កម្មកររងគ្រោះដោយសារគ្រោះថ្នាក់ចរាចរណ៍នៅកំពង់ស្ពឺ បន្តចាកចេញពីមន្ទីរពេទ្យ ខណៈសមត្ថកិច្ចកំពុងតាមប្រមាញ់តៃកុងឡានបង្កហេតុ
កម្មកររងគ្រោះដោយសារគ្រោះថ្នាក់ចរាចរណ៍នៅស្រុកគងពិសី ខេត្តកំពង់ស្ពឺ កាលពីម្សិលមិញ បានធូរស្រាលច្រើនហើយ នៅថ្ងៃពុធនេះ។ អ្នកដែលសម្រាកព្យាបាលនៅមន្ទីរពេទ្យបង្អែកខេត្ត បន្តចាកចេញពីមន្ទីរពេទ្យ ទៅសម្រាកព្យាបាលនៅផ្ទះ ខណៈសមត្ថកិច្ចខេត្តកំពង់ស្ពឺ កំពុងតាមប្រមាញ់តៃកុងឡានបង្កហេតុ។ តៃកុងឡាន បង្កហេតុ ដែលបានរត់គេចខ្លួនបាត់ស្រមោលតាំងពីពេលកើតហេតុ នៅព្រឹកថ្ងៃអង្គារម្សិលមិញ។
ចុះផ្សាយនៅថ្ងៃ៖
ស្តាប់ - ០២:០៥
ស្ថានភាពសុខភាពកម្មករដែលរងរបួស នៅក្នុងគ្រោះថ្នាក់ចរាចរណ៍ក្រឡាប់ឡាន នៅស្រុកគងពិសី ខេត្តកំពង់ស្ពឺ បានធូរស្រាលច្រើនហើយនៅថ្ងៃពុធនេះ បន្ទាប់ពីបានសម្រាកព្យាបាលអស់ពេលមួយយប់រួចមក។ អ្នករងរបួសស្រាល ដែលសម្រាកព្យាបាលនៅមន្ទីរពេទ្យគងពិសី មន្ទីរពេទ្យថ្នល់ទទឹង និងមន្ទីរពេទ្យបង្អែកខេត្ត បានបន្តចាកចេញពីមន្ទីរពេទ្យជាបន្តបន្ទាប់។ ដោយឡែក ចំពោះអ្នករងរបួសធ្ងន់ចំនួន៨នាក់ផ្សេងទៀត បន្តស្នាក់នៅព្យាបាលរបួសនៅមន្ទីរពេទ្យកាល់ម៉ែត្រ ក្រុងភ្នំពេញ មិនទាន់ចាកចេញនៅឡើយទេ។ នេះគឺជាការបញ្ជាក់ប្រាប់របស់លោក ជាវ ប៊ុនរិទ្ធ អ្នកនាំពាក្យបេឡាជាតិរបបសន្តិសុខសង្គម ហៅកាត់ថា បសស។ បសស ដែលជាស្ថាប័នទទួលបន្ទុករ៉ាប់រងទាំងអស់ នូវរាល់ការចំណាយថ្លៃព្យាបាល។ បើតាមលោក ជាវ ប៊ុនរិទ្ធ បសស ក៏បានផ្ដល់ថវិកាឧបត្ថម្ភដល់គ្រួសារអ្នកស្លាប់ក្នុងសោកនាដកម្មគ្រោះថ្នាក់ចរាចរណ៍នេះដែរ ដោយក្នុងនោះ មួយគ្រួសារទទួលបានថវិកា៤លានរៀល និងប្រាក់អត្ថប្រយោជន៍ផ្សេងៗទៀត។
សូមរំលឹកថា នៅព្រឹកព្រលឹមថ្ងៃអង្គារ ទី១២មករា គ្រោះថ្នាក់ចរាចរណ៍ដ៏រន្ធត់មួយបានកើតឡើង ដោយសាររថយន្តដឹកកម្មករមួយគ្រឿង បានបើកជែងជាមួយរថយន្តដឹកកម្មករមួយគ្រឿងទៀត ដែលបើកស្របទិសគ្នា។ ខណៈពេលកំពុងជែងនោះ ក៏វាក់នឹងរថយន្តដឹកទំនិញដែលបើកបញ្ច្រាសទិសគ្នា បង្ខំឲ្យរថយន្តដឹកកម្មករគេចចូលមកក្នុងគន្លងផ្លូវរបស់ខ្លួនវិញ ប៉ះជាមួយឡានដឹកកម្មករដូចគ្នា បណ្ដាលឲ្យធ្លាក់ផ្លូវក្រឡាប់។ ហេតុការណ៍នេះ កើតឡើងនៅតាមផ្លូវជាតិលេខ៤១ ព្រំប្រទល់ស្រុកគងពិសី និងស្រុកសំរោងទង ខេត្តកំពង់ស្ពឺ បណ្ដាលឲ្យមនុស្សយ៉ាងហោចណាស់៤នាក់ស្លាប់ និង៦៨នាក់ផ្សេងទៀតរងរបួស។
ភ្លាមៗក្រោយគ្រោះថ្នាក់នោះ តៃកុងឡានបង្កហេតុបានរត់គេចខ្លួនបាត់ស្រមោល។ ប៉ុន្តែអធិការរងស្រុកគងពិសី ទទួលបន្ទុកចរាចរណ៍ និងសណ្ដាប់ធ្នាប់ លោក សុខ សុផល បញ្ជាក់ប្រាប់វិទ្យុបារាំងនៅថ្ងៃពុធនេះថា សមត្ថកិច្ច កំពុងតែតាមប្រមាញ់តៃកុងឡានរូបនេះហើយ ព្រោះគេស្គាល់អត្តសញ្ញាណច្បាស់ណាស់។
គួរជម្រាបជូនថា គ្រោះថ្នាក់ចរាចរណ៍ដែលបណ្ដាលឥ្យកម្មកររោងចក្ររងរបួសនិងស្លាប់ជាច្រើននាក់ដូច្នេះ មិនមែនជារឿងថ្មីទេនៅកម្ពុជា។ កាលពីឆ្នាំ២០១៥ គ្រោះថ្នាក់ចរាចរណ៍រវាងឡានក្រុងដឹកអ្នកដំណើរ ជាមួយរថយន្តដឹកកម្មករ នៅខេត្តស្វាយរៀង បានសម្លាប់មនុស្ស១៨នាក់ និងរងរបួសធ្ងន់ស្រាល២១នាក់ផ្សេងទៀត។ ក៏មានដែរ គ្រោះថ្នាក់ចរាចរណ៍រវាងឡានដឹកកម្មករ២គ្រឿង បណ្ដាលឲ្យកម្មករ៨២នាក់រងរបួស នៅខេត្តស្វាយរៀង។ ក្រសួងការងារ បេឡាជាតិរបបសន្តិសុខសង្គម និងអង្គការសង្គមស៊ីវិល ពាក់ព័ន្ធបានធ្វើការអប់រំផ្សព្វផ្សាយណាស់ដែរ អំពីសុវត្ថិភាពចរាចរណ៍ដល់កម្មករ និងអ្នកបើកឡានដឹកកម្មករ។ ប៉ុន្តែអត្រាគ្រោះថ្នាក់ ហាក់ដូចជាមិនបានថមថយឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ