លោក សុខ ឥសាន ថាលោក សម រង្ស៊ី បំផ្លាញគណបក្សប្រឆាំង
មន្រ្តីជាន់ខ្ពស់គណបក្សកាន់អំណាចបានអះអាងថា លោក សម រង្ស៊ី អតីតប្រធានគណបក្សសង្រ្គោះជាតិ កំពុងតែបំផ្លាញគណបក្សប្រឆាំង ដោយថាលោក សម រង្ស៊ី បានចុះហត្ថលេខានៅលើលិខិតរួមមួយ កាលពីម្សិលមិញ ជាមួយតំណាងរាស្ត្រជាង៤០រួបផ្សេងទៀត។ គឺជាលិខិតដែលក្រុមតំណាងរាស្ត្រគណបក្សប្រឆាំងប្តេជ្ញាចិត្ត មិនចាកចេញពីគណបក្សនេះ។ ប៉ុន្តែលោក សម រង្ស៊ី បានឆ្លើយតបថា លោកមិនខ្វល់នឹង”ច្បាប់ឡប់ឡែ”ដែលធ្វើឡើងដោយគណបក្សកាន់អំណាចនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
អត្ថបទដោយ៖ អ៊ឹង ប៊ុនថន
លោក សុខ ឥសាន អ្នកនាំគណបក្សប្រជាជនកម្ពុជា បានចាត់ទុក ការចុះហត្ថលេខា របស់ សម រង្ស៊ី គឺជាការល្មើសនឹងច្បាប់ស្តីពីគណបក្សនយោបាយ ត្រង់មាត្រា៦ ថ្មី ពីរ។ ច្បាប់គណបក្សនយោបាយដែលត្រូវបានធ្វើវិសោធនកម្មតាមសំណើរបស់លោក ហ៊ុន សែន គឺបានហាមមិនឲ្យគណបក្សនយោបាយមានពាក់ព័ន្ធនឹងទណ្ឌិត ទាំង សំឡេង រូបភាព ឬសកម្មភាពផ្សេងទៀតដែលទាក់ទងនឹងគណបក្សនយោបាយ។
លោក សុខ ឥសាន អះអាងថា ការចុះហត្ថលេខារបស់លោក សម រង្ស៊ី គឺលោក សម រង្ស៊ី ជាអ្នកបំផ្លាញគណបក្សសង្គ្រោះជាតិដោយផ្ទាល់ដោយមិនអាចប្រកែកបាន។ អ្នកនាំពាក្យបក្សកាន់អំណាចរូបនេះ បន្ថែមថា ការចុះហត្ថលេខារបស់លោក សម រង្ស៊ី គឺជាទឡ្ហីករណ៏សម្រាប់តុលាការមានភ័ស្តុតាងបន្ថែមទៀតសម្រាប់ដាក់បន្ទុកលើគណបក្សសង្គ្រោះដែលត្រូវប្រឈមមុខចំពោះច្បាប់ស្តីពីគណបក្សនយោបាយ។
ប៉ុន្តែជាការឆ្លើយតាមរយៈអ៊ីម៉ែល មកកាន់វិទ្យុបារាំងអន្តរជាតិ លោក សម រង្ស៊ី អះអាងថា លោកមិនខ្វល់នឹង “ច្បាប់ឡប់ឡែ” ដែលធ្វើឡើងដោយគណបក្សកាន់អំណាចដើម្បីប្រឆាំងនឹងរូបលោក និងគណបក្សសង្រ្គោះជាតិនេះទេ។
សូមជម្រាបថា កាលពីថ្ងៃទី៨វិច្ឆិកា តំណាងរាស្ត្របក្សសង្រ្គោះជាតិចំនួន៤៣រូប បានចេញសេចក្ដីថ្លែងការណ៍មួយ ដោយប្ដេជ្ញារក្សានិងការពាររចនាសម្ព័ន្ធបក្ស ខណៈដែលគណបក្សសង្គ្រោះជាតិត្រូវរងការ គំរាមរំលាយចោលជារៀងរាល់ថ្ងៃ។ នៅក្នុងសេចក្ដីថ្លែងការណ៍ដដែលនេះ តំណាងរាស្ត្របក្សប្រឆាំង ក៏ទាមទារឲ្យរដ្ឋអំណាចដោះលែង លោក កឹម សុខា ដែលជាប្រធានបក្ស ព្រមទាំងអ្នកនយោបាយដទៃទៀតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ