ព្រឹទ្ធសមាជិកបក្សប្រឆាំងមួយរូបទៀតដែលរងបណ្តឹងក្នុងសំណុំរឿងឃាតកម្មលោកកែម ឡី បានសុំលាលែង
លោកស្រី ថាក់ ឡានី ដែលជាសមាជិកព្រឹទ្ធសភាគណបក្សសម រង្ស៊ី និងត្រូវបានលោកនាយករដ្ឋមន្រ្តីហ៊ុន សែន ប្តឹងពីរឿងចោទរដ្ឋអំណាចថានៅពីក្រោយឃាតកម្មលោកកែម ឡី នោះ បានសុំលាលែងពីតួនាទីនៅក្នុងគណបក្សសម រង្ស៊ី។ ការសុំលាលែងនេះ បានធ្វើឡើងបន្ទាប់ពីមន្ត្រីជាន់ខ្ពស់ទាំងបក្សសង្រ្គោះជាតិ និងសម រង្ស៊ី បានលាលែងជាបន្តបន្ទាប់នារយៈពេលចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:០៤
មូលហេតុនៃការសុំលាលែងនេះ គឺលោកស្រីថាក់ ឡានី បានគូសបញ្ជាក់ប្រាប់លោកទាវ វណ្ណុល ប្រធានស្តីទីគណបក្សសម រង្ស៊ី ថា ដោយសារតែមូលហេតុផ្ទាល់ខ្លួន។ លោកស្រីថាក់ ឡានី បានសុំលាលែងពីសមាជិកគណៈកម្មាធិការអចិន្ត្រៃយ៍និងគណៈកម្មាធិការនាយកគណបក្សសម រង្ស៊ី។ គួរកត់សម្គាល់ថា ការលាលែងរបស់លោកស្រីថាក់ ឡានី នៅពេលនេះ គឺធ្វើឡើងបន្ទាប់ពីលោកហុង សុខហួរ សមាជិកព្រឹទ្ធសភាគណបក្សសម រង្ស៊ី លោកអ៊ុំ សំអានតំណាងរាស្រ្ត និងលោកមាជ សុវណ្ណារ៉ា ប្រធាននាយកដ្ឋានព័ត៌មានរបស់គណបក្សសង្រ្គោះជាតិ បានសុំលាលែងពីសមាជិកគណៈកម្មាធិការនាយកគណបក្សព្រមគ្នាតែម្តងកាលពីយប់ថ្ងៃទី ២៣ កុម្ភៈពីពន្ធនាគារព្រៃស។
បើតាមលោកមាជ សុវណ្ណារ៉ា ការសុំលាលែងរបស់ពួកគេនេះ គឺដើម្បីកុំឲ្យប៉ះពាល់ដល់គណបក្សប្រឆាំងតាមឧបសគ្គច្បាប់ស្តីគណបក្សនយោបាយថ្មីត្រង់មាត្រាទី ១៨ថ្មី ដែលបានចែងថា«ប្រធាន អនុប្រធាន និងសមាជិកគណៈកម្មាធិការនាយកដែលមានទោស មិនត្រូវឲ្យមានតួនាទីក្នុងគណបក្ស»។ ក្នុងន័យនេះ បើទោះបីពួកគេ មិនលាលែងក៏គង់តែត្រួវអស់តួនាទីនៅក្នុងគណបក្សដដែលនៅពេលដែលច្បាប់ស្តីពីគណបក្សថ្មីត្រូវអនុវត្តនោះ។ ហើយនេះ ក៏ជាអ្វីដែលលោកសម រង្ស៊ី អតីតប្រធានគណបក្សសង្រ្គោះជាតិធ្លាប់បានធ្វើផងដែរកាលពីប៉ុន្មានសប្តាហ៍កន្លងទៅនេះ។
ការសុំលាលែងពីតួនាទីនៅក្នុងគណបក្សរបស់លោកស្រីថាក់ ឡានី ក៏ដូចជាមន្រ្តីទាំងនេះ បានកើតឡើងមុនច្បាប់ស្តីពីគណបក្សនយោបាយថ្មីនឹងត្រូវចូលជាធរមាននាពេលខាងមុខនេះ។ ច្បាប់ថ្មីនេះ ត្រូវបានគណបក្សប្រឆាំង និងអ្នកវិភាគទាំងឡាយមើលឃើញថានឹងក្លាយជាឧបករណ៍របស់រដ្ឋាភិបាលក្នុងការគាបសង្កត់ទៅលើគណបក្សសង្រ្គោះជាតិ បើទោះបីគណបក្សប្រជាជនកម្ពុជាបញ្ជាក់ហើយថា អនុវត្តគ្រប់គណបក្សទាំងអស់រួមទាំងគណបក្សកាន់អំណាចផង។
សូមបញ្ជាក់ថា លោកស្រីថាក់ ឡានី ត្រូវបានលោកនាយករដ្ឋមន្រ្តីហ៊ុន សែន ប្តឹងពីបទ «បរិហារកេរ្តិ៍ជាសាធារណៈ» បន្ទាប់ពីបានអត្ថាធិប្បាយថា រដ្ឋអំណាចជាអ្នកនៅពីក្រោយខ្នងនៃអំពើឃាតកម្មលើលោកកែម ឡី។ តាមបណ្តឹងនេះ តុលាការក្រុងភ្នំពេញ បានកាត់ទោសឲ្យលោកស្រីជាប់ពន្ធនាគាររយៈពេល ២ឆ្នាំ និងបង់ប្រាក់ជំងឺចិត្ត ១០០រៀល តាមការចង់បានរបស់លោកហ៊ុន សែន។ បច្ចុប្បន្ននេះ លោកស្រីថាក់ ឡានី កំពុងស្នាក់នៅឯប្រទេសស៊ុយអែត បន្ទាប់ពីទទួលបានសិទ្ធិជ្រកកោនផ្នែកនយោបាយនៅទីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ