លោក ចម ប្រសិទ្ធ៖ ការពុលមនុស្សនៅក្រចេះមកពីសារធាតុ«ត្យានីត»លាងរ៉ែមាស
នៅទីបំផុតមន្ទិលសង្ស័យពីការពុលមនុស្សរាប់រយនាក់ និងការស្លាប់ជាង១០នាក់នៅខេត្តក្រចេះត្រូវបានរដ្ឋមន្រ្តីក្រសួងឧស្សាហកម្ម និងសិប្បកម្ម បញ្ជាក់ថាមកពីការប្រើប្រាស់សារធាតុ«ត្យានីត» សម្រាប់លាងរ៉ែមាស ដែលរក្សាទុកមិនត្រឹមត្រូវ ហើយបណ្តាលឲ្យហូរចូលទន្លេ ពុលដល់អ្នកប្រើប្រាស់ទឹកនោះ។ ការបញ្ជាក់ បែបនេះធ្វើកាលពីម្សិលមិញ ខណៈក្រសួងសុខាភិបាលអះអាងថា ពលរដ្ឋដែលស្លាប់គឺមកពីពុលស្រា ហើយអ្នកមិនទាន់ស្លាប់គឺមកពីពុលទឹក។
ចុះផ្សាយនៅថ្ងៃ៖
ស្តាប់ - ០១:៤២
តាមរយៈសន្និសិទសារព័ត៌មានមួយ លោក ចម ប្រសិទ្ធ រដ្ឋមន្រ្តីក្រសួងឧស្សាហកម្ម និងសិប្បកម្ម បានឲ្យដឹងថា បន្ទាប់ពីបានធ្វើការស្រាវជ្រាវ និងធ្វើពិសោធន៍បានរកឃើញថា ប្រជាជនមួយចំនួនពុលដោយសារទឹកទន្លេព្រែកតេ នៅខេត្តក្រចេះ ដែលហូរចាក់មកពីខេត្តមណ្ឌលគិរី។ ខេត្តមណ្ឌលគិរី ដែលមានការធ្វើអាជីវកម្មរ៉ែមាស ដោយប្រើប្រាស់សារធាតុ«ត្យានីត» សម្រាប់លាងសម្អាតរ៉ែមាស ដោយរក្សាទុកមិនបានត្រឹមត្រូវ បណ្តាលឲ្យសារធាតុនេះហូរចូលទឹកទន្លេព្រែកតេ។
លោក ចម ប្រសិទ្ធ បានគូសបញ្ជាក់ថា ទឹកទន្លេព្រែកតេ មានសារធាតុ«ត្យានីត»ខ្ពស់បណ្តាលឲ្យពុលស្លាប់មនុស្សតែម្តង។ លើសពីនេះទៀត លោកថា សារធាតុនេះបានហូរចូលមកដល់ទន្លេមេគង្គផងដែរ តែដោយសារតែទឹកទន្លេមេគង្គច្រើន អាចបន្សាបសារធាតុពុលនេះបានខ្លះ ទើបមិនពុលដល់អ្នកប្រើប្រាស់។
ការបញ្ជាក់របស់ក្រសួងឧស្សាហកម្ម និង សិប្បកម្ម នៅពេលនេះ គឺបន្ទាប់ពីក្រសួងសុខាភិបាលអះអាងថា ពលរដ្ឋដែលពុលស្លាប់នៅខេត្តក្រចេះគឺមកពីពុលស្រាដែលមានជាតិមេតាណុលខ្ពស់ ហើយអ្នកដែលពុលដែរតែមិនទាន់ស្លាប់គឺមកពីពុលទឹកទន្លេព្រែតេ។
បើតាម លោក ចម ប្រសិទ្ធ ការធ្វើអាជីវកម្មរ៉ែមាស ដោយប្រើប្រាស់សារធាតុ«ត្យានីត» បណ្តាលឲ្យពុលដល់ប្រជាជននេះ លោកសង្ស័យថា ជាការធ្វើអាជីវកម្មរ៉ែដោយខុសច្បាប់។
បើតាមមន្រ្តីសុខាភិបាល យ៉ាងហោចណាស់ មនុស្សចំនួន១៣នាក់ បានស្លាប់ និងជិត២០០នាក់ទៀត បានពុលនៅស្រុកចិត្របុរី ខេត្តក្រចេះ តាំងពីដើមខែឧសភាមកនេះ ដែលត្រូវបានបញ្ជូនទៅសង្រ្គោះបន្ទាន់ នៅមន្ទីរពេទ្យខេត្ត និងអ្នកពុលធ្ងន់ធ្ងរត្រូវបញ្ជូនមកកាន់ពេទ្យកាល់ម៉ែត្រ ក្នុងក្រុងភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ