សង្គមស៊ីវិល ចង់ឲ្យមានតម្លាភាពក្នុងការទប់ស្កាត់សកម្មភាពនយោបាយនៅគ្រឹះស្ថានសិក្សា
ជាថ្មីម្តងក្រសួងអប់រំយុវជន និងកីឡា បានចេញសេចក្តីជូនដំណឹងស្តីពីការទប់ស្កាត់ សកម្មភាពរៀបចំវេទិកា ការចែកចាយសម្ភារៈ សម្លៀកបំពាក់ ឬវត្ថុផ្សេងៗដែល បម្រើឲ្យសកម្មភាពនយោបាយ ឬឃោសនានយោបាយ នៅតាមគ្រឹះស្ថានអប់រំ ទាំងរដ្ឋនិងឯកជន។ យ៉ាងណាក៏ដោយ ប្រធានស្តីទីសមាគមគ្រូបង្រៀនកម្ពុជាឯករាជ្យ មើលឃើញថា វិធានការនេះមិនមានតម្លាភាពនោះទេ ព្រោះថា កន្លងមក មានតែសកម្មជនគណបក្សគណបក្សអំណាចតែប៉ុណ្ណោះ ដែលតែងតែធ្វើការឃោសនា តាមបណ្តាគ្រឹះស្ថានសិក្សា ចំណែកអ្នកដែលមិនគាំទ្រគណបក្សកាន់អំណាចនឹងត្រូវបានលាបពណ៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ការដាក់ចេញវិធានការណ៍របស់ក្រសួងអប់រំ នៅពេលនេះ គឺដើម្បីឆ្លើយតបនឹងស្ថានភាពនាពេលបច្ចុប្បន្ន និងពេលខាងមុខ ដែលគណបក្សនយោបាយ ត្រូវការឃោសនា និងផ្សព្វផ្សាយកម្មវិធីនយោបាយ។
នៅក្នុងលិខិត ចុះថ្ងៃទី ២៩ ខែមិថុនា ក្រសួងអប់រំ ចាត់ទុកថា សកម្មភាពនយោបាយ ដែលជ្រៀតចូលទៅក្នុងគ្រឹះស្ថានសិក្សា ឬអង្គភាពនានា គឺផ្ទុយនឹងច្បាប់ស្តីពីការអប់រំ និងច្បាប់ស្តីពីសហលក្ខន្តិកៈមន្រ្តីរាជការស៊ីវិល។
ជុំវិញវិធានការនេះ លោកស្រី អ៊ុក ឆាយ៉ាវី ប្រធានស្តីទីសមាគមគ្រូបង្រៀនកម្ពុជាឯករាជ្យ បញ្ជាក់ថា សមាគមនឹងគាំទ្រនិងសាទរ បើសិនជាក្រសួងអប់រំយុវជន និងកីឡា មិនពាក់ព័ន្ធនឹងគណបក្សកាន់អំណាច មិនពាក់ព័ន្ធនឹងនយោបាយនោះ។
ប្រធានស្តីទីសមាគមគ្រូបង្រៀនកម្ពុជាឯករាជ្យ បានសង្កត់ធ្ងន់ ថាកន្លងមកមាន សកម្មជនគណបក្សប្រជាជនកម្ពុជា តែងតែផ្សព្វផ្សាយគោលនយោបាយរបស់ខ្លួន នៅតាមបណា្តគ្រឹះស្ថានអប់រំ ប៉ុន្តែមិនមានចំណាត់ការណាមួយនោះទេ។
ដោយឡែក លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា បានរៀបរាប់ថា បើមើលទៅលើទិដ្ឋភាពជារួម សកម្មភាពនយោបាយចែកជាពីរ សកម្មភាព ដែលគណបក្សនយោបាយណាមួយ ព្យាយាមឃោសនាពីសមិទ្ធិផលឬគោលនយោបាយ ដើម្បីទាក់ទាញការគាំទ្រ។ សកម្មភាពបែបនយោបាយនេះ ត្រូវបាន លោក សន ជ័យ ចាត់ទុកថា មិនគួរត្រូវបានអនុញ្ញាតនៅក្នុងគ្រឹះស្ថានសិក្សានោះទេ។ ក៏ប៉ុន្តែសម្រាប់ការជជែកពិភាក្សា ពីចំណុចខ្វះខាតនៃការអនុវត្តគោលនយោបាយរបស់ថ្នាក់ដឹកនាំ ឬអភិបាលកិច្ច ដែលទាក់ទងនឹងជីវភាពរស់នៅរបស់ពលរដ្ឋប្រចាំថ្ងៃនោះ គួរតែត្រូវបានលើកទឹកចិត្ត។
យ៉ាងណាក៏ដោយ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា មិនបានបង្ហាញសុទិដ្ឋិនិយមចំពោះវិធានការរបស់ក្រសួងអប់រំនោះទេ។ លោក បញ្ជាក់ថា ក្រសួងអប់រំ ហាក់មិនបានកំណត់ខ្លឹមសារសកម្មភាពនយោបាយ ឲ្យបានច្បាស់លាស់ ថាតើសកម្មភាពអ្វីខ្លះដែលត្រូវបានហាមឃាត់នោះទេ។
ជាការកត់សម្គាល់ ការចេញវិធានការទប់ស្កាត់ការធ្វើសកម្មភាពនយោបាយ ឬឃោសនា នយោបាយនៅក្នុងស្ថាប័នអប់រំ រដ្ឋនិងឯកជន នៅខណៈពេលនេះ គឺនៅចំពេលដែល កម្តៅនយោបាយនៅកម្ពុជា ត្រូវបានគេមើលឃើញថា កំពុងតែឡើងកម្តៅខ្លាំងរវាងគណបក្សកាន់អំណាច និងគណបក្សប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ