ស្លាប់ ៤៣នាក់ ដោយសារខ្យល់កន្ត្រាក់ និងរន្ទះបាញ់ គិតត្រឹម ៥ខែដើមឆ្នាំ
គិតត្រឹមរយៈពេល ៥ខែ ដើមឆ្នាំ ២០១៧នេះ បាតុភូតខ្យល់កន្ត្រាក់ និងរន្ទះបាញ់ បានឆក់យកជីវិតពលរដ្ឋកម្ពុជា សរុប ៤៣នាក់ និងបណ្តាលឲ្យរបួស ៧៩នាក់។ នេះបើតាមរបាយការណ៍ របស់ គណៈកម្មាធិការជាតិគ្រប់គ្រងគ្រោះមហន្តរាយ។ បាតុភូតធម្មជាតិខ្យល់រន្ទះនេះ បានកើតមានតំណាលគ្នានឹងបាតុភូតភ្លៀងកក់ខែ ហើយនឹងបន្តកើតមានរហូតដល់ផុតរដូវវស្សា នៅកម្ពុជា។
ចុះផ្សាយនៅថ្ងៃ៖
ស្តាប់ - ០២:០០
អ្នកនាំពាក្យ គណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី បានបញ្ជាក់ប្រាប់វិទ្យុបារាំង RFI នៅថ្ងៃពុធនេះថា គិតចាប់ពី ខែមករា ដល់ខែឧសភា ឆ្នាំ២០១៧ នៅកម្ពុជា កើតមានបាតុភូត រន្ទះបាញ់ ដែលបានផ្តាច់ជីវិតពលរដ្ឋ ៤១នាក់ ក្នុងនោះមានស្ត្រី ១៣នាក់ ព្រមទាំងបណ្តាលឲ្យ របួស ៤៤នាក់ ងាប់គោក្របី ៤៧ក្បាល និងបំផ្លាញផ្ទះសម្បែងអស់ ៥ខ្នង។ ក្នុងពេលជាមួយគ្នានេះ បាតុភូតខ្យល់កន្ត្រាក់ បានកើតមានចំនួន ៩៩លើក ក្នុងរាជធានីខេត្ត ចំនួន ២០ ដែលសម្លាប់មនុស្ស ២នាក់ បង្កឲ្យរបួស ៣៥នាក់ ព្រមទាំងធ្វើឲ្យផ្ទះដួលរលំ និងខូចខាតធ្ងន់ធ្ងរ ៣៣៩ខ្នង ផ្ទះរបើកដំបូលខូចខាតមធ្យមជាង ២៣៩#ខ្នង របើកដំបូលអគារសាលារៀន អគារផ្សេងៗ ៤៨អគារ និងបង្កការខូចខាតដល់ផលដំណាំកៅស៊ូ និងតាង៉ែងជាច្រើន ជាពិសេសនៅក្នុងខេត្តកំពង់ធំ ព្រះសីហនុ បាត់ដំបង។
បើធៀបនឹងរយៈពេល ៥ខែដូចគ្នា ក្នុងឆ្នាំ២០១៦ បាតុភូតរន្ទះបាញ់ កើតមានប្រហាក់ប្រហែលគ្នា ខណៈខ្យល់កន្ត្រាក់ មានការថយចុះ ពាក់កណ្តាល។ បើតាម គណៈកម្មាធិការជាតិគ្រប់គ្រងគ្រោះមហន្តរាយ ចាប់ពីខែមករា ដល់ខែឧសភា ឆ្នាំមុន បាតុភូត រន្ទះបាញ់ វិញ បានបញ្ចប់ជីវិតមនុស្ស ៤០នាក់ របួស ៤៨នាក់ និងសម្លាប់ គោក្របីសរុប ២៩ក្បាល។ ចំណែក បាតុភូតខ្យល់កន្ត្រាក់ កើតមាន ១២៤លើក នៅក្នុង ២១រាជធានីខេត្ត បានសម្លាប់មនុស្ស ៧នាក់ បង្កឲ្យរបួស ១០៦នាក់ ធ្វើឲ្យខូចខាតផ្ទះសម្បែងអស់ ៩៩១ខ្នង របើកដំបូលឬខូចខាតផ្ទះមធ្យមសរុប ៤៥៩៥ខ្នង ខូចខាត សាលារៀន និងអគារផ្សេងៗ ៥៣ អគារ ។
គួរជម្រាបថា បាតុភូតខ្យល់កន្ត្រាក់ និងរន្ទះបាញ់ក្នុងឆ្នាំ ២០១៧នេះ ផ្តើមកើតមានស្របពេលនឹងរដូវភ្លៀងកក់ខែ ពោលគឺ ចាប់ពីខែមករា ហើយនឹងកើតឡើងខ្លាំងបំផុតនៅ អំឡុងខែមេសា ដល់ខែមិថុនា ក្នុងពេលផ្លាស់ប្តូររដូវប្រាំង ចូលវស្សា និងបន្តកើតមានរហូតដល់ចប់រដូវវស្សា ក្នុងខែវិច្ឆិកាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ