កម្ពុជាច្រានចោលការចោទប្រកាន់ថា បានខ្ទាស់ការចេញសេចក្តីថ្លែងការណ៍រួមរបស់អាស៊ាន
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានច្រានចោលចំពោះព័ត៌មាន ដែលបានចោទប្រកាន់ថា កម្ពុជាជាអ្នកខ្ទាស់ក្នុងការដាក់សាលក្រមតុលាការមជ្ឈត្តិកម្មអន្តរជាតិ ទៅក្នុងសេចក្តីថ្លែងការណ៍រួមរបស់អាស៊ាន។ បើតាមអ្នកនាំពាក្យរូបនេះ ហ្វីលីពីនខ្លួនឯងទេ ដែលបានស្នើឲ្យដក និងបានចាត់ទុកថា វាជារឿងទ្វេភាគីរវាងចិននិងហ្វីលីពីន។
ចុះផ្សាយនៅថ្ងៃ៖
ស្តាប់ - ០២:៤៣
“រដ្ឋមន្រ្តីការបរទេសហ្វីលីពីនខ្លួនឯងបានទទួលស្គាល់ថា បញ្ហាសមុទ្រចិនខាងត្បូង គឺជាជម្លោះរវាងចិន និងហ្វីលីពីន មិនមែនជាជម្លោះរវាងអាស៊ានជាមួយចិននោះឡើយ”។ នេះគឺជាការបំភ្លឺរបស់អ្នកនាំពាក្យក្រសួងការបរទេសកម្ពុជា ទៅនឹងប្រព័ន្ធផ្សព្វផ្សាយជាតិ និងអន្តរជាតិ ដែលបានចុះផ្សាយ ដោយចោទប្រកាន់ថា កម្ពុជាគឺជាអ្នកខ្ទាស់មិនឲ្យអាស៊ាន ចេញសេចក្តីថ្លែងការណ៍រួម ស្តីពី បញ្ហាសមុទ្រចិនខាងត្បូង។
ប៉ុន្តែ លោក ជុំ សុន្ទរី អ្នកនំាពាក្យក្រសួងការបរទេសកម្ពុជាបានប្រាប់ក្រុមអ្នកកាសែតនៅឯព្រលានយន្តហោះអន្តរជាតិភ្នំពេញ បន្ទាប់ពីបានអមដំណើររដ្ឋមន្រ្តីការបរទេសកម្ពុជា លោក ប្រាក់ សុខុន មកពីចូលរួមកិច្ចប្រជុំរដ្ឋមន្រ្តីការបរទេសអាស៊ានលើកទី៤៩ នៅប្រទេសឡាវ នារសៀលថ្ងៃទី២៧កក្កដានេះថា រដ្ឋមន្រ្តីហ្វីលីពីនខ្លួនឯងទេ ដែលជាអ្នកស្នើឲ្យដកសាលក្រមរបស់តុលាការមជ្ឈត្តិកម្មអចិន្រ្តៃយ៍អន្តរជាតិទីក្រុងឡាអេ ទៅលើបញ្ហាសមុទ្រចិនខាងត្បូង ចេញពីសេចក្តីការណ៍រួមរបស់អាស៊ាននេះ។ លោកបានលើកឡើងថា បញ្ហាសមុទ្រចិនខាងត្បូង គឺជាបញ្ហាទ្វេភាគី ពោលគឺមិនមែនជាបញ្ហារវាងចិននិងអាស៊ាននោះទេ។
គួរជម្រាបជូនថា ក្នុងរយៈពេលប៉ុន្មានថ្ងៃមកនេះ ប្រព័ន្ធផ្សព្វផ្សាយជាតិ និងអន្តរជាតិបានចុះផ្សាយតាំងពីថ្ងៃទី១នៃកិច្ចប្រជុំរដ្ឋមន្រ្តីការបរទេសអាស៊ានលើកទី៤៩ នៅទីក្រុងវៀងចន្ទប្រទេសឡាវថា កម្ពុជានិងឡាវ គឺជាអ្នកដើរតួនាទីសំខាន់ក្នុងការខ្ទាស់មិនឲ្យមានការចេញសេចក្តីថ្លែងការណ៍រួមរបស់អាស៊ាន។
លោក ជុំ សុន្ទរី ក៏បានច្រានចោលផងដែរ ចំពោះការចុះផ្សាយថា កម្ពុជាព្យាយាមមិនឲ្យមានការលើកឡើងពីជម្លោះសមុទ្រចិនខាងត្បូង នៅក្នុងកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធផ្សេងទៀត។ មិនតែប៉ុណ្ណោះ លោក ជុំ សុន្ទរី បានគូសបញ្ជាក់ថា នៅក្នុងកិច្ចប្រជុំរដ្ឋមន្រ្តីការបរទេសអាស៊ាន និងកិច្ចប្រជុំពាក់ព័ន្ធ លោកទេសរដ្ឋមន្រ្តី ប្រាក់ សុខុន តែងតែបានលើកឡើងពីបញ្ហាជម្លោះសមុទ្រចិនខាងត្បូង ដោយបានទាមទារឲ្យភាគីពាក់ព័ន្ធទាំងអស់ រួមគ្នាកាត់បន្ថយកម្តៅដែលកំពុងតែកើនឡើងស្រាប់ទៅហើយ បន្ទាប់ពីសេចក្តីសម្រេចរបស់តុលាការមជ្ឈត្តិកម្មអន្តរជាតិកាលពីថ្ងៃទី១២កក្កដាឆ្នាំ២០១៦។
យ៉ាងណាក៏ដោយ នៅក្នុងកិច្ចប្រជុំរដ្ឋមន្រ្តីការបរទេសអាស៊ានលើកទី៤៩នេះ កម្ពុជាបានបញ្ជាក់ជំហរជាថ្មីថា កម្ពុជានឹងមិនលូកដៃ ឬគាំទ្រលើភាគីណាមួយនោះទេ និងបានអំពាវនាវឲ្យភាគីពាក់ព័ន្ធទាំងអស់ ដោះស្រាយជម្លោះនេះដោយសន្តិវិធី ពោលគឺ ប្រើយន្តការអាស៊ាន-ចិន ដើម្បីអនុវត្តឲ្យបានពេញលេញនូវសេចក្តីថ្លែងការណ៍ ស្តីពី ភាគីក្រមប្រតិបត្តិសមុទ្រចិនខាងត្បូង (DOC) និងខិតខំតាក់តែងក្រមប្រតិបត្តិសមុទ្រចិនខាងត្បូង (COC) រវាងអាស៊ាន-ចិន និងប្រទេសពាក់ព័ន្ធ។
អ្នកនាំពាក្យក្រសួងការបរទេសកម្ពុជាក៏បានចាត់ទុកថា ការភ្ជាប់ជំនួយឥតសំណងរបស់ចិនប្រមាណជា៦០០លានដុល្លារអាមេរិកទៅនឹងកាដូ ឬរង្វាន់សម្រាប់កម្ពុជាគាំទ្រចិនលើបញ្ហាសមុទ្រចិនខាងត្បូងនោះថា គឺជាការប្រមាថមកលើកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ