លោក ស ខេង ចាត់តំណាងឲ្យជួបជាមួយតំណាងគណបក្សសង្គ្រោះជាតិ
នៅទីបំផុតលោក ស ខេង រដ្ឋមន្ត្រីក្រសួងមហាផ្ទៃនៅថ្ងៃទី២៤មីនានេះ បានចាត់តំណាងរបស់ខ្លួនដើម្បីជួបជាមួយតំណាងគណបក្សសង្គ្រោះជាតិ នៅថ្ងៃទី២៩មិនាខាងមុខ។ ជំនួបនេះនឹងធ្វើឡើងជាលក្ខណៈបច្ចេក ដែលគ្រោងពិភាក្សាទៅលើលក្ខន្តិកៈរបស់គណបក្សសង្គ្រោះជាតិ ដែលបានជ្រើសរើសក្បាលម៉ាស៊ីនគណបក្សដោយមាន ប្រធាន ១រូប និងអនុប្រធាន ៣រូប ដែលចំណុចនេះត្រូវក្រសួងមហាផ្ទៃចាត់ទុកថា ផ្ទុយពីលក្ខន្តិកៈដែលបានតម្កល់ទុកនៅក្រសួងមហាផ្ទៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
មន្ត្រីបច្ចេកទេសដែលលោក ស ខេង ចាត់ឲ្យទៅជួបជាមួយតំណាងគណបក្សសង្គ្រោះជាតិនៅថ្ងៃទី២៩មិនានោះ គឺលោក ប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាលនៃក្រសួងមហាផ្ទៃរួមនឹងមន្ត្រីជំនាញផ្សេងទៀត។ មុនចាត់តំណាងរបស់ខ្លួនឲ្យទៅជួបជាមួយតំណាងគណបក្សសង្គ្រោះជាតិនេះលោក ស ខេងរដ្ឋមន្ត្រីក្រសួងមហាផ្ទៃ បានបដិសេធសំណើរសុំជួបរបស់គណបក្សសង្គ្រោះជាតិក្នុងលក្ខខណ្ឌនយោបាយ។
ការបដិសេធរបស់រដ្ឋមន្ត្រីក្រសួងមហាផ្ទៃនេះ គឺធ្វើឡើងក្នុងលិខិតឆ្លើយតបទៅកាន់លោក យឹម សុវណ្ណ ប្រធានគណៈកម្មាធិការប្រតិបត្តគណបក្ស ដែលបានសរសេរលិខិតកាលពីថ្ងៃម្សិលមិញស្នើសុំចាត់អ្នកតំណាងបក្សចំនួន ៥រូបជួបលោក ស ខេង ឬតំណាងក្រសួងពិភាក្សាដើម្បីស្វែងរកដំណោះស្រាយសមស្រប។ ជាការដោះស្រាយលើការអនុវត្តផ្ទុយពីលក្ខន្តិកៈរបស់គណបក្សសង្គ្រោះជាតិដែលបានជ្រើសរើសក្បាលម៉ាស៊ីនគណបក្ស ប្រធាន ១រូប និងអនុប្រធាន ៣រូបដែលក្រសួងមហាផ្ទៃចាត់ទុកថា ផ្ទុយពីលក្ខន្តិកៈដែលបានតម្កល់ទុកនៅក្រសួងមហាផ្ទៃ។
សូមរំលឹកថា គណបក្សសង្គ្រោះជាតិកាលពីថ្ងៃទី ០២ មីនាកន្លងទៅបានធ្វើសមាជវិសាមញ្ញផ្លាស់ប្តូរលក្ខន្តិកៈគណបក្ស និងជ្រើសរើសក្បាលម៉ាស៊ីនថ្មីដើម្បីជំនួសលោកសម រង្ស៊ីដែលបានលាលែង។ ក្នុងនោះគឺលោកកឹម សុខា គឺជាប្រធាន និងអនុប្រធានបីរូបផ្សេងទៀត។ ប៉ុន្តែការកែប្រែលក្ខន្តិកៈថ្មី និងជ្រើសរើសក្បាលម៉ាស៊ីនថ្មីក្នុងថ្ងៃតែមួយនេះ គឺបានផ្ទុយទៅតាមលក្ខន្តិកៈដែលបានតម្កល់ទុកស្របច្បាប់នៅក្រសួងមហាផ្ទៃ។
ត្រង់ចំណុចនេះ អ្នកនាំពាក្យក្រសួងមហាផ្ទៃ សង្កត់ធ្ងន់ថា គណបក្សប្រឆាំងត្រូវធ្វើសំណើរមកកាន់ក្រសួងមហាផ្ទៃឱ្យទទួលស្គាល់លក្ខន្តិកៈថ្មី សិន ទើបគណបក្សអាចជ្រើសរើសក្បាលម៉ាស៊ីនថ្មីដែលមានប្រធាន ១រូប និងអនុប្រធាន ៣រូបដូចបច្ចុប្បន្នបាន។ បន្ថែមពីនេះ ក្រសួងមហាផ្ទៃ បានស្នើសុំឱ្យគណបក្សសង្គ្រោះជាតិកែសម្រួលឡើងវិញ មុននឹងក្រសួងមហាផ្ទៃអាចផ្តល់សុពលភាពដល់ក្បាលម៉ាស៊ីនគណបក្សប្រឆាំងបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ