ការផ្សព្វផ្សាយច្បាប់ចរាចរណ៍ពេលបុណ្យភ្ជុំបិណ្ឌ អាចកាត់បន្ថយគ្រោះថ្នាក់ចរាចរណ៍?
គ្រោះថ្នាក់ចរាចរណ៍ជាមហន្តរាយទី១ ដែលបណ្តាលឱ្យមានអ្នកសា្លប់ច្រើនជាងគេ នៅក្នុងប្រទេសកម្ពុជា។ ៦០% នៃអ្នកស្លាប់ដោយសារគ្រោះថ្នាក់ចរាចរណ៍ គឺបណ្តាលមកពីការបើកបលើសល្បឿនកំណត់និងការបើកបរក្រោមឥទ្ធិពលនៃគ្រឿងស្រវឹង។ ហើយអ្វីដែលជាការកត់សម្គាល់គឺ ឱ្យតែដល់បុណ្យជាតិម្តងៗ ចំនួននៃអ្នកស្លាប់នៅលើទ្រូងផ្លូវមានការកើនឡើង។ ហេតុដូចនេះហើយឆ្លៀតនៅក្នុងពិធីបុណ្រភ្ជុំបិណ្ឌឆ្នាំនេះ នគរបាលចរាចរប្រកាសដាក់ចេញនៅគោលដៅចុះអប់រំផ្សព្វផ្សាយច្បាប់ចរាចរណ៍ ក៏ដូចជាគោលដៅត្រួតពិនិត្យ និងផាកពិន័យយ៉ាងធ្ងន់ធ្ងរ ដល់អ្នកបើកបរ ដែលមិនគោរពច្បាប់។អត្ថបទដោយ ប៉ុន សោភ័ណ៖
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ចាប់តាំងតែពីថ្ងៃទី ១៧ ខែកញ្ញា មកទល់នឹងថ្ងៃនេះ អគ្គស្នងការដ្ឋាននគរបាលជាតិបានធ្វើការផ្សព្វផ្សាយពីច្បាប់ចរាចរណ៍ផ្លូវគោកនៅតាមគោលដៅសំខាន់ៗមួយចំនួនដូចជា នៅតាមគោលដៅដើមទី និងនៅតាមរាជធានីខេត្តនានា ដើម្បីចុះអប់រំផ្សព្វផ្សាយដល់ម្ចាស់រថយន្ដឈ្នួល និងអ្នកបើកបរទាំងអស់នៅក្នុងឱកាសបុណ្យភ្ជុំបិណ្ឌនេះ។ អគ្គស្នងការដ្ឋាននគរបាលជាតិក៏បានរៀបចំក្រុមត្រួតពិនិត្យជាប្រចាំនៅគ្រប់ផ្លូវជាតិទាំងអស់ ដើម្បីរឹតបន្តឹង និងដាក់វិន័យដល់អ្នកបើកបរ ដែលមិនគោរពច្បាប់ចរាចរណ៍។ លើសពីនេះ ការចុះអប់រំផ្សព្វផ្សាយនៅតាមចំណតរថយន្ដធំៗក្នុងរាជធានីភ្នំពេញក៏ជាគោលដៅសំខាន់មួយរបស់អគ្គស្នងការដ្ឋាននគរបាលជាតិនៅក្នុងឱកាសបុណ្យភ្ជុំបិណ្ឌនេះផងដែរ។
ជាក់សែ្តងមកទល់នឹងថ្ងៃនេះ មន្រ្តីជាន់ខ្ពស់នៃនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានចុះទៅដល់គោលដៅធំៗចំនួន៤ រួមមានចំណតរថយន្ត នៅផ្សារថ្មី ផ្សារសូរិយា ផ្សារអូឬស្សី និងផ្សារដើមគរ។ នេះបើតាម ឧត្តមសេនីយ៍ទោ ទី ឡុង ប្រាប់វិទ្យុបារាំងអន្តរជាតិ។
ចំពោះចំណាត់ការខាងលើ ត្រូវបាន លោក អ៊ា ចរិយា មន្ត្រីជំនាញនៅវិទ្យាស្ថានសុវត្តិភាពចរាចរណ៍មើលឃើញថា ជាការល្អ។ ចាប់តាំងពីដើមឆ្នាំ២០១៦មក រដ្ឋាភិបាលមានការចូលរួមបានល្អប្រសើរ និងមានភាពរីកចម្រើនជាងឆ្នាំមុន។ ប៉ុន្តែលោកសូមជំរុញឱ្យមន្រ្ដីនគរបាល ចរាចរពង្រឹងការអនុវត្ដច្បាប់ និងបង្កើនការត្រួតពិនិត្យលើការបើកបរលើសល្បឿនកំណត់ ឱ្យបានពេញលេញ ទៀងទាត់ និងម៉ឺងម៉ាត់បំផុត ដើម្បីកាត់បន្ថយគ្រោះមហន្តរាយនៅលើដងផ្លូវថ្នល់។
គួរជម្រាបជូនថា កាលពីឆ្នាំ២០១៥ អ្នកស្លាប់ដោយសារគ្រោះថ្នាក់ចរាចរណ៍មានចំនួន ៤៨នាក់ និងរបួស ១៣០នាក់ គិតក្នុងរយៈពេល ៥ថ្ងៃ មុននិងក្រោយបុណ្យភ្ជុំបិណ្ឌ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ