ក្រសួងការបរទេស៖ នៅពេលនេះ ទូតខ្មែរកំពុងរិះរកវិធីជួយកម្មករ៥នាក់ដែលត្រូវប៉ូលិសថៃចាប់ខ្លួន
តាមរយៈសេចក្តីជូនព័ត៌មាននៅថ្ងៃអង្គារ៍ ទី០១ មីនានេះ លោកហោ ណាំហុង រដ្ឋមន្ត្រីក្រសួងការបរទេសកម្ពុជា បានណែនាំឲ្យឯកអគ្គរាជទូតកម្ពុជាប្រចាំនៅប្រទេសថៃ ត្រូវរិះរកវិធីជួយដល់កម្មករខ្មែរទាំង៥នាក់ និងផ្តល់មេធាវីការពារពួកគេនៅពេលឡើងតុលាការ។ ការណែនាំនេះ បានធ្វើឡើងភ្លាមៗបន្ទាប់ពីកម្មករទាំង៥នាក់នេះ ត្រូវបានប៉ូលិសថៃចាប់ខ្លួន និងត្រៀមបញ្ចូនទៅកាន់តុលាការពាក់ព័ន្ធការប្រព្រឹត្តអំពើហិង្សា និងរំលោភភ្ញៀវទេសចរជនជាតិបារាំងនៅលើកោះមួយនៅក្នុងប្រទេសថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
នៅពេលនេះកម្មករខ្មែរទាំង៥នាក់នោះ កំពុងត្រូវបានប៉ូលិសថៃបញ្ចូនទៅកាន់ស្នងការដ្ឋានខេត្តត្រាត ដើម្បីកសាងសំណុំរឿង ត្រៀមបញ្ជូនទៅកាន់តុលាការធ្វើការកាត់ទោស។ ទោះបីជាស្ថិតនៅក្នុងស្ថានភាពបែបណាក៏ដោយ ប្រមុខការទូតខ្មែរ លោកហោ ណាំហុង បានណែនាំឲ្យឯកអគ្គរាជទូតកម្ពុជាប្រចាំនៅប្រទេសថៃ ត្រូវតែរិះរកវិធីជួយដល់កម្មករទាំងនោះ និងផ្តល់មេធាវី ដើម្បីជួយការពារពួកគេនៅពេលឡើងតុលាការ។ លោកជុំ សន្ទរី អ្នកនាំពាក្យក្រសួងការបរទេសកម្ពុជា បានបញ្ជាក់បន្ថែមប្រាប់វិទ្យុបារាំងអន្តរជាតិថា នៅពេលនេះ ប៉ូលិសថៃប្រមូលភស្តុតាងបានច្រើនហើយចំពោះករណីនេះ។ ថ្វីបើមិនទទួលបានព័ត៌មានជាក់លាក់អំពីថ្ងៃបើកសវនាការលើរឿងនេះក្តី ប៉ុន្តែអ្នកនាំពាក្យក្រសួងការបទេសកម្ពុជា ជឿថា សវនាការអាចនឹងធ្វើឡើងក្នុងពេលឆាប់ៗខាងមុខនេះ។
សូមជម្រាបជូនថា កម្មករខ្មែរលើទូកនេសាទទាំង៥នាក់ ត្រូវបានប៉ូលិសថៃចាប់ខ្លួនកាលពីថ្ងៃអាទិត្យ បន្ទាប់ពីពួកគេទាំងនោះបានប្រព្រឹត្តអំពើហិង្សា និងរំលោភលើភ្ញៀវទេសចរជនជាតិបារាំងមួយក្រុមនៅលើកោះគុត ក្នុងខេត្តត្រាត ប្រទេសថៃកាលពីល្ងាចថ្ងៃសៅរ៍ចុងសប្តាហ៍មុន។ កាសែតបាងកកប៉ុស្តិ៍ថៃ បានចុះផ្សាយថា ហេតុការណ៍នេះបានកើតឡើង ខណៈដែលជនជាតិបារាំងចំនួន៤នាក់បានដើរចេញពីកន្លែងដែលពួកគេកំសាន្តត្រឡប់ទៅកាន់កន្លែងស្នាក់នៅវិញ ដើម្បីបរិភោគអាហារពេលល្ងាច។ កាសែតថៃដដែលបានបញ្ជាក់ថា អ្នកនេសាទខ្មែរពីរនាក់បាននិយាយលេងជាមួយជនជាតិបារាំងទាំងនោះ ហើយនៅពេលដែលពួកគេរៀបនឹងចាកចេញ កម្មករខ្មែរ៣នាក់ផ្សេងទៀតបានចេញពីព្រៃ និងបានចាប់រំលោភស្រ្តីបារាំងពីរនាក់ ព្រមទាំងបានវាយទៅបុរសជនជាតិបារាំងពីរនាក់ទៀតឲ្យរងរបួស។ ទីភ្នាក់ងារសារព័ត៌មានបារាំងAFP បានឲ្យដឹងដែរថា កម្មករខ្មែរទាំង៥នាក់ បានវាយប្រហារដោយប្រើប្រាស់កំាបិត និងដំបង។ បន្ទាប់ពីចាប់ខ្លួន ប៉ូលិសថៃ បានចោទប្រកាន់កម្មករខ្មែរទាំងនោះពីបទប្រើប្រាស់អំពើហិង្សា និងរំលោភសេពសន្ទវៈ។
នៅក្នុងសេចក្តីជូនព័ត៌មានមួយនៅថ្ងៃទី០១ ខែមីនា ឆ្នាំ២០១៦នេះ ក្រសួងការបរទេសកម្ពុជា បានគូសបញ្ជាក់ថា កម្មករខ្មែរទាំង៥នាក់នោះ បានទទួលសារភាពថា បានជាប់ពាក់ព័ន្ធក្នុងករណីប្រើអំពើហិង្សា និងរំលោភលើភ្ញៀវទេសចរបារាំងពិតប្រាកដមែន ហើយការប្រព្រឹត្តនោះ បានធ្វើឡើងក្នុងស្ថានភាពដែលពួកគេស្រវឹងស្រា។ បើតាមក្រសួងការបរទេស កម្មករខ្មែរទាំងនោះ សុទ្ធតែមានវ័យក្មេងអាយុតិចជាង២៥ឆ្នាំ ហើយក្នុងនោះ ៣នាក់មិនចេះអក្សរ និងពីរនាក់ទៀត រៀនបានតិចតូចតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ