សកម្មជនដីធ្លីត្រូវបានតុលាការកាត់ទោសជាប់ពន្ធនាគារ៦ថ្ងៃ
សាលាដំបូងក្រុងនៅថ្ងៃនេះ បានសម្រេចកាត់ទោសសកម្មជនដីធ្លី២នាក់ ដាក់ពន្ធនាគារក្នុងម្នាក់ៗ៦ថ្ងៃ និងពិន័យជាប្រាក់ប្រមាណ៨ម៉ឺនរៀល។ សកម្មជនដីធ្លីត្រូវបានអាជ្ញាធរចាប់ខ្លួន ក្នុងពេលដែលពួកគាត់បានធ្វើយុទ្ធនាការថ្ងៃចន្ទពណ៌ខ្មៅក្នុងសប្តាហ៍ទី១៥ កាលពីថ្ងៃទី១៥ ខែសីហា កន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
ទីបំផុងទៅសាលាដំបូងរាជធានីភ្នំពេញ បានសម្រេចផ្លាស់ប្តូរបទចោទលើសកម្មជនដីធ្លី២នាក់ នៅព្រឹកថ្ងៃទី២២ ខែសីហា ក្រោយពេលចាប់ខ្លួនពួកគាត់កាលពីថ្ងៃទី១៥ ខែសីហា ក្នុងយុទ្ធនាការថ្ងៃចន្ទពណ៌ខ្មៅ។ នេះបើតាមអ្នកគ្រប់គ្រងបច្ចេកទេសស៊ើបអង្កេតនៃអង្គការលីកាដូ លោក អំ សំអាត ដែលបានឃ្លាំមើលរឿងក្តីនេះ។
លោកបន្ថែមថា ជាធម្មតាចាប់គេហើយ ប្រសិនបើមិនមានបទល្មើសអ្វីទេ ហើយលែងវិញ នោះអាចធ្វើឲ្យសាធារណៈគិតថាអាជ្ញាធរជាអ្នកខុស។ ដូច្នេះចៅក្រមក៏សម្រេចប្តូរបទចោទប្រកាន់ពីបទញុះញង់ ឲ្យប្រព្រឹត្តិបទឧក្រិដ្ឋជាអាទិ៍មកជាបទប្រមាថវិញ ពោលគឺប្តូរពីបទចោទតាមមាត្រា៤៩៥ មកមាត្រា៥០២ ហើយផ្តន្ទាទោស៦ថ្ងៃ និងពិន័យជាប្រាក់៨ម៉ឺនរៀល។
សកម្មជនដីធ្លីតំបន់បឹងកក់ប្រមាណ៥០នាក់នៅព្រឹកនេះ ក៏បានឈរនៅខាងមុខសាលាដំបូងរាជធានី ដើម្បីទាមទារឲ្យមានការដោះលែងសកម្មជនដីធ្លីទាំង២នាក់ផងដែរ។ អ្នកស្រីសុង ស្រីលាភ ជាសកម្មដីធ្លីម្នាក់ដែលបានចូលរួមក្នុងការតវ៉ានោះ បានថ្លែងប្រាប់វិទ្យុបារាំងថា អ្នកស្រីទេព វន្នី និង អ្នកស្រី ប៊ូវ សោភា នឹងត្រូវដោះលែងវិញនៅថ្ងៃទី២២សីហា ឬថ្ងៃទី២៣ សីហា។
ដូចគ្នានេះដែរ លោក អំ សំអាត បានឲ្យដឹងថាពួកគាត់ទាំង២នាក់ នឹងត្រូវដោះលែងនៅថ្ងៃទី២២ សីហានេះ។ ដោយឡែកកាលពីថ្ងៃទី១៩ សីហាកន្លងទៅ អ្នកស្រី ទេព វន្នី ត្រូវបានតុលាការហៅមកសាកសួរ ទាក់ទងបទល្មើសហិង្សាដោយចេតនា និងបទប្រឆាំងនឹងអ្នករាជការសាធារណៈ បើសិនជាចៅក្រមចេញដីកាឃុំខ្លួនបណ្តោះអាសន្ន នោះអ្នកស្រីទេព វន្នី នឹងមិនត្រូវបានដោះលែងទេ។
មន្ត្រីអង្គការលីកាដូរូបនេះ បានចាត់ទុកការកាត់ទោសរបស់តុលាការលើសកម្មជនដីធ្លីនេះថាជាការគំរាមកំហែងមួយ ទៅលើពលរដ្ឋ ប៉ះពាល់ធ្ងន់ធ្ងរទៅលើសិទ្ធិពលរដ្ឋ ដោយសារតែការជួបជុំរបស់គាត់គឺធ្វើឡើងតាមបែបសាសនា មិនពាក់ព័ន្ធបទល្មើសនោះទេ។
សូមបញ្ជាក់ថាកាលពីថ្ងៃទី១៩ សីហា កន្លងទៅ ចៅក្រមសើបសួរ នូ វាសនា បានសួរចម្លើយអ្នកស្រីទេព វន្នី ពីបទហិង្សាដោយចេតនាមានស្ថានទម្ងន់ទោស ប្រព្រឹត្តិនៅក្បែរវិមានឯករាជ្យ កាលពីថ្ងៃទី ១៣ ខែ មិនា ឆ្នាំ ២០១៣ តាមមាត្រា ២១៨ នៃក្រមព្រហ្មទណ្ឌ។ នេះបើតាមលោកលី សុផាណា ព្រះរាជអាជ្ញារង ដែលបានប្រាប់ក្រុមអ្នកសារព័ត៌មានកាលពីថ្ងៃទី១៩ សីហា។
លោក លី សុផាណាក៏បានប្រាប់ក្រុមអ្នកសារព័ត៌មានតាមប្រព័ន្ធ Telegram នៅព្រឹកនេះថា អ្នកស្រីទេព វន្នី នឹងត្រូវបង្ហាញខ្លួននៅសវនាការដោយឡែកមួយទៀតនៅថ្ងៃទី ១៩ កញ្ញា ២០១៦ ពេលព្រឹក ដែលជាប់ចោទពីបទ ប្រមាថរាជការសាធារណៈ និងប្រឆាំងអ្នករាជការសាធារណៈមានស្ថានទម្ងន់។
គួររំលឹកជូនថា ក្រុមសកម្មជនដីធ្លីទាំងពីរនាក់ត្រូវបានអាជ្ញាធរចាប់ខ្លួនកាលពីថ្ងៃទី១៥ សីហា ក្នុងពេលធ្វើយុទ្ធនាការ «ថ្ងៃចន្ទពណ៌ខ្មៅ» ទាមទារឲ្យមានការដោះលែងមន្ត្រីការពារសិទ្ធិមនុស្ស៤នាក់ និងមន្ត្រីគ.ជ.ប ម្នាក់ រួមទាំងការទាមទារឲ្យសមត្ថកិច្ចវែកមុខឃាតករ ក៏ដូចជារកយុត្តិធម៌ ឲ្យលោកបណ្ឌិតកែម ឡី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ