលហើយវាធ្វើឲ្យកម្ពុជាកាន់តែពឹងផ្អែកច្រើនឡើងទៅលើប្រទេសចិន។
តាមលោក អ៊ូ វីរៈ ជំនួយដែលចិនផ្ដល់កម្ពុជានិងប្រយោជន៍ដែលចិនទទួលបានពីកម្ពុជាវិញគឺធនធានធម្មជាតិរបស់កម្ពុជាជាឧទាហរណ៍បង្ហាញស្រាប់។ ជារួមមកលោក អ៊ូ វីរៈមើលឃើញថា គោលនយោបាយចូលរួមដោយស្មើភាពនិងមិនចូលបក្សសម្ព័ន្ធគឺមានសារៈសំខាន់សម្រាប់អនាគតប្រទេសកម្ពុជាហើយវាគួរតែមានការព្រមព្រៀងគ្នាយ៉ាងច្បាស់លាស់ជាក់ស្ដែងមួយរវាងគណបក្សប្រជាជននិងគណបក្សសង្គ្រោះជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ