អាស៊ានចេញសេចក្តីថ្លែងការណ៍ ដោយមិននិយាយពីសេចក្តីសម្រេចរបស់តុលាការអន្តរជាតិ
ទីបំផុតទៅសេចក្តីថ្លែងការណ៍របស់អាស៊ានត្រូវបានចេញផ្សាយហើយ នៅថ្ងៃចន្ទ ទី២៥ ខែកក្កដានេះ ក្រោយពីការជជែកគ្នារហូតមកដល់នាទីចុងក្រោយ ដើម្បីឆ្លងកាត់ភាពទ័លច្រក។ ក្នុងសេចក្តីថ្លែងការណ៍នោះមិនបានរិះគន់អ្វីទេ លើក្រុងប៉េកាំងពីបញ្ហាសមុទ្រចិនខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
សមាជិកអាស៊ានទាំង១០ប្រទេសបានជៀសវាងមិននិយាយសោះឡើយពីសាលដីកាតុលាការមជ្ឈត្តិកម្មអចិន្ត្រៃយ៍ទីក្រុងឡាអេលើសំណុំរឿងជម្លោះនៅសមុទ្រចិនខាងត្បូង ដែលសាលដីកាទាត់ចោលការទាមទាររបស់ចិន ហើយឲ្យហ្វីលីពីនឈ្នះ កាលពីថ្ងៃទី១២ ខែកក្កដា។
នៅក្នុងសេចក្តីថ្លែងការណ៍អាស៊ាន ដែលចេញផ្សាយនៅថ្ងៃទី២៥ ខែកក្កដានេះ មានចំនួន៦ចំណុច ដែលក្នុងនោះ ក៏បានការលើកទឹកចិត្តឲ្យភាគីពាក់ព័ន្ធក្នុងជម្លោះសមុទ្រចិនទាំងអស់ គោរពតាមគោលការណ៍ដែលមាននៅក្នុងប្រកាសស្តីពីការប្រព្រឹត្តរបស់ភាគីពាក់ព័ន្ធនៅក្នុងសមុទ្រចិនខាងត្បូង (DOC)។
ប្រភពកាទូតអាស៊ានបានលើកឡើងថា“ពួកយើងបានបញ្ចៀសនូវមហន្តរាយមួយទៀត”។ ការលើកឡើងបែបនេះចង់សំដៅទៅលើកិច្ចប្រជុំអាស៊ាននៅក្នុងប្រទេសកម្ពុជាកាលពីឆ្នាំ២០១២ ដែលមិនបានចេញសេចក្តីថ្លែងការណ៍រួមដោយសារតែការមិនយល់ស្របគ្នាលើបញ្ហាសមុទ្រចិនខាងត្បូង។
ការសម្រេចខាងលើនេះ នឹងក្លាយជាប្រយោជន៍សម្រាប់ប្រទេសចិន ដែលកន្លងមកបានច្រានចោលសាលដីកាតុលាការមជ្ឈត្តិកម្មអចិន្ត្រៃយ៍ទីក្រុងឡាអេ។ នេះបើតាមការចុះផ្សាយរបស់ទីភ្នាក់ងារព័ត៌មានបារាំងAFP។
យោងតាមទីភ្នាក់ងារព័ត៌មានចិនស៊ិនហួបានចុះផ្សាយពាក្យសម្តីលោករដ្ឋមន្ត្រីការបរទេសចិនសម្តែងការកោតសរសើរក្នុងកម្រិតខ្ពស់បំផុត ចំពោះកិច្ចខិតខំប្រឹងប្រែង របស់ប្រទេសកម្ពុជា ដើម្បីលើកកម្ពស់យុត្តិធម៌ ជុំវិញសាលដីកាតុលាការលើ បញ្ហាសមុទ្រចិនខាងត្បូង។
លោកវ៉ាងរដ្ឋមន្ត្រីការបរទេសចិនបន្តថា យើងនឹងមិនអនុញ្ញាតឲ្យកម្លាំងខាងក្រៅណាមួយបង្កើតឲ្យមានភាពចលាចលក្នុងតំបន់ ដោយបំផុសបំផុលឲ្យមានអាជ្ញាកណ្តាល ក្នុងការដោះស្រាយបញ្ហាសមុទ្រចិនខាងត្បូងនោះទេ។
សូមបញ្ជាក់ថាប្រទេសជាសមាជិកអាស៊ាន៤ រួមមានហ្វីលីពិន ម៉ាឡេស៊ី ប្រ៊ុយណេ និងវៀតណាម កំពុងតែមានជម្លោះដែនទឹកជាមួយនឹងមហាយក្សចិននៅសមុទ្រចិនខាងត្បូង។ ភាគច្រើននៃសមាជិករបស់អាស៊ានគឺចង់ឲ្យមានការដាក់សម្ពាធណាមួយទៅលើប្រទេសចិនជុំវិញការសាងកោះក្នុងតំបន់ជម្លោះ។ ប៉ុន្តែសហគមន៍អាស៊ានដំណើរការទៅបានអាស្រ័យដោយការមូលមតិគ្នារវាងសមាជិកទាំងអស់ ដូច្នេះប្រទេសណាមួយដែលជាសមាជិកអាចមានសិទ្ធិបោះឆ្នោតប្រឆាំងនៅនឹងសេចក្តីសម្រេចណាមួយប្រសិនបើខ្លួនមិនពេញចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ