លោក សម រង្ស៊ី ស្វាគមន៍ការយាងត្រលប់របស់សម្តេចក្រុមព្រះ មកដឹកនាំហ្វ៊ុនស៊ិនប៉ិច
លោក សម រង្ស៊ី ប្រធានគណបក្សសង្គ្រោះជាតិ បានធ្វើដំណើរមកដល់ប្រទេសកម្ពុជាវិញហើយ នៅព្រឹកថ្ងៃអាទិត្យនេះ បន្ទាប់ពីបានទៅបំពេញទស្សនកិច្ចនៅអឺរ៉ុប រយៈពេលជិត២សប្តាហ៍។ នៅឯព្រលានយន្តហោះអន្តរជាតិភ្នំពេញ លោក សម រង្ស៊ី បានធ្វើសន្និសីទកាសែតខ្លីមួយដោយផ្តោតទៅលើបញ្ហាមួយចំនួន ពិសេសលើករណីយាងត្រលប់របស់សម្តេចក្រុមព្រះ នរោត្តម រណឬទ្ធិ មកដឹកនាំគណបក្សហ្វ៊ុនស៊ិនប៉ិចឡើងវិញ។
ចុះផ្សាយនៅថ្ងៃ៖
ស្តាប់ - ០២:០៣
លោក សម រង្ស៊ី មិនបារម្ភទេថា វត្តមានរបស់សម្តេចក្រុមព្រះ នរោត្តម រណឬទ្ធិ ក្នុងវិស័យនយោបាយ ដោយវិលទៅដឹកនាំគណបក្សហ្វ៊ុនស៊ិនប៉ិចចាស់របស់ព្រះអង្គនោះ នឹងធ្វើអោយប៉ះពាល់ដល់ប្រជាប្រិយភាពរបស់គណបក្សសង្គ្រោះជាតិនោះទេ។ ជាមួយនឹងការថ្លែងបែបនេះ លោក សម រង្ស៊ី ក៏បានប្រកាសស្វាគមន៍ និងបានចាត់ទុកថា វាជាសិទ្ធិសេរីភាពរបស់អ្នកនយោបាយគ្រប់រូប។ ប៉ុន្តែលោក សម រង្ស៊ី បានទុកលទ្ធភាពនៃការសម្រេចចិត្តនេះ ជូនដល់ប្រជាពលរដ្ឋខ្មែរក្នុងការបោះឆ្នោតគាំទ្រ។
សម្តេចក្រុមព្រះ នរោត្តម រណឬទ្ធិ បានសម្រេចព្រះទ័យយាងទៅដឹកនាំគណបក្សរាជានិយមហ្វ៊ុនស៊ិនប៉ិចឡើងវិញ ក្រោយពីមានការយាងពីព្រះអនុជ នរោត្តម អរុណរស្មី និងលោក ញឹក ប៊ុនឆៃ កាលពីថ្ងៃទី១ខែមករាឆ្នាំ២០១៥។ វត្តមានរបស់សម្តេចក្រុមព្រះ នរោត្តម រណឬទ្ធិ នៅក្នុងគណបក្សហ្វ៊ុនស៊ិនប៉ិច ត្រូវបានអ្នកវិភាគមើលឃើញថា នឹងធ្វើអោយម្ចាស់ឆ្នោតពិបាកក្នុងការសម្រេចចិត្តបោះឆ្នោតគាំទ្រនៅឆ្នាំ២០១៨ខាងមុខ។ ប៉ុន្តែ បើតាមលោក សម រង្ស៊ី ប្រជាពលរដ្ឋខ្មែរនៅតែជឿទុកចិត្តថា មានតែគណបក្សសង្គ្រោះជាតិតែមួយប៉ុណ្ណោះ ដែលអាចដឹកនាំអោយមានការផ្លាស់ប្តូរនៅក្នុងប្រទេសកម្ពុជាបាន។
ការថ្លែងរបស់លោក សម រង្ស៊ី នេះ បានធ្វើឡើង ខណៈដែលលោកបានធ្វើដំណើរវិលត្រលប់មកពីបំពេញទស្សនកិច្ចនៅអឺរ៉ុបកាលពីព្រឹកថ្ងៃអាទិត្យ។ ទាំងលោក សម រង្ស៊ី និងទាំង លោក កឹម សុខា សុទ្ធតែជាអតីតមន្ត្រីរបស់គណបក្សហ្វ៊ុនស៊ិនប៉ិច។ លោក សម រង្ស៊ី ដែលធ្លាប់ធ្វើជារដ្ឋមន្ត្រីក្រសួងសេដ្ឋកិច្ចឆ្នាំ១៩៩៣ ខណៈដែលលោក កឹម សុខា ធ្លាប់ជាសមាជិករដ្ឋសភារបស់គណបក្សរាជានិយមហ្វ៊ុនស៊ិនប៉ិចនេះ។
ក្រៅពីករណីរបស់សម្តេចក្រុមព្រះ នរោត្តម រណឬទ្ធិ លោក សម រង្ស៊ី ក៏បានលើកឡើងពីលទ្ធផលនៃដំណើរទស្សនកិច្ចរយៈពេលជិតពីរសប្តាហ៍នៅទ្វីបអឺរ៉ុបផងដែរ។ បើតាមលោក សម រង្ស៊ី ប្រជាពលរដ្ឋនៅឯនាយសមុទ្រនៅតែបន្តគាំទ្រ និងជឿជាក់មកលើគណបក្សសង្គ្រោះជាតិដដែល។ ចំណែកឯករណីរបស់អ្នកស្រី ឡាក់ សុភាព ដែលត្រូវបានគណបក្សសម្រេចបណ្តេញចេញពីបក្សនោះ ត្រូវបានលោកសម រង្ស៊ី បញ្ជាក់ថា លោកមិនចាប់អារម្មណ៍នោះទេ។ លោកចាប់អារម្មណ៍តែលើអ្វីដែលជាការពិត និងមានប្រយោជន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ