លោក សម រង្ស៊ី មេបក្សសង្គ្រោះជាតិភៀសខ្លួន ដោយស្ពាយបណ្តឹងបរិហាកេរ្តិ៍រួមរឹតកាយ
ម្សិលមិញ មានដីកាកោះហៅ លោកសម រង្ស៊ី អោយចូលទៅ ជំនុំជម្រះផ្ទាល់ ជុំវិញការចោទប្រកាន់ពី បទបរិហាកេរ្តិ៍។ នេះជា សំណុំក្តីក្តាំ តាមផ្លូវតុលាការថ្មីមួយទៀត ទៅលើលោក សម រង្ស៊ី ប្រធានគណបក្សសង្រ្គោះជាតិ ដែលកំពុងនិរទេសខ្លួន នៅក្រៅប្រទេស។ ស្រី សុភក្រ្ត័ សូមឆ្លៀតឱកាសនេះ រំលឹកឡើងវិញ នូវសំណុំរឿង តាមផ្លូវតុលាការ ដែលកំពុងរួមរឹត ប្រធានគណបក្សសង្គ្រោះជាតិរូបនេះ តែមិនទាន់បានបញ្ចប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
គិតត្រឹមខែកក្កដា នេះ លោក សោម សឿន ជាមន្រ្តីរដ្ឋាភិបាលកម្ពុជា ទី៤ ហើយ ដែលបានចោទប្រកាន់លោក សម រង្ស៊ី លើបទបរិហាកេរ្តិ៍ជាសាធារណៈ ខណៈប្រមុខបក្សសង្រ្គោះជាតិ កំពុងរស់និរទេសខ្លួនឯក្រៅប្រទេស។
ដីកា អយ្យការអមសាលាដំបូង ចុះថ្ងៃទី៨ កក្កដា ២០១៦ សន្និដ្ឋានថា លោក សម រង្ស៊ី ពាក់ព័ន្ធនឹងបណ្តឹង បរិហារកេរ្តិ៍ជាសាធារណៈ តាមមាត្រា ៣០៥ ក្រមព្រហ្មទណ្ឌ ដែលប្រព្រឹត្តិនៅ ភ្នំពេញ កាលពីថ្ងៃទី៩ មីនា ២០១៦។ អង្គហេតុ ផ្តើមពី អត្ថបទបង្ហោះលើហ្វេសប៊ុក ឈ្មោះ សម រង្ស៊ី រៀបរាប់ថា ឈ្មោះ សោម សឿន ទីប្រឹក្សាលោកនាយករដ្ឋមន្ត្រី ហ៊ុន សែន បានណែនាំដល់ មន្រ្តីរបស់ខ្លួន បង្កើតគណនីយក្លែងក្លាយ ក្នុងគោលបំណង ផ្តល់ការ LIKE សិប្បនិមិត្ត ដល់ទំព័រហ្វេសប៊ុក របស់លោកនាយករដ្ឋមន្រ្តីហ៊ុន សែន។ អយ្យការអមសាលាដំបូង រាជធានីភ្នំពេញ បានចេញ ដីកាកោះហៅ ប្រធានបក្សសង្រ្គោះជាតិ មកជំនុំជម្រះផ្ទាល់ នៅថ្ងៃទី១៧ តុលា ២០១៦។
បណ្តឹងមួយផ្សេងទៀត នៅថ្ងៃទី២ ធ្នូ ២០១៥ សាលាដំបូងរាជធានីភ្នំពេញ បានចេញដីកា កោះហៅ លោក សម រង្ស៊ី អោយចូលខ្លួនសាកសួរករណី បណ្តឹងបរិហាកេរ្តិ៍ លោក ហេង សំរិន ប្រធានរដ្ឋសភា។ ដើមហេតុនៃបណ្តឹងគឺ ដោយសារ វិដេអូឃ្លីបមួយរបស់លោក សម រង្ស៊ី នាថ្ងៃទី១៧ វិច្ឆិកា ២០១៥ អត្ថាធិប្បាយថា របបកុម្មុយនីស្តនាទសវត្សរ៍ឆ្នាំ១៩៨០ បានកាត់ទោសប្រហារជីវិតព្រះមហាក្សត្រ នរោត្តម សីហនុ នៅពេលដែលគេដឹងឮថា លោក ហេង សំរិន គឺជាប្រធានក្រុមប្រឹក្សារដ្ឋក្នុងរបបនោះ។ សាលាដំបូងរាជធានីភ្នំពេញនឹងបើកសវនាការជំនុំជម្រះផ្ទាល់លើលោក សម រង្ស៊ី ពាក់ព័ន្ធនឹងបទបរិហារកេរ្តិ៍លោក ហេង សំរិន នៅថ្ងៃទី ២៨ ខែកក្កដាឆ្នាំ ២០១៦ ខាងមុខនេះ។
សាលាដំបូងរាជធានីភ្នំពេញដដែល ថ្ងៃទី១៣ វិច្ឆិកា ២០១៥ បានចេញដីកាចាប់ខ្លួន លោក សម រង្ស៊ី ប្រធានគណបក្សសង្រ្គោះជាតិ ទាក់ទងនឹង សំណុំរឿង បរិហារកេរ្តិ៍ជាសាធារណៈ និងញុះញង់អោយមានការរើសអើង លើរូប លោក ហោ ណាំហុង អតីតរដ្ឋមន្រ្តីក្រសួងការបរទេស។ បណ្តឹងធ្វើឡើងតាំងពីឆ្នាំ២០០៨ ដែលមិនសុខចិត្តនឹង សុន្ទរកថាមេបក្សប្រឆាំង កាលខែមេសា ឆ្នាំនោះ ថ្លែងនៅ មជ្ឈមណ្ឌល ប្រល័យពូជសាសន៍ជើងឯក ភ្ជាប់មន្រ្តីរដ្ឋាភិបាលកម្ពុជា ទៅក្នុងរឿងគុកបឹងត្របែកសម័យខ្មែរក្រហម។ សាលក្រមដែលមិនទាន់បានអនុវត្តតាំងពីឆ្នាំ២០១១នេះ ជាដើមហេតុជម្រុញអោយ លោក សម រង្ស៊ី ភៀសខ្លួនទៅបរទេសដើម្បីគេចពីការចាប់ខ្លួន រហូតមកដល់បច្ចុប្បន្ន។
សំណុំរឿងផ្សេងទៀត ដែលមិនទាន់បញ្ចប់នៅឡើយ គឺតុលាការបានចោទ លោក សម រង្ស៊ី ពីបទសមគំនិតក្នុងអំពើក្លែងបន្លំឯកសារសាធារណៈ ប្រើប្រាស់ឯកសារក្លែង និងញុះញង់បង្កអោយមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តិទៅនៅថ្ងៃទី១២ និង ១៣ សីហា ២០១៥ ទាក់ទងនឹង ការក្លែងសន្ធិសញ្ញាព្រំដែនកម្ពុជា វៀតណាម។ កាលពីថ្ងៃទី ២០ ខែវិច្ឆិកា ឆ្នាំ ២០១៥ ចៅក្រមស៊ើបសួរសាលាដំបូងរាជធានីភ្នំពេញ បានចេញដីកាបង្គាប់ឲ្យលោក សម រង្ស៊ី ចូលខ្លួនមកតុលាការពាក់ព័ន្ធនឹងសំណុំរឿងសមគំនិតក្នុងអំពើក្លែងបន្លំ និងប្រើប្រាស់ឯកសារសាធារណៈក្លែងរួចយកទៅបង្ហោះក្នុងបណ្ដាញសង្គមហ្វេសប៊ុក។ រឿងក្តីនេះចៅក្រមស៊ើបសួរ បានបញ្ជូនសំណុំរឿងឱ្យព្រះរាជអាជ្ញា ដើម្បីសន្និដ្ឋានជាស្ថាពរថា គួរចោទប្រកាន់ ឬទម្លាក់ចោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ