ការស្លាប់និងរបួសរបស់កម្មករតាមរយៈគ្រោះថ្នាក់ចរាចរណ៍ជាបន្តបន្ទាប់បង្ហាញពីតម្រូវការច្បាប់ចរាចរណ៍
ចុះផ្សាយនៅថ្ងៃ៖
ស្តាប់ - ០៥:៣៦
ច្បាប់ចរាចរណ៍កម្ពុជាត្រូវបានតាក់តែងឡើង មិនខុសគ្នាពីច្បាប់ចរាចរណ៍នៅប្រទេសដទៃនោះទេ។ អ្វីដែលខុសគ្នា គឺការអនុវត្តច្បាប់នៅក្នុងបរិបថសង្គមកម្ពុជាពេលនេះ មានការប្រទាំងប្រទិសលើមាត្រាមួយចំនួន ដែលជាក់ស្តែងច្បាប់ដែលមានចរិកចាប់បង្ខំមិនអាចធ្វើទៅតាមនិយមន័យនេះបាន។ មិនបានដោយសារប្រជាជនកម្ពុជាដែលជាអ្នករស់នៅក្រោមបន្ទាត់ច្បាប់ត្រៀមលក្ខណៈមិនទាន់ និងមានការពិបាកផ្លាស់ប្តូរទម្លាប់។
«ប្រទេសមានច្បាប់ ផ្ទះមានម្ចាស់» វាជាក្រិត្យក្រុមដែលពិភពលោកទាំងមូលនាំគ្នាអនុវត្តតាមបើពុំដូច្នោះទេ នោះភាពរញ៉េរញ៉ៃ បាត់បង់សណ្តាប់ធ្នាប់នឹងកើតមានជាក់ជាមិនខាន។ មើលមកប្រទេសកម្ពុជា ជាលើកដំបូងហើយបន្ទាប់ពីច្រើនទសវត្ស ដែលការអនុវត្តច្បាប់ទទួលរងប្រតិកម្មពីប្រជាពលរដ្ឋជាទូទៅ គឺការអនុវត្តច្បាប់ចរាចរណ៍។ ច្បាប់ដែលគេរំពឹងថាអាចជួយកាត់បន្ថយការស្លាប់របស់មនុស្សខ្មែរ ឲ្យមកនៅត្រឹមកំរិតទាបណាមួយ ហើយដែលបានចាប់ផ្តើមកាលពីថ្ងៃទី១មករាកន្លងទៅនេះ។
ការអនុវត្តច្បាប់ចរាចរណ៍នៅកម្ពុជាពេលនេះ ជាសញ្ញាអបអរសាទរមួយ ដែលថាប្រទេសកំពុងអភិវឌ្ឍន៍មួយនេះចាប់ផ្តើមនាំផ្លូវមនុស្សទៅរកភាពត្រឹមត្រូវនៅតាមដងផ្លូវ។ ទន្ទឹមនឹងនេះវាជាសញ្ញាអវិជ្ជមានផងដែរ ដែលច្បាប់នេះគ្រាន់តែដាក់ឲ្យអនុវត្តទៅមិនដល់មួយសប្តាហ៍ផងមានប្រតិកម្មព្រោងព្រៀត ជ្រួលច្របល់មិនដែលធ្លាប់ឃើញ។
តាមពិតការធ្វើច្បាប់មិនមែនដើម្បីគាបសង្កត់ឬធ្វើបាបប្រជាពលរដ្ឋនោះទេ ដោយសារទីមួយអ្នកធ្វើច្បាប់សុទ្ធសឹងជាបុគ្គលដែលកើតចេញពីប្រជាពលរដ្ឋ ជាអ្នកផ្តល់ទំនុកចិត្ត តាមរយៈការបោះឆ្នោតបែបប្រជាធិបតេយ្យ។ ហើយច្បាប់នីមួយៗដែលបានសរសេរឡើង និងបានឆ្លងកាត់ជាច្រើនដំណាក់កាលសុទ្ធតែបានផ្អែកទៅលើស្ថានភាពជាក់ស្តែងនៅប្រទេសកម្ពុជានិងការសំយោគពីច្បាប់នានាពីបរទេសផងដែរ។ ពោលគឺជំពូកឬមាត្រានានានៅក្នុងច្បាប់ចរាចរណ៍ខ្មែរមិនមានអ្វីប្លែកពីប្រទេសគេនោះទេ ហើយមានចំណុចខ្លះមានលក្ខណៈ ខ្សោយឬមិនសូវតឹងតែងជាងប្រទេសគេទៅទៀត។ ច្បាប់ចរាចរណ៍ក៏ជាស្នូរជួងបន្លឺឲ្យពលរដ្ឋខ្មែរដែលមិនដែលខ្វល់រឿងច្បាប់ទំលាប់សោះកន្លងមក បែរជាចាប់អារម្មណ៍និងទៅរកច្បាប់ជាបន្តបន្ទាប់។
ក៏ប៉ុន្តែហេតុអ្វីបានជាមានភាពចំរូងចំរាស់នៅពេលអនុវត្តច្បាប់ចរាចរណ៍យ៉ាងនេះ? គេអាចនិយាយថាប្រជាជនខ្មែរមិនធ្លាប់មានទំលាប់គោរពច្បាប់កន្លងមកដែលមានភាពម៉ត់ចត់ដូចជាការអនុវត្តច្បាប់ចរាចរណ៍នៅពេលនេះ។ ការគោរពច្បាប់និងការអនុវត្តច្បាប់របៀបប្រលេមប្រឡំកន្លងមកសឹងតែក្លាយជាសភាវកតិទៅហើយ ដែលស្ទើរតែមិនអាចផ្លាស់ប្តូរផ្នត់គំនិតបាន។ លទ្ធផលនៃការអនុវត្តច្បាប់ដោយមិនច្បាស់លាស់ បានធ្វើឲ្យស្ថិតិនៃការស្លាប់ដោយសារចរាចរណ៍ពីមួយថ្ងៃទៅមួយថ្ងៃក្នុងរង្វង់៦នាក់នោះ មិនអាចថយចុះបាន។
ឧទាហណ៍ជាក់ស្តែង នៅតែបង្ហាញឥតដាច់គឺកាលពីថ្ងៃអង្គារកន្លងទៅនេះកម្មករចំនួន៤នាក់បានស្លាប់និងរាប់សិបនាក់ទៀតរងរបួសដោយសារតែការបើកបរជែងគ្នាមិនគោរពច្បាប់នៅខេត្តកំពង់ស្ពឺ។ អ្វីដែលជាកំហុសឆ្គងនឹងច្បាប់ចរាចរណ៍នោះគឺការយករថយន្តដឹកទំនិញទៅដឹកមនុស្សយ៉ាងពេញណែន ឈរប្រតោងគ្នា យោលយោកដូចទោង។ ស្ថានភាពនេះគ្រោះថ្នាក់ណាស់ វានឹងកើតមានបន្តទៀត ប្រសិនបើទាំងអ្នកបើកបរ ទាំងកម្មករកាត់ដេរមិននាំគ្នារត់ទៅរកច្បាប់ ហើយច្បាប់មិនរត់ទៅរកពួកគេ និងចាប់បង្ខំពួកគេឲ្យគោរព។
ការដែលមានច្បាប់មួយរួមមាន១២ជំពូកនិងជិត១០០មាត្រានោះ មានអ្វីមិនល្អ។ ក៏ប៉ុន្តែបរិបទប្រទេសកម្ពុជាពេលនេះ ចំណុចមួយចំនួនពិតជាមិនអាចទទួលយកបានដោយបង្ខំនោះទេ។ មិនអាចទទួលយកបានដោយសំដៅទៅលើមាត្រាមួយចំនួន ទាក់ទងទៅនឹងការផាកពិន័យច្រើនៗ ខណៈដែលប្រជាជនជាច្រើននៅមានជីវភាពក្រីក្រនៅឡើយ។
នៅពេលដែលពួកគេរៀបចំខ្លួនបំពេញឲ្យគ្រប់លក្ខណៈសម្បត្តិទាំងមនុស្សទាំងយានយន្ត ឃើញថាវាជាពេលវេលា ដែលជនឱកាសនិយមមួយចំនួនកាប់ដូចសាច់នៅលើជ្រុញដូច្នោះដែរ។ ជាក់ស្តែង ការធ្វើប័ណ្ណបើកបរ ការកាត់ឈ្មោះយានយន្តជាច្រើនតំណរមកម្ចាស់បច្ចុប្បន្ន ការប្រជ្រៀតគ្នាយករថយន្តទៅឆៀក។ល។និង។ល។ បើកុំតែប្រមុខរដ្ឋាភិបាលមានការយោគយល់ទាន់ពេលវេលា ម្ល៉េះសម គ្រប់គ្នាត្រូវឡើងទៅលើជ្រុញមែនទែនហើយ។
ទោះយ៉ាងនេះក្តី រដ្ឋត្រូវទទួលស្គាល់ថាទាំងនេះជាចំណុចខ្សោយមួយដែលត្រូវពិចារណាឡើងវិញ ដោយហេតុថា មុនដំបូងបំផុតត្រូវតែមានការផ្សព្វផ្សាយច្បាប់នេះដល់ប្រជាពលរដ្ឋឲ្យបានដឹងច្រើនគ្នាសិន។ ការផ្សព្វផ្សាយដោយលំៗ ដោយមិនទទួលបានចំលើយពីប្រជាជនពីកំរិតនិងបរិមាណយល់ដឹងពីច្បាប់ ហើយអនុវត្តបែបនេះពិតជាមិនអាចធ្វើទៅបានទេ។
ដូច្នេះអាជ្ញាធររដ្ឋាភិបាលគួរតែធ្វើច្បាប់ផង អនុវត្តច្បាប់ខ្លួនឯងជាគំរូគេ ដោយមិនប្រកាន់បក្សពួក អ្នកធំ អ្នកមាន និងស្វែងយល់ពីការអនុវត្តចំណុច១ចំនួនដែលជាគំនាបលើប្រជាជន អ្នកគោរពច្បាប់។ ការផ្តល់ឱកាសអន្តរកាលមួយរបស់រដ្ឋាភិបាល និងដកឃ្លាទៅធ្វើវិសោធនកម្មមាត្រាខ្លះនៃច្បាប់ចរាចរណ៍ វាជាការល្អ។ ក៏ប៉ុន្តែបើធ្វើបែបនេះគ្រប់តែច្បាប់វាអាចជះឥទ្ធិពលមិនល្អដល់តំលៃនិងកិត្យានុភាពនៃច្បាប់ ដែលអ្នកធ្វើច្បាប់ប្រជុំដោយ បញ្ញវន្ត បណ្ឌិត អត្ថកោវិទ និងអ្នកជំនាញចំណានៗ។
លើសពីនេះ ច្បាប់ចរាចរណ៍ ក៏ជាមេរៀនមួយដែរ សម្រាប់អ្នកធ្វើច្បាប់ ក្នុងការពិចារណាការធ្វើច្បាប់ក្រោយៗទៀត ដោយគេមិនអាចធ្វើច្បាប់មួយតំណាងឲ្យជាតិទាំងមូលប្រជុំដោយបញ្ញវន្ត ហើយចាត់ទុកជាបទពិសោធន៍បានទេ នៅពេលដែលអនុវត្តភ្លាម លុបចោលភ្លែតនូវចំណុចមួយចំនួនដូចជាច្បាប់ចរាចរណ៍នេះជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ