អ្នកផ្តល់សេវាពពោះ ត្រូវបាន បង្គាប់ឲ្យប្រមូលលុយឲ្យម្តាយពពោះជំនួសដើម្បីចិញ្ចឹមកូន
សំណុំរឿងសេវាពពោះជំនួស ជនជាតិអូស្រ្តាលីម្នាក់ និង ជនជាតិខ្មែរពីរនាក់ ត្រូវបានបញ្ជូនទៅកាន់តុលាការហើយ និង ប្រកាសសាលក្រមនាពេលដ៏ខ្លីខាងមុខនេះ។ ជនទាំងបី ក៏ត្រូវបានបង្គាប់ឲ្យប្រមូលលុយដែលទទួលបានសេវា ដើម្បីចិញ្ចឹមទារកដែលម្តាយជាអ្នកស៊ីឈ្នួលពពោះជំនួស។ នេះបើតាមការបញ្ជាក់ពី អនុប្រធានអចិន្ត្រៃយ៍របស់គណៈកម្មាធិការជាតិប្រយុទ្ធប្រឆាំងការជួញដូរមនុស្សកម្ពុជា។
ចុះផ្សាយនៅថ្ងៃ៖
ជនទាំងបីនាក់ ដែលជាអ្នកផ្តល់សេវាពពោះជំនួស កាលពីពេលថ្មីៗនេះ ត្រូវបានសាលាដំបូងរាជធានីចេញដីការចាប់ខ្លួនពីបទធ្វើអន្តរការរវាងអ្នកសុំកូន និងស្ត្រីពពោះតាមមាត្រា៣៣២ និងបទសុំផ្ដល់ឯកសារដោយទុច្ចរិតតាមមាត្រា៦៦២ នៃក្រមព្រហ្មទណ្ឌ។ យ៉ាងណាក៏ដោយ រហូតមកទល់ពេលនេះ តុលាការមិនទាន់សម្រេចថា ជនទាំងបីដែលជាអ្នកផ្តល់សេវាពពោះ ជំនួសនោះ នឹងទទួលទោសកម្រិតណានោះទេ ក៏ប៉ុន្តែបើតាមមាត្រានៃក្រមព្រហ្មទណ្ឌ ពួកគេនឹងត្រូវជាប់ពន្ធនាគារ ពី ៦ខែ ទៅ២ឆ្នាំ។
លោក ស្រី ជូ ប៊ុនអេង អនុប្រធានអចិន្រ្តៃយ៍របស់គណៈកម្មាធិការជាតិប្រយុទ្ធប្រឆាំងការជួញដូរមនុស្ស បញ្ជាក់ថា ដោយសារតែនេះ ជាករណីទីមួយ ដែលប៉ូលីសប្រឆាំងការជួញដូរមនុស្សរបស់ក្រុងភ្នំពេញ បានចាប់ផ្តើមវិធានការក្តៅបង្រ្កាបសេវាពពោះជំនួសនៅកម្ពុជា ដូច្នេះហើយត្រូវធ្វើការស្រាវជ្រាវបន្ថែម ដោយផ្អែកលើច្បាប់នានា ដើម្បីទាញយកមកដាក់បន្ទុក។
ជាមួយគ្នានេះ ការិយាល័យប្រឆាំងការជួញដូរមនុស្ស បានបង្គាប់ឲ្យជនជាតិអូស្រ្តាលីម្នាក់ និង ខ្មែរពីរនាក់ ដែលជាអ្នកផ្តល់សេវាពពោះនេះ ត្រូវប្រមូលលុយ ចំនួន ៥ ម៉ឺនដុល្លារ ទៅឲ្យអ្នកស៊ីឈ្នួលពពោះជំនួសដើម្បីចិញ្ចឹមកូនជាបន្តទៀត ។
លោកស្រី ជូ ប៊ុនអេង បានអំពាវនាវទៅកាន់ឪពុកម្តាយដែលជាម្ចាស់មេជីវិត ឲ្យបង្ហាញខ្លួនស្នើសុំចំពោះសមត្ថកិច្ច ដើម្បីទទួលយកកូនទៅចិញ្ចឹម។ ចណែកឯស្រ្តីដែលជាអ្នករកស៊ីពពោះវិញ អាជ្ញាធរនឹងមិនចាត់វិធានការណ៍អ្វីទេ ក្រោមហេតុផលថា ស្រ្តីទាំងនោះ មិនទាន់បានយល់ដឹងច្បាស់ពីអាជីវកម្ម ខុសច្បាប់នេះ។ ក៏ដូចជាអំពាវនាវអោយ ស្ត្រីទាំងនោះចេញមុខ ដើម្បីទទួលបានសេវាកម្មស្របច្បាប់ ជាពិសេសគឺការថែរក្សាគភ៌ និងអនាគតរបស់កុមារ។
ក្នុងរយៈពេលជិតមួយឆ្នាំដែលពួកគេបង្កើតបណ្តាញទទួលពពោះជំនួសនេះ ពួកគេបានរកស្ត្រី២៣នាក់ ដែលជាអ្នកពពោះជំនួស ហើយមាន៥នាក់បានផ្តល់កំណើតទារក៥រួចមកហើយ។ នេះបើតាមលោកកែវ ធា ប្រធានការិយាល័យប្រឆាំងការជួញដូរមនុស្សរាជធានីភ្នំពេញ។
កាលពីសប្តាហ៍មុន ជនជាតិអូស្ត្រាលីម្នាក់ និងជំនួយការជនជាតិខ្មែរពីរនាក់ត្រូវបានប៉ូលីសប្រឆាំងការជួញដូរមនុស្សរបស់ក្រុងភ្នំពេញចាប់ខ្លួន ក្រោយពីបានស៊ើបអង្កេតរកឃើញថាពួកគេជាខ្សែបណ្តាញផ្តល់សេវាពពោះជំនួសនៅកម្ពុជា។ ការចាប់ខ្លួននេះធ្វើឡើងក្រោយពីរដ្ឋាភិបាលកម្ពុជា ពិចារណាបង្កើតច្បាប់ស្តីពីការពពោះជំនួស។ ជនជាតិអូស្ត្រាលីជាស្រ្តី ឈ្មោះ Tammy Davis-Charles អាយុ៤៩ឆ្នាំ បានធ្វើអាជីវកម្មផ្តល់សេវាពពោះជំនួសនៅប្រទេសថៃ ប៉ុន្តែដោយសារតែប្រទេសថៃរឹតបន្តឹងច្បាប់ ទើបគេរត់មករកស៊ីបែបនេះនៅកម្ពុជាវិញ ដោយសារមិនទាន់មានច្បាប់គ្រប់គ្រងលើផ្នែកនេះនៅឡើយ។
សូមបញ្ជាក់ថាប្រតិបត្តិការបង្ក្រាបការផ្តល់សេវាពពោះជំនួសនេះធ្វើឡើងក្រោយពេលរដ្ឋមន្ត្រីក្រសួងសុខាភិបាលប្រកាសមិនឲ្យមានការធ្វើអាជីវកម្មពពោះជំនួសក្នុងកម្ពុជា ដោយចាត់ទុកថានេះគឺជាការជួញដូរមនុស្ស។ កាលខែតុលាកន្លងទៅ លោកស្រីរ៉ូណាស្មីត អ្នករាយកាណ៍ពិសេសស្តីពីស្ថានភាពសិទ្ធិមនុស្សកម្ពុជា ក្នុងជំនួបជាមួយរដ្ឋមន្ត្រីក្រសួងយុត្តិធម៌ បានស្វាគមន៍ក្រសួងយុត្តិធម៌ក្នុងការបង្កើតច្បាប់ស្តីពីការពពោះជំនួស ដើម្បីទប់ស្កាត់ការពពោះជំនួសក្នុងប្រទេសកម្ពុជា និងចូលរួមការពារសិទ្ធិស្ត្រី និងកុមារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ