លោកហ៊ុន សែនប្តឹងអ្នកវិភាគគឹម សុខ ទារសំណង៥០ម៉ឺនដុល្លារ
មួយថ្ងៃប៉ុណ្ណោះ ក្រោយពីបានថ្លែងឱ្យប្តឹងលោកគឹម សុខ អ្នកវិភាគសង្គមទៅកាន់តុលាការ នៅថ្ងៃទី១៣ កុម្ភៈនេះ ដំណើរការនីតិវិធីតុលាការ បានចាប់ផ្តើមហើយ។ លោកនាយករដ្ឋមន្ត្រីហ៊ុន សែនប្តឹងអ្នកវិភាគរូបនេះ ទាមទារសំណងជំងឺចិត្ត៥០ម៉ឺនដុល្លារ ពីព្រោះបើតាមប្រសាសន៍របស់លោកហ៊ុន សែន ការអត្ថាធិប្បាយរបស់លោកគឹម សុខ បានចោទគណបក្សប្រជាជនកម្ពុជាថានៅពីក្រោយការសម្លាប់លោកបណ្ឌិតកែម ឡី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
រឿងរ៉ាវបានកើតឡើងកាលពីថ្ងៃទី១១កុម្ភៈ។ ឆ្លើយនឹងសំណួររបស់វិទ្យុអាស៊ីសេរី លោកគឹម សុខ អ្នកវិភាគសង្គម បាននិយាយថា៖ «គណបក្សប្រជាជនកម្ពុជាបច្ចុប្បន្ន ...មិនឃើញថា គាត់ធ្វើដើម្បីចង់បានបង្កើនប្រជាប្រិយភាពអីទេ... និយាយឱ្យចំតែម្តងទៅ បន្តប្លន់អំណាច...»។
លោកគឹម សុខបន្តប្រាប់អាស៊ីសេរីទៀតថា៖ «...ធ្វើអស់ហ្នឹងហើយ សំលាប់ហើយអីហើយហ្នឹង ទាំងចុងក្រោយសំឡាប់ លោក កែម ឡីទៀត សំលាប់ហើយអីហើយប៉ុន្តែពលរដ្ឋនៅតែងើប។ ចឹងហើយមានតែវិធីមួយចុងក្រោយទេ គឺប្រើច្បាប់...»។ គឺពាក្យទាំងនេះហើយដែលជំរុញឱ្យលោកនាយករដ្ឋមន្ត្រីហ៊ុន សែន ដែលជាប្រធានគណបក្សប្រជាជនកម្ពុជា ចេញបញ្ជាឱ្យមេធាវីប្តឹងលោក គឹម សុខ ទៅកាន់តុលាការ ដោយទាមទារសំណងជំងឺចិត្ត៥០ម៉ឺនដុល្លារ។
ថ្លែងក្នុងពិធីសម្ពោធស្ពាននៅខេត្តកណ្តាល លោកនាយករដ្ឋមន្ត្រី បានគូសបញ្ជាក់ថា ការអត្ថាធិប្បាយនេះ គឺជាការប្រមាថដ៏ធ្ងន់ធ្ងរមកលើគណបក្សប្រជាជនកម្ពុជា។ បន្ថែមពីនេះ ក្នុងលិខិតប្តឹងទៅកាន់តុលាការ លោកគី តិចមេធាវីការពារក្តីឱ្យលោកនាយករដ្ឋមន្ត្រីហ៊ុន សែន បានអះអាងថាលោកគឹម សុខ ពិតជាបានប្រព្រឹត្តិដោយចេតនា ក្នុងគោលបំណងចោទប្រកាន់ មូលបង្កាច់ និងទំលាក់កំហុសយ៉ាងងងឹតងងុលទៅលើគណបក្សប្រជាជនកម្ពុជា ថាជាអ្នកសម្លាប់លោកបណ្ឌិត កែម ឡី។
ប៉ុន្តែលោកគឹម សុខដែលកំពុងមានវត្តមាននៅទីក្រុងភ្នំពេញ បានអះអាងថាប្រាប់វិទ្យុបារាំងថា ពាក្យ«គេ»ដែលគាត់ប្រើនោះ គឺមិនមែនសំដៅលើគណបក្សប្រជាជនកម្ពុជានោះទេ សំដៅលើអ្នកផ្សេងតែប៉ុណ្ណោះ។
គួរំលឹកថាផងដែរថា ក្នុងករណីដូចគ្នានេះ លោកនាយករដ្ឋមន្ត្រីហ៊ុន សែនបានប្តឹងលោកស្រី ថាក់ ឡានី សមាជិកព្រឹទ្ធសភាគណបក្សសមរង្ស៊ី និងលោកសម រង្ស៊ីអតីតប្រធានគណបក្សសង្គ្រោះជាតិផងដែរ។
បើទោះបីជាបែបណាក៏ដោយ លោកគឹម សុខ អ្នកវិភាគសង្គម ដែលហ៊ានរិះគន់គណបក្សកាន់អំណាចចំៗនោះ បានឱ្យដឹងលោកមិនរត់ចេញពីប្រទេសកម្ពុជា ហើយនឹងនៅតតាំងក្តីជាមួយនឹងលោកនាយករដ្ឋមន្ត្រីហ៊ុន សែនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ