តំណាងរាស្ត្រសង្រ្គោះជាតិពីររងរបួសក្នុងបាតុកម្មទាមទារទម្លាក់ លោក កឹម សុខា
ប្រជាពលរដ្ឋប្រមាណជាង២ពាន់នាក់នៅព្រឹកចន្ទ ទី២៦ តុលានេះ បានធ្វើបាតុកម្មទាមទារឲ្យរដ្ឋសភាបោះឆ្នោតទម្លាក់ លោកកឹម សុខា អនុប្រធានរដ្ឋសភាកូតាគណបក្សង្គ្រោះជាតិ។ ក្នុងបាតុកម្មដែលធ្វើនៅខាងមុខរដ្ឋសភាជាតិ តំណាងរាស្ត្រទាំងពីររូប ត្រូវបានបាតុករស្ទាក់វាយ។ គណបក្សសង្គ្រោះជាតិ អំពាវនាវឱ្យអាជ្ញាធរចាប់ដៃដល់។
ចុះផ្សាយនៅថ្ងៃ៖
ស្តាប់ - ០៥:០២
តំណាងរាស្ត្រគណបក្សសង្រ្គោះជាតិ២រូប គឺលោក គង់ សភា និងលោក ញ៉យ ចំរើន បានរងរបួស ក្រោយបាតុករមួយក្រុមបានស្ទាក់វាយ។ លោកគង់ សភា តំណាងរាស្ត្រខេត្តស្វាយរៀង ត្រូវបានបាតុករវាយនិងទាញទម្លាក់ ពីលើរថយន្តចំនួនពីរលើក។ ដោយឡែកលោក ញ៉យ ចំរើន តំណាងរាស្ត្រមណ្ឌល កំពង់ចាម ត្រូវបានជនបិទមុខធាក់ និងវាយឱ្យបែកច្រមុះដេកលើថ្នល់ក្បែររថយន្ត។ ដោយឡែករថយន្តរបស់លោក ញ៉យ ចំរើន ត្រូវបានរងការខូចខាតផងដែរ។
ក្រោយអំពើហិង្សាបានកើតឡើង សេចក្តីថ្លែងការណ៍ និងការអំពាវនាវបានធ្លាក់ជាបន្តបន្ទាប់។ ភ្លាមៗគណបក្សសង្គ្រោះជាតិនៅល្ងាចថ្ងៃចន្ទនេះ បានចេញសេចក្តីថ្លែងការណ៍ថ្កោលទោសអំពើហិង្សានេះនិងបានហៅអំពើហិង្សានេះ ថាជាការរំលោភសិទ្ធិមនុស្សធ្ងន់ធ្ងរ និងជាការរំលោភបំពានលើអភ័យឯកសិទ្ធិរបស់តំណាងរាស្ត្រដែលការពារដោយរដ្ឋធម្មនុញ្ញ។ ចំណែកឯ ស្ថានទូតសហរដ្ឋអាមេរិក ប្រចាំនៅទីក្រុងភ្នំពេញក៏បានអំពាវនាវឱ្យអាជ្ញាធរស៊ើបអង្កេតឱ្យបានពេញលេញ និងប្រកបដោយតម្លាភាពទៅលើអំពើហិង្សា ដើម្បីរក្សារបៀបរៀបរយនៅរដ្ឋសភា និងធានាសុវត្ថិភាពចំពោះតំណាងរាស្ត្រមកពីគ្រប់គណបក្សនយោបាយទាំងអស់។
ដោយឡែកអង្គការសិទ្ធិលីកាដូវិញ ក៏បានចេញមុខថ្កោលទោសអំពើហិង្សានេះផងដែរ។ លោក អំ សំអាត មន្ត្រីស៊ើបអង្កេតជាន់ខ្ពស់នៃអង្គការលីកាដូ បានអះអាងថាអំពើហិង្សានេះមិនអាចទទួលយកបានទេ និងបានស្នើឱ្យអាជ្ញាធរចាប់ជនដៃផ្តន្ទាទោស។ លោក ហ៊ុន ម៉ានី តំណាងរាស្ត្រគណបក្សប្រជាជនកម្ពុជា និងជាកូនប្រុសលោកនាយករដ្ឋមន្ត្រីហ៊ុន សែន បានថ្កោលទោសអំពើហិង្សានេះដូចគ្នា ហើយអះអាងលោកមិនគាំទ្រអំពើហិង្សានេះឡើយ និងស្នើឱ្យអាជ្ញាធរវែកមុខ និងចាប់ជនដៃដល់ដែលបានប្រព្រឹត្តិអំពើហិង្សាទាំងអស់ស្របតាមច្បាប់របស់កម្ពុជាជាធរមាន។
សូមបញ្ជាក់ថា អំពើហិង្សានេះ បានកើតឡើងអំឡុងពេលក្រុមប្រជាពលរដ្ឋប្រមាណ២ពាន់នាក់ បានប្រមូលផ្តុំគ្នានៅក្បែរដ្ឋសភាដើម្បីទាមទារទម្លាក់លោកកឹម សុខា ចេញពីតំណែងអនុប្រធានរដ្ឋសភា។ គួរកត់សំគាល់ថា បាតុកម្មដែលឈានដល់អំពើហិង្សានេះ គឺបានកើតឡើងក្រោយពេលដែលលោកនាយករដ្ឋមន្ត្រីហ៊ុន សែន មានប្រសាសន៍ប្រាប់ពលរដ្ឋខ្មែរនៅបារាំងកាលពីល្ងាចថ្ងៃអាទិត្យទី២៥ នៅទីក្រុងប៉ារីស។ យ៉ាងណាក៏ដោយ បាតុកម្មទាមទារឱ្យសភារដ្ឋសភាទម្លាក់លោកកឹម សុខា បានឈានដល់ការគប់ដំថ្ម និងដបទឹកសុទ្ធចូលភូមិគ្រឹះលោក កឹម សុខាផងដែរ។
រហូតមកដល់ពេលនេះ អាជ្ញាធរក្រុងភ្នំពេញបានអះអាងថា នៅមិនទាន់វែកមុខជនដៃដល់ឃើញនៅឡើយនោះទេ។ យ៉ាងណាក៏ដោយ លោកឡុង ឌីម៉ង់ អ្នកនាំពាក្យសាលារាជធានីភ្នំពេញបានបញ្ជាក់ថា បាតុកម្មនៅព្រឹកនេះ មិនមានការអនុញ្ញាតិឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ