កម្ពុជា និងអាហ្វ្រិកកណ្តាលរៀបចំពិធីប្រារព្ធវិញ្ញាណក្ខន្ធកងទ័ពមួកខៀវកម្ពុជា ដែលទទួលមរណៈភាព
កម្ពុជានៅថ្ងៃនេះ រៀបចំពិធីគោរពវិញ្ញាណក្ខន្ធកងទ័ពមួកខៀវចំនួន ៤រូប នៅមជ្ឈមណ្ឌលជាតិគ្រប់គ្រងកម្លាំងរក្សាសន្តិភាព ខណៈសាធារណរដ្ឋអាហ្រ្វិកកណ្តាលក៏មានរៀបចំពិធីនេះដូចគ្នាដោយមានការចូលរូមពីប្រេសិតពិសេសនៃអង្គការសហប្រជាជាតិ និងកងកម្លាំងរក្សាសន្តិភាពមកពីប្រទេសចំនួន ៤១។ នៅក្នុងសន្និសីទជុំវិញមរណភាពទាហានមួកខៀវទាំង ៤រូប អគ្គនាយកមជ្ឈមណ្ឌលជាតិរក្សាសន្តិភាពថ្លែងប្រាប់អ្នកសារព័ត៌មានថា សពរបស់កងទ័ពទាំង៤ នឹងបញ្ជូនមកកម្ពុជា ក្នុងរយៈពេល ១ ទៅ ២ សប្តាហ៍ខាងមុខនេះ ដើម្បីរៀបចំពិធីបុណ្យសពនៅគេហដ្ឋានរបស់ពួកគេ។
ចុះផ្សាយនៅថ្ងៃ៖
ស្តាប់ - ០២:១៥
នៅព្រឹកថ្ងៃទី ១២ ឧសភា នេះ មន្រ្តីជាន់ខ្ពស់កម្ពុជា ព្រមទាំងតំណាងស្ថានទូតសហរដ្ឋអាមេរិក ថៃ វៀតណាម និងស្ថានទូតមួយចំនួនទៀតប្រចាំនៅកម្ពុជាបានចូលរួមជាបន្តបន្ទាប់ដើម្បីគោរពវិញ្ញាណក្ខន្ធកងទ័ពមួកខៀវកម្ពុជា ៤ រូប ដែលបានពលីក្នុងបេសកកម្មការពារសន្តិភាពពិភពលោកក្រោមឆ័ត្រអង្គការសហប្រជាជាតិ។
ចំណែកឯនៅសាធារណរដ្ឋអាហ្វ្រិកខាងត្បូងវិញ នៅវេលាម៉ោង ៦ល្ងាចនេះ (ត្រូវនឹងម៉ោង ១២ ថ្ងៃត្រង់ ម៉ោងនៅកម្ពុជា) ក៏នឹងរៀបចំពិធីគោរពវិញ្ញាណក្ខន្ធកងទ័ពមួកខៀវកម្ពុជា ៤ រូប និង កងទ័ពមួកខៀវម៉ារុកម្នាក់ទៀត ដោយមានការចូលរួមពីប្រេសិតពិសេសនៃអង្គការសហប្រជាជាតិ មេបញ្ជាការជាន់ខ្ពស់ ព្រមទាំងកងកម្លាំងរក្សាសន្តិភាពពីប្រទេសជាង ៤០ ទៀត។ នេះបើតាម នាយឧត្តសេនីយ៍ សែម សុវណ្ណនី អគ្គនាយក នៃមជ្ឈមណ្ឌលកងកម្លាំងរក្សាសន្តិភាព បោសសំអាតមីន និងគ្រាប់មិនទាន់ផ្ទុះ។
គិតមកត្រឹមពេលនេះ មានកងទ័ពមួកខៀវច្រកក្រោមឆ័ត្រអង្គការសហប្រជាជាតិ ៥ នាក់ ក្នុងនោះកងទ័ពកម្ពុជា ៤ រូប និង ម៉ារុក ១ រូប ដែលបានបាត់បង់ជីវិត និង របួសជិត ១០ នាក់ ផ្សេងទៀត នៅក្នុងការស្ទាក់វាយប្រហារក្បួនរថយន្តបេសកកម្មរក្សាសន្តិភាពដោយក្រុមឧទ្ទាមគ្រិស្តសាសនា anti-Balaka នៅសាធារណរដ្ឋអាហ្រ្វិកកណ្តាល។
នាយឧត្តមសេនីយ៍ សែម សុវណ្ណនី អគ្គនាយក នៃមជ្ឈមណ្ឌលកងកម្លាំងរក្សាសន្តិភាព បោសសំអាតមីន និងគ្រាប់មិនទាន់ផ្ទុះ បានថ្លែងឲ្យដឹងថា ក្រុមគ្រួសាររបស់យោធិនកម្ពុជាទាំង ៤រូប ដែលបានស្លាប់ដោយការវាយប្រហារពីពួកឧទ្ទាម នៅប្រទេសអាហ្វ្រិកកណ្តាល នឹងទទួលបានសំណង ប្រមាណ ៧ម៉ឺនដុល្លារ សម្រាប់សពម្នាក់ពីអង្គការសហប្រជាជាតិ ហើយក្រៅពីសំណងរបស់អង្គការសហប្រជាជាតិ រដ្ឋាភិបាលក៏មានរបបគោលនយោបាយផ្សេងទៀតសម្រាប់ជនរងគ្រោះផងដែរ។
សូមរំឮកឡើងវិញថា ថាទាហានមួកខៀវកម្ពុជា ៤រូបនោះ បានពលីជីវិតនៅប្រទេសអាហ្រិ្វកកណ្តាល បន្ទាប់ពីមានការវាយប្រហារដោយ ក្រុមឧទ្ទាមទៅលើក្បួនយុទ្ធ ដំណើររបស់កម្លាំង Minusca របស់អង្គការសហប្រជាជាតិ កាលពីយប់ថ្ងៃទី ០៨ ខែឧសភា ឆ្នាំ ២០១៧។ ក្នុងនោះរួមមាន៖ លោកពលបាលឯក (ឋានន្តរស័ក្តពិតប្រាកដ អនុសេនីយ៍ទោ) អ៊ឹម សំ បុគ្គលិកបើកបរ ប៊ុលដូស៊ែរ, លោកអនុសេនីយ៍ត្រី ស៊ាន នរិន្ទ (ព្រិន្ទបាលទោ) ជំនួយការត្រួតពិនិត្យគុណភាព, លោកពលបាលឯក មុំ តុលា (ព្រិន្ទបាលទោ) ជំនួយការបើកបរអ៊ិស្ការវ៉ាទ័រ និង លោកអនុសេនីយ៍ត្រី ម៉ៅ អេង (អនុសេនីយ៍ឯក) បុគ្គលិកពេទ្យផងដែរ។ ចំណែកទាហានរក្សាសន្តិភាពរបស់ម៉ារ៉ុកម្នាក់ទៀត ដែលបានបាត់ខ្លួន អំឡុងពេលវាយឆ្មក់លើក្បួនរថយន្តបេសកកម្មរក្សាសន្តិភាពនៅសាធារណរដ្ឋអាហ្វ្រិកកណ្ដាល ត្រូវបានរកឃើញថាបាត់បង់ជីវិតនៅថ្ងៃទី ១១ ឧសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ