អ្នកការទូត៧ប្រទេសនៃសហភាពអឺរ៉ុបបញ្ចប់ដំណើរទស្សនកិច្ចស្វែងយល់ពីបញ្ហាប្រឈមនៅខេត្តកោះកុង
សមាជិកអ្នកការទូត៧ប្រទេសនៃសហភាពអឺរ៉ុប បានបញ្ចប់ដំណើរទស្សនកិច្ចរយៈពេល៤ថ្ងៃ ទៅកាន់ខេត្តកោះកុងនៅថ្ងៃព្រហស្បតិ៍នេះ។ ដំណើរទស្សនកិច្ចនេះ គឺដើម្បីស្វែងយល់ពីបញ្ហាប្រឈមនានានៅខេត្តកោះកុង រួមមានបញ្ហា សិទ្ធិមនុស្ស ការធ្វើចំណាកស្រុក និងបញ្ហាជម្លោះដីធ្លីជាដើម។ នេះគឺជាដំណើរទស្សនកិច្ចលើកទី៣ក្នុងរយៈពេលតែមួយខែ របស់អ្នកកាទូតអន្តរជាតិ និងអ្នកជំនាញសិទ្ធិមនុសអង្គការសហប្រជាជាតិលោកស្រី រ៉ូណាស្មីត ទៅកាន់ខេត្តភាគខាងលិចនៃទីក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០២:២៥
នៅថ្ងៃចុងក្រោយនៃដំណើរទស្សនកិច្ចរបស់សមាជិកអ្នកការទូតទាំង៧ប្រទេសនៃសហភាពអឺរ៉ុបនាថ្ងៃព្រហស្បតិ៍ទី១ខែតុលានេះ ពួកគេបានធ្វើដំណើរទៅដល់ឃុំឬស្សីជ្រុំ ស្រុកថ្មបាំង ខេត្តកោះកុង។ នៅទីនោះសមាជិកអ្នកការទូតទាំង៧ប្រទេស រួមមាន ប្រទេសបែលហ្ស៊ិក សាធារណរដ្ឋឆែក, អាល្លឺម៉ង់, ហ្វាំងឡង់ បារាំង ហូឡង់ និងប្រទេសស៊ុយអែត បានជួបសំណេះសំណាលជាមួយតំណាងយុវជននិងប្រជាពលរដ្ឋនៅក្នុងតំបន់អារ៉ែង ជាទីដែលធ្លាប់មានការប្រឆាំងយ៉ាងខ្លាំងខ្លា ទៅនឹងគម្រោងសាងសង់ទំនប់វារីអគ្គីសនីស្ទឹងជាយអារ៉ែង រហូតដល់រដ្ឋាភិបាលកម្ពុជាបានសម្រេចលុបចោលទៅវិញ និងរហូតដល់មានការបណ្តេញប្រធានអង្គការចលនាមាតាធម្មជាតិលោក អាឡិចហ្សង់ដ្រូ ហ្គន់ហ្សាឡេស ដេវិតសុន (Alejandro Gonzalez-Davidson) ជនជាតិអេស្បាញចេញពីប្រទេសកម្ពុជាយ៉ាងចម្រូងចម្រាស់ កាលពីអំឡុងខែកុម្ភៈ ឆ្នាំ២០១៥កន្លងទៅ។
បើតាមលោក អ៊ីន គង់ចិត្រ មន្រ្តីសិទ្ធិមនុស្សលីកាដូប្រចាំនៅខេត្តកោះកុង បានថ្លែងថា នៅទីនោះ សមាជិកអ្នកកាទូតទាំង៧ប្រទេស បានស្តាប់ពីស្ថានភាពរស់នៅរបស់ប្រជាពលរដ្ឋនៅតំបន់អារ៉ែង និងការវិវត្តនៅក្នុងតំបន់នោះ ព្រមទាំងកង្វល់របស់ប្រជាពលរដ្ឋលើការសាងសង់ទំនប់វារីអគ្គិសនីស្ទឹងជាយអារ៉ែងផង។
សូមបញ្ជាក់ថា សមាជិកអ្នកការទូតទាំង៧ប្រទេសនៃសហភាពអឺរ៉ុបនេះ បានទៅដល់ខេត្តកោះកុងកាលពីថ្ងៃទី២៨ខែកញ្ញា ដោយបានជួបប្រជុំជាមួយអភិបាលខេត្ត អាជ្ញាធរខេត្ត អាជ្ញាធរមូលដ្ឋាន អង្គការមិនមែនរដ្ឋាភិបាល សហគមន៍មូលដ្ឋាន ព្រមទាំងបានទៅទស្សនកិច្ច នៅពន្ធនាគារខេត្តកោះកុង ដែលជាកន្លែងសហភាពអឺរ៉ុបបានផ្តល់មូលនិធិដល់បណ្ណាល័យ សម្រាប់អ្នកជាប់ឃុំក្នុងពន្ធនាគារផងដែរ។ បេសកកម្មនេះ គឺដើម្បីស្វែងយល់ពីបញ្ហាប្រឈមសំខាន់ៗនៅក្នុងខេត្តភាគខាងលិចនៃទីក្រុងភ្នំពេញនេះ ដូចជា បញ្ហាសិទ្ធិមនុស្ស ការធ្វើចំណាកស្រុក បញ្ហាយេនឌ័រ បញ្ហាជនជាតិដើមភាគតិច និងសហគមន៍ដែលរងផលប៉ះពាល់ពីបញ្ហាដីធ្លី វារីអគ្គិសនី និងការចិញ្ចឹមជីវិតនៅតំបន់ជនបទជាដើម។ គណៈប្រតិភូនេះមានសមាសភាព ចូលរួមពីសមាជិកអ្នកការទូតដែលមានមូលដ្ឋាននៅក្នុងទីក្រុងភ្នំពេញ និងនៅទីក្រុងបាងកកប្រទេសថៃផង។
ប៉ុន្តែ បើតាមលោក អ៊ីន គង់ចិត្រ សមាជិកគណៈប្រតិភូនេះ មិនបានស្នើសុំទៅកាន់អាជ្ញាធរកម្ពុជា ឲ្យមានការដោះលែងសមាជិកអង្គការចលនាមាតាធម្មជាតិបីនាក់ ដែលត្រូវបានអាជ្ញាធរខេត្តកោះកុងចាប់ខ្លួន កាលពីថ្ងៃទី១៧សីហាកន្លងទៅនោះទេ។
នេះគឺជាគណៈប្រតិភូទី៣ហើយ ត្រឹមតែរយៈពេល១ខែប៉ុណ្ណោះ ដែលអ្នកកាទូតបរទេសបានទៅទស្សនកិច្ចនៅខេត្តកោះកុង បន្ទាប់ពីដំណើរទស្សនកិច្ចរបស់ភារៈធារីស្ថានទូតអាមេរិកកាលពីដើមខែកញ្ញា និងដំណើរទស្សនកិច្ចរបស់លោកស្រី រ៉ូ ណាស្មីត អ្នករាយការណ៍ពិសេសអង្គការសហប្រជាជាតិទទួលបន្ទុកខាងសិទ្ធិមនុស្សប្រចាំនៅកម្ពុជាកាលពីថ្ងៃទី១៨ខែកញ្ញាឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ