កម្មករមិនទាន់មានសុវត្ថិភាពនៅពេលការអនុវត្តច្បាប់មិនទាន់តឹងតែងទៅលើរថយន្តដឹកជញ្ជូន
ចុះផ្សាយនៅថ្ងៃ៖
ស្តាប់ - ០៤:៥៩
បញ្ហាប្រឈមរបស់កម្មករកាត់ដេរ ទាក់ទងទៅនឹងគ្រោះថ្នាក់ចរាចរណ៍ នឹងមិនអាចដោះស្រាយបានទេ ប្រសិនបើការអនុវត្តច្បាប់ចរាចរណ៍មិនត្រូវបានរឹតបន្តឹងចំពោះរថយន្តដឹកកម្មករ ដែលខុសលក្ខណៈបច្ចេកទេស។ ជាក់ស្តែងមិនដល់ ១ឆ្នាំផងនៅឆ្នាំ ២០១៦នេះ ដោយសាររថយន្តដឹកជញ្ជូន ដែលគ្មានសុវត្ថិភាព កម្មករជាង ១០នាក់បានស្លាប់ ជាង ៤០០នាក់ទៀត រងរបួស ក្នុងនោះកម្មករខ្លះបាត់បង់លទ្ធភាពពលកម្ម។
ស្ងាត់ស្ងៀមមិនបានយូរប៉ុន្មានឡើយ ដំណឹងស្តីពីគ្រោះថ្នាក់ចរាចរណ៍ ក្នុងចំណោមកម្មករកាត់ដេរ បានកើតមានជាថ្មីកាលពីថ្ងៃអង្គារម្សិលមិញ។ ពីខេត្តស្វាយរៀង ក្រសួងការងារបានរាយការណ៍ថា មានកម្មករ កម្មការិនីកាត់ដេរចំនួន ១២នាក់ បានរងរបួសធ្ងន់-ស្រាល ដោយសារជួបគ្រោះថ្នាក់ចរាចរណ៍រវាងរថយន្តដឹកកម្មករ ជាមួយនឹងរថយន្តដឹកទំនិញពិព័រណ៌ថៃ។
នេះជាលើកទី ១៣ ហើយ ក្នុងរយៈពេល ១០ខែក្នុងឆ្នាំ ២០១៦នេះ ដោយមិនបាននិយាយពីករណីបន្ទាប់បន្សំ ដែលមិនមានលក្ខណៈធ្ងន់ធ្ងរនោះផង។ ឧបទ្ទវហេតុគ្រោះថ្នាក់រថយន្តដឹកកម្មករជាង ១០លើកមកនេះ ធ្វើឲ្យកម្មករជាង ១០នាក់ បាត់បង់ជីវិត និងជាង ៤០០នាក់ រងរបួសធ្ងន់ និងស្រាល។ អ្វីដែលជាការកត់សម្គាល់ គឺកម្មករជួបគ្រោះថ្នាក់ចរាចរណ៍ជាប់ៗគ្នាចំនួន ៥លើក តែនៅក្នុងខែតុលាមួយគត់។
តាមរយៈកំណើនគ្រោះថ្នាក់ចរាចណ៍ទាក់ទងទៅនឹងរថយន្តដឹកកម្មករដ៏ញឹកញាប់បែបនេះ បង្ហាញថា សុវត្ថិភាពនៃការដឹកជញ្ជូនកម្មករ កាន់តែមានការប្រឈមខ្លាំងទៅៗ ដោយមិនឃើញមានចំណាត់ការណាមួយ ជួយឲ្យស្ថានភាពនេះធូរស្រាលប្រកបដោយប្រសិទ្ធិភាពនៅឡើយ។ ទោះយ៉ាងណា គេកត់សម្គាល់ថា ករណីគ្រោះថ្នាក់ចរាចរណ៍ ដែលកើតមានចំពោះរថយន្ត បើកបរដឹកកម្មកររោងចក្រនេះ ជាបញ្ហាដដែលៗ ជាច្រើនឆ្នាំកន្លងមកនេះ ដែលមិនអាចដោះស្រាយរួចសម្រាប់កាលៈទេសៈបច្ចុប្បន្ន។
ជាការពិតរថយន្តដឹកកម្មករកាត់ដេរសព្វថ្ងៃ សុទ្ធតែខុសលក្ខណៈបច្ចេកទេស និងផ្ទុយពីច្បាប់ចរាចរណ៍ជាច្រើនចំណុច។ អ្វីដែលមិនមានការកែប្រែនោះគឺ ការច្នៃរថយន្តតួរីស ផ្ទុកមនុស្ស១២កៅអី ឲ្យទៅជារថយន្ត ដែលផ្ទុកមនុស្សពី ២០ទៅ ៣០នាក់។ រថយន្តទ្រុង ដែលដាក់មនុស្សពី ២០ ទៅ ៣០នាក់ ច្នៃទៅជារថយន្ត ដែលអាចផ្ទុកមនុស្សបានរហូត ៥០ ទៅ ៦០នាក់។ រថយន្តទាំងនេះនៅតែបើកបរដឹកកម្មករបានជាធម្មតា បើទោះណាជាមានច្បាប់ចរាចរណ៍សម្រាប់ អនុវត្ត និងរឹតបន្តឹងឲ្យមានការគោរពយ៉ាងណាក៏ដោយ។
ស្ថានភាពនយោបាយនៅក្នុងកម្រិតប្រកួតប្រជែង បានជះឥទ្ធិពលទៅដល់ការអនុវត្តច្បាប់ផងដែរ។ ជះឥទ្ធិពលដោយសារការរឹតបន្តឹងទៅលើការគោរពច្បាប់ចរាចរណ៍ មានភាពធូររលុងនិងអនុគ្រោះច្រើន។ ទាក់ទងទៅនឹងសុវត្ថិភាពនៃរថយន្តដឹកកម្មករនេះ កន្លងមកក៏ដូចជាបច្ចុប្បន្ន គណៈកម្មាធិការជាតិសុវត្ថិភាពចរាចរណ៍ បានចាប់អារម្មណ៍ និងមានដំណោះស្រាយដែរ ក៏ប៉ុន្តែ មិនទាន់មានជាលទ្ធផលដុំកំភួននៅឡើយ ដោយសារការដោះស្រាយចំណុចមួយចំនួនដូចជាគម្រោង ប្តូររថយន្តក្រុងដឹកកម្មករ ជំនួសរថយន្តទ្រុង ដែលគ្មានសុវត្ថិភាពមិនទាន់អនុវត្តបាន។ ការរំកិលរោងចក្រទៅជិតភូមិកម្មករ និងការដោះស្រាយកន្លែងស្នាក់របស់កម្មករនៅក្នុងក្រុមហ៊ុន ឬរោងចក្រ នៅមិនទាន់អាចធ្វើទៅបាន។ រីឯឥរិយាបទអ្នកបើកបររថយន្តដឹកកម្មករមួយចំនួន គឺនៅអាក្រក់ដដែល មិនមានការផ្លាស់ប្តូរ បើទោះណាជាសមត្ថកិច្ច បានចុះទៅបង្ហាត់បង្រៀន វគ្គខ្លីៗស្តីពីសុវត្ថិភាពចរាចរណ៍នៅតាមរោងចក្រក៏ដោយ។
ជារួម ដើម្បីកាត់បន្ថយ ឬបញ្ចប់គ្រោះថ្នាក់ចរាចរណ៍ចំពោះរថយន្តដឹកកម្មករកាត់ដេរ គេគួរតែអនុវត្តវិធានការច្បាប់ឲ្យបានម៉ឺងម៉ាត់។ ការដឹកជញ្ជូនលើសចំណុះ ដែលខុសលក្ខណៈបច្ចេកទេស មិនគួរត្រូវបានអនុញ្ញាត។ អ្នកបើកបរមួយចំនួន ដែលចេះកាន់ចង្កូតតៗគ្នាពីសាច់ញាតិ ពីឪពុករបស់ខ្លួន គួរមានការរៀនសូត្រឲ្យបានច្បាស់លាស់ពីច្បាប់ចរាចរណ៍ និងរបៀបបើកបរ និងត្រូវមានបណ្ណបើកបរឲ្យបានគ្រប់គ្នា។
អាជ្ញាធរ និងផ្នែកពាក់ព័ន្ធដូចជារោងចក្រ សហគ្រាស ត្រូវមានផែនការបណ្តុះបណ្តាលរំលឹក ដើម្បីទាញការធ្វេសប្រហែស និងកំហុសឆ្គងរបស់អ្នកបើកបរក្មេងៗ ឲ្យមកជាការប្រុងប្រយ័ត្នជាប់ជានិច្ចក្នុងការធ្វើចរាចរណ៍។ មួយវិញទៀត ឥរិយាបទអ្នកបើកបរ សំខាន់ណាស់ មាននន័យថា ត្រូវប្តូររបៀបបើកបរខុសឆ្គងរបស់គេ នៅពេលដែលផ្លូវថ្នល់ និងចំនួនយានយន្តមានការវិវត្តកាន់តែច្រើន។ ពោលគឺពួកគេមិនអាចប្រើប្រាស់ឥរិយាបទបើកបរដូច ១០ ឬ២០ឆ្នាំមុនបានទេ ខណៈពេលនោះចំនួនយានយន្ត ដែលធ្វើចរាចរណ៍តាមដងផ្លូវនៅតិចតួចនៅឡើយ។
ដូច្នេះ បើច្បាប់ចរាចរណ៍ មិនត្រូវបានគេយកទៅអនុវត្តដោយតឹងតែងទេជាពិសេសជាមួយនឹងឥរិយាបទបើកបរដ៏ខុសឆ្គង និងការផ្ទុកលើសចំណុះ ខុសបច្ចេកទេស នោះការប្រឈមគ្រោះថ្នាក់រថយន្តដឹកកម្មករកាត់ដេរនឹងមិនត្រូវបានដោះស្រាយនោះទេ។ ផ្ទុយទៅវិញមានតែបង្កើតឲ្យមានសោកនាដកម្មក្នុងចំណោមកម្មករកាត់ដេរកាន់តែច្រើន ហើយការរងរបួសសន្ធឹកសន្ធាប់របស់កម្មករ នឹងក្លាយជាបន្ទុកសង្គម និងគ្រួសារមួយទៀតដោយសារតែជនរងគ្រោះ ជាកម្មករបាត់បង់កម្លាំងពលកម្មការងារ ជួយរកចំណូលគ្រប់គ្រងគ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ