អ្នកជំនាញ៖ ក្នុងមួយថ្ងៃពលរដ្ឋម្នាក់ចំណាយប្រមាណពី២០ម៉ឺន ទៅ៣២ម៉ឺនរៀល ពេលភ្ជុំបិណ្ឌ
ក្នុងពិធីបុណ្យភ្ជុំបិណ្ឌដែលជាថ្ងៃឈប់សម្រាក់រយៈពេលបីថ្ងៃនេះ ប្រជាពលរដ្ឋខ្មែរភាគច្រើនបានធ្វើដំណើរទៅតាមបណ្តាខេត្តក្រុងដែលជាភូមិកំណើតរបស់ខ្លួន និងប្រគេនចន្ហាន់ទៅព្រះសង្ឃ រួមទាំងការធ្វើដំណើរកំសាន្តនៅតាមទីរមណីយដ្ឋានក្នុងស្រុកកំណើត និងទីតាំងទេសចរណ៍នានាផងដែរ។ អ្នកជំនាញបានអះអាងថា ក្នុងពិធីបុណ្យនេះ ពលរដ្ឋម្នាក់បានចំណាយមួយថ្ងៃពី៥០ ទៅ៨០ ដុល្លារ។
ចុះផ្សាយនៅថ្ងៃ៖
ស្តាប់ - ០២:១៩
ក្នុងពិធីបុណ្យភ្ជុំបិណ្ឌ ពលរដ្ឋខ្មែរភាគច្រើនធ្វើដំណើរនៅក្នុងស្រុកច្រើនជាងទៅបរទស។ ប៉ុន្តែការចំណាយរបស់ពលរដ្ឋខ្មែរនៅក្នុងមានការកើនឡើងគួរឱ្យកត់សំគាល់។ លោកហូ វណ្ឌី ជាទីប្រឹក្សាសភាពាណិជ្ជកម្មកម្ពុជា បានឱ្យដឹងថាតាមការស្រាវជ្រាវពលរដ្ឋខ្មែរម្នាក់ចំណាយប្រាក់ប្រមាណពី៥០ដុល្លារអាមេរិក ទៅ៨០ដុល្លារអាមេរិក(២០ម៉ឺនទៅ៣២ម៉ឺនរៀល)។
ការចំណាយរបស់ពលរដ្ឋនេះគឺនៅលើផ្នែកធ្វើដំណើរ កំសាន្ត និងចំណីអាហារ។ អ្នកជំនាញវិស័យទេសចរណ៍នៅកម្ពុជារូបនេះ បានឱ្យដឹងថាសេដ្ឋកិច្ចកម្ពុជាក៏បានធំធាត់សម្រាប់រយៈពេលបីទៅ៥ថ្ងៃដែលជាពិធីបុណ្យភ្ជុំបិណ្ឌនេះដែរ ព្រោះថាចរាចរណ៍សាច់ប្រាក់គឺមានកំណើនកើនលើសពីសកម្មភាពធម្មតា។
ទន្ទឹមនឹងនេះ លោក ហូ វណ្ឌី បានលើកឡើងពីបញ្ហាអសកម្មមួយចំនួនដែលពលរដ្ឋបានជួបប្រទះហើយដោះស្រាយមិនចេញអស់រយៈពេល១០ឆ្នាំហើយនោះ គឺការដំឡើងថ្លៃហួសហេតុពីអ្នកបម្រើសេវាកម្មមួយចំនួនធំ។ ក្នុងនោះ ការធ្វើដំណើរចរាចរណ៍ដូចជាថ្លៃរថយន្តក្រុង និងរថយន្តតាក់ស៊ី កន្លែងស្នាក់នៅ ថ្លៃអាហារហូបចុក។ សម្រាប់លោក វណ្ឌី បញ្ហាតម្លៃអាហារឡើងខ្ពស់ហួសហេតុ បញ្ហាចរាចរណ៍ និងបញ្ហាអនាម័យគឺជាមូលហេតុបីដែលធ្វើឱ្យភ្ញៀវទេសចរណ៍ដែលជាអ្នកទទួលសេវាមិនសប្បាយចិត្ត នៅពេលដែលពួកគេធ្វើដំណើរទៅកាន់រមណីយដ្ឋាននានាក្នុងប្រទេស។
ក្រៅពីការធ្វើដំណើរនៅកុ្នងស្រុករបស់ពលរដ្ឋខ្មែរភាគច្រើននោះពលរដ្ឋមួយចំនួនក៏បានធ្វើដំណើរទៅក្រៅស្រុកផងដែរ។ ជាដំណើរដើម្បីស្វែងរកកិច្ចសហការពាណិជ្ជកម្ម និងការពិនិត្យជំងឺរបស់ក្រុមគ្រួសារអ្នកដែលមានជីវភាពខ្ពង់ខ្ពស់។ បើតាមអ្នកជំនាញដដែលនេះ ភាគច្រើនគឺការធ្វើដំណើរទៅកាន់ប្រទេសជិតខាងកម្ពុជា ដូចជាថៃ និងវៀតណាមជាដើម។
យ៉ាងណាក៏ដោយ អ្នកជំនាញមួយចំនួនបានលើកឡើងថាការឡើងថ្លៃនៃសេវាកម្មនៅពេលមានបុណ្យទានគឺជារឿងធម្មតា ប៉ុន្តែបានលើកឡើងថាកុំឱ្យដំឡើងថ្លៃហួសហេតុពេកនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ