លោកហ៊ុន សែន មិនឲ្យតម្លៃលើការវិភាគរបស់អង្គការអន្តរជាតិមួយដែលចាត់ទុកកម្ពុជាជាប្រទេសផ្តាច់ការ
អង្គការស្រាវជ្រាវ និងវិភាគរបស់អង់គ្លេសមួយឈ្មោះថា Economist Intelligence Unit កាលពីម្សិលមិញបានចេញសន្ទស្សន៍ស្តីពី ស្ថានភាពប្រជាធិបតេយ្យរបស់បណ្តាប្រទេសនានាលើពិភពលោកនៅក្នុងឆ្នាំ២០១៧។ ក្នុងនោះ ប្រទេសកម្ពុជាត្រូវបានអង្គការនេះ ចាត់ចូលជាប្រទេសប្រើអំណាចផ្តាច់ការដូចប្រទេសវៀតណាមនិងចិនដែរ។ ក៏ប៉ុន្តែលោកនាយករដ្ឋមន្រ្តីហ៊ុន សែន មិនបានឲ្យតម្លៃទៅលើបញ្ហានេះទេ ដោយលោកអះអាងថា អ្នកសរសេរចេះសរសេរតាមចិត្ត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
ប្រតិកម្មរបស់លោកនាយករដ្ឋមន្រ្តីហ៊ុន សែន បានធ្វើឡើងនៅក្នុងពិធីចែកសញ្ញាបត្រដល់និស្សិតវិទ្យាស្ថានបច្ចេកវិទ្យាកម្ពុជានៅព្រឹកថ្ងៃព្រហស្បតិ៍ ទី១ កុម្ភៈ។ សម្រាប់លោកនាយករដ្ឋមន្រ្តី បើទោះបីជាអង្គការ Economist Intelligence Unit ចាត់ទុកកម្ពុជាបែបណាក៏ដោយ ប៉ុន្តែលោកបានអះអាងថា អ្វីៗ វាមិនស្ថិតនៅលើអ្នកសរសេរនោះទេ។
ប្រតិកម្មរបស់ប្រមុខរដ្ឋាភិបាលកម្ពុជានាពេលនេះ ធ្វើឡើងក្រោយពីអង្គការស្រាវជ្រាវ និងវិភាគរបស់អង់គ្លេសមួយឈ្មោះថា Economist Intelligence Unit បានចាត់ប្រទេសកម្ពុជាចូលក្នុងបញ្ជីប្រទេសផ្តាច់ការដែលមានវៀតណាម ឡាវ ចិន និងកូរ៉េខាងជើងជាដើម។ តាមសន្ទស្សន៍ស្ថានភាពប្រជាធិបតេយ្យនៅក្នុងឆ្នាំ២០១៧ អង្គការ Economist Intelligence Unit បានដាក់ចំណាត់ថ្នាក់កម្ពុជានៅលេខរៀងទី១២៤ ក្នុងចំណោមប្រទេស ១៦៧នៅលើពិភពលោក។ ចំណាត់ថ្នាក់នេះ គឺបានធ្លាក់ចុះ១២លេខបើប្រៀបធៀបនឹងចំណាត់ថ្នាក់ក្នុងឆ្នាំ២០១៦កន្លងទៅ។
ការចាត់ចំណាត់ថ្នាក់លើប្រទេសកម្ពុជាដូច្នេះ គឺអង្គការ Economist Intelligence Unit សំអាងថាដោយសារតែកម្ពុជាទទួលបានពិន្ទុទាបនៅក្នុងដំណើរការបោះឆ្នោត និងដំណើរការពហុបក្ស បន្ទាប់ពីមានការរំលាយគណបក្សសង្រ្គោះជាតិដែលជាគណបក្សប្រឆាំងធំបំផុតកាលពីអំឡុងខែវិច្ចិកា ឆ្នាំ២០១៧។ ដូច្នេះហើយ អង្គការអន្តរជាតិមួយនេះបានផ្តល់ពិន្ទុដល់កម្ពុជាតែ៣,៦៣ប៉ុណ្ណោះក្នុងការអនុវត្តលទ្ធិប្រជាធិបតេយ្យកាលពីឆ្នាំទៅ។ ពិន្ទុនេះ គឺទាបជាងប្រទេសមីយ៉ាន់ម៉ា និងប្រទេសថៃទៅទៀត។ តែយ៉ាងណាក៏ខ្ពស់ជាងប្រទេសចិន វៀតណាម ឡាវ និងប្រទេសកូរ៉េខាងជើងដែរ។
ចំពោះការផ្តល់ពិន្ទុនេះ លោកនាយករដ្ឋមន្រ្តីហ៊ុន សែន ដែលចាត់ទុកការសរសេររបាយការណ៍ និងការដាក់ពិន្ទុនេះធ្វើឡើងដោយមនុស្សតែប៉ុន្មាននាក់នោះ បានបរិហារថាក្រុមនេះមិនដឹងជាយកពិន្ទុនេះពីណាមកទេមកដាក់ឲ្យកម្ពុជា។ គួរជំរាបជូនថា ក្រៅពីតែផ្តល់ពិន្ទុទាបដល់ប្រទេសកម្ពុជាលើបញ្ហាប្រជាធិបតេយ្យនោះ អង្គការ Economist Intelligence Unit ក៏បានវាយតម្លៃថា ការបោះឆ្នោតសាកលនៅខែកក្កដា ខាងមុខនេះ ក៏នឹងមិនធ្វើឡើងដោយសេរី និងយុត្តិធម៌នោះដែរ ព្រោះថាមានការរំលាយបក្សប្រឆាំងមុននឹងការបោះឆ្នោតនេះមកដល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ