អ្នកជំនាញ៖ ប្រជាពលរដ្ឋកម្ពុជាដើរកំសាន្តច្រើនជាងឆ្នាំមុន ក្នុងឱកាសថ្ងៃឈប់សំរាកបុណ្យភ្ជុំបិណ្ឌ
ក្នុងឱកាសឈប់សម្រាកបុណ្យភ្ជុំបិណ្ឌ ឆ្នាំ២០១៥នេះ ប្រជាពលរដ្ឋកម្ពុជាជាច្រើនបាននាំគ្នាធ្វើដំណើរកំសាន្តទាំងនៅក្នុងស្រុកនិងក្រៅស្រុកច្រើនជាងឆ្នាំមុនៗ។ សហប្រធានក្រុមការងារទេសចរណ៍ បានបញ្ជាក់ថាឲ្យដឹងថា ក្នុងឱកាសដំណើរកំសាន្តនេះ ប្រជាពលរដ្ឋខ្មែរម្នាក់ អាចនឹងចំណាយប្រាក់ចន្លោះពី២០ម៉ឺនរៀល ទៅជិត៤០ម៉ឺនរៀល ក្នុងមួយថ្ងៃនៅក្នុងប្រទេស។ សម្រាប់ដំណើរកំសាន្តក្រៅប្រទេសវិញ អាចនឹងចំណាយពីចន្លោះ៦០ម៉ឺនរៀល ទៅ ១លានរៀលក្នុងមួយថ្ងៃ បូករួមទាំងសំបុត្រយន្តហោះផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
ប្រជាពលរដ្ឋខ្មែរបាននាំគ្នាធ្វើដំណើរទៅកាន់ស្រុកកំណើតរៀងៗខ្លួន ដើម្បីជួបជុំបងប្អូន និងធ្វើពិធីសែនដូនតា នៅរដូវបុណ្យភ្ជុំបិណ្ឌ។ បន្ទាប់ពីជួបជុំសាច់ញាតិនៅស្រុកកំណើតហើយ ប្រជាជនខ្មែរមួយចំនួនធំចាប់ផ្តើមធ្វើដំណើរកំសាន្តទៅកាន់តំបន់ទេសចរនានា ទាំងនៅក្នុងស្រុកនិងក្រៅស្រុក។
លោកហូ វណ្ឌី សហប្រធានក្រុមការងារទេសចរណ៍ បានបញ្ជាក់ប្រាប់វិទ្យុបារាំងថា គោលដៅទេសចរណ៍សំខាន់ៗ ដែលប្រជាពលរដ្ឋខ្មែរ ធ្វើដំណើរទៅច្រើនជាងគេក្នុងថ្ងៃឈប់សំរាកបុណ្យភ្ជុំបិណ្ឌ គឺនៅតំបន់ឆ្នេរសមុទ្រ តំបន់អង្គរ និងបន្ទាប់មកគឺនៅបែកឥសាននៃប្រទេស។ ដោយឡែកសម្រាប់ក្រៅប្រទេសវិញ គឺមានថៃ ម៉ាឡេស៊ី វៀតណាម និងចិនជាដើម។
លោកហូ វណ្ឌី បានបញ្ជាក់ថា ចំនួនអ្នកទេសចរណ៍កម្ពុជានៅក្នុងឱកាសបុណ្យភ្ជុំបិណ្ឌនេះគឺមានចំនួនច្រើនជាងឆ្នាំមុនៗ។ ច្រើនជាងឆ្នាំមុនៗ ដោយសារតែស្ថានភាពនយោបាយ និងសេដ្ឋកិច្ចរបស់ប្រជាពលរដ្ឋមានលក្ខណៈល្អប្រសើរ។ លោកបានសង្កេតឃើញថា ប្រជាជនបាននាំគ្នាចាកចេញពីក្រុងភ្នំពេញ ស្ទើរពេញមួយសប្តាហ៍ ដើម្បីធ្វើដំណើរទៅកាន់ស្រុកកំណើត និងដើរកំសាន្តជួបជុំបងប្អូន។
សូមបញ្ជាក់ថា នៅពេលដែលមានពិធីបុណ្យជាតិធំៗម្តងៗ ប្រជាជនដែលរស់នៅ និងធ្វើការក្នុងទីក្រុងភ្នំពេញ តែងតែចាកចេញទៅកាន់ស្រុកកំណើត និងរមណីយដ្ឋានទេសចរណ៍នានា។ កត្តានេះបានធ្វើឲ្យទីក្រុងភ្នំពេញដែលពោរពេញទៅដោយមនុស្សនិងការកកស្ទះចរាចរណ៍នោះ ប្រែក្លាយជាស្ងប់ស្ងាត់ ទាំងនៅតាមកន្លែងកំសាន្ត អាហារស្ថាន និងតាមដងផ្លូវផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ