លោក សម រង្ស៊ី អំពាវនាវឲ្យខ្មែរនៅក្រៅស្រុកទាមទារយកសិទ្ធិបោះឆ្នោត
លោក សម រង្ស៊ី ប្រធានគណបក្សសង្រ្គោះជាតិបានថ្លែងនៅប្រទេសបារាំង កាលពីថ្ងៃទី២៤ តុលា ថាបើខ្មែរនៅក្រៅស្រុកគ្រប់និន្នាការនយោបាយមានឳកាសជួបជាមួយមេដឹកនាំមកពីកម្ពុជា ត្រូវទាមទារឲ្យខ្មែរនៅបរទេសទាំងអស់មានសិទ្ធិបោះឆ្នោតផង។ ការអំពាវនាវនេះ បានធ្វើឡើងនៅពេលដែលលោកនាយករដ្ឋមន្ត្រី ហ៊ុន សែន បានធ្វើដំណើរទៅបំពេញទស្សនៈកិច្ចផ្លូវការនៅប្រទេសបារាំង ចាប់ពីថ្ងៃទី២៥ តុលា រហូតដល់ថ្ងៃទី២៧ តុលា តាមរយៈការអញ្ជើញរបស់ប្រធានាធិបតីបារាំង។
ចុះផ្សាយនៅថ្ងៃ៖
ស្តាប់ - ០៥:៥៥
“ឮសូរថាខ្មែរខ្លះទៅទទួលគាត់ (លោកហ៊ុន សែន) ហើយមានឱកាសនិយាយជាមួយគាត់ ខ្ញុំសូមអំពាវនាវឲ្យខ្មែរទាំងអស់ ខ្ញុំមិនថាខាងណា ឬខាងណានោះទេ។ បើមានឱកាសជួបអ្នកដឹកនាំមកពីប្រទេសកម្ពុជាទាមទារឲ្យខ្មែរនៅបរទេសមានសិទ្ធិបោះឆ្នោតផង! នៅអាមេរិកខ្មែរយើងចង់បោះឆ្នោត ប៉ុន្តែនៅពេលដែលមានអ្នកដឹកនាំទៅដល់ អ្នកគាំទ្រអ្នកដឹកនាំមកពីទីក្រុងភ្នំពេញ អត់ហ៊ាននិយាយ។ ហើយបើអ្នកនៅប្រទេសបារាំង ពេលណាមានឱកាសជួបអ្នកដឹកនាំមកពីខ្មែរ ទាមទារឲ្យខ្មែរនៅស្រុកបារាំងមានសិទ្ធិបោះឆ្នោតផង! គ្រាន់តែទៅអែបអបនឹងបានការអី!” នេះជាការលើកឡើងរបស់លោក សម រង្ស៊ី ប្រធានគណបក្សសង្រ្គោះជាតិថ្លែងទៅកាន់សមាជិក និងអ្នកគាំទ្រគណបក្សនៅឯប្រទេសបារាំង កាលពីថ្ងៃទី២៤ តុលា ខណៈពេលដែលលោកនាយករដ្ឋមន្ត្រី ហ៊ុន សែន ធ្វើដំណើរទៅប្រទេសបារាំង ដើម្បីជួបលោកប្រធានាធិបតីបារាំង ហ្រ្វង់ស័រ ហូរឡង់ និស្សិតខ្មែរ និងប្រជាពលរដ្ឋខ្មែរ ដែលកំពុងតែរស់នៅក្នុងប្រទេសបារាំង។
លោក សម រង្ស៊ី បានសម្តែងការសោកស្តាយ ចំពោះការមិនអនុញ្ញាតឲ្យខ្មែរនៅក្រៅប្រទេសបានបោះឆ្នោត ដូចខ្មែរនៅក្នុងស្រុក។ លោកថាគេចាត់ទុកខ្មែរ នៅឯនាយសមុទ្រមិនមែនជាខ្មែរទេ ហើយហេតុអ្វីខ្មែរនៅឯក្រៅប្រទេសមិនអាចបោះឆ្នោតសម្រេចវាសនាប្រទេសជាតិ ដូចខ្មែរនៅក្នុងប្រទេសបាន។ ប្រធានគណបក្សប្រឆាំងរូបនេះ បានលើកឧទាហរណ៍ថាជនជាតិស៊ូដង់ ដែលបានរស់នៅទឹកដីអូស្ត្រាលី មានសិទ្ធិបោះឆ្នោតដូចប្រជាពលរដ្ឋទូទៅរបស់ស៊ូដង់ ដែលកំពុងតែរស់ក្នុងប្រទេសដែរ។
ចំណែក លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត(គ.ជ.ប)ដែលមានសមាសភាពមកពីគណបក្សប្រជាជនកម្ពុជានោះ បានបញ្ជាក់ប្រាប់វិទ្យុបារាំងថា ការរៀបចំការបោះឆ្នោតនៅឯក្រៅប្រទេសនោះ គឺ គ.ជ.ប បានជជែកគ្នារួចមកហើយក្នុងអំឡុងរយៈពេល៧ខែមកនេះ។ លោកលើកឡើងថា គ.ជ.បមិនមានលទ្ធភាព ដើម្បីឲ្យខ្មែរនៅក្រៅស្រុកមានឱកាសបោះឆ្នោតទេ ហើយម្យ៉ាងទៀតបើមានរឿងអ្វីកើតឡើងនៅក្រៅប្រទេស តើ គ.ជ.បធ្វើយ៉ាងដូចម្តេច? លោកបន្ថែមដោយយោងលើច្បាប់ស្តីពីការបោះឆ្នោតជំពូកទី៦ មាត្រា៤៤ ថា បញ្ជីបោះឆ្នោតត្រូវកត់ត្រាទិន្នន័យអ្នកបោះឆ្នោតម្នាក់ៗ ដែលក្នុងនោះគឺត្រូវមាន លំនៅដ្ឋាន ឬទីសំណាក់ក្នុងឃុំ សង្កាត់ដែលសាមីខ្លួនត្រូវបោះឆ្នោត។ដូច្នេះអ្នកដែលមិនអាចបំពេញតាមលក្ខខណ្ឌនេះបានមិនអាចចុះឈ្នោះបោះឆ្នោតបានទេ។
យ៉ាងណាមិញថ្មីៗនេះ ទាំងគណបក្សប្រជាជនកម្ពុជា និងគណបក្សសង្រ្គោះជាតិហាក់ដូចជាកំពុងតែពង្រឹងសមាជិករបស់ខ្លួននៅក្រៅប្រទេស។ ដូចជាវត្តមានរបស់លោកនាយករដ្ឋមន្ត្រី និងកូនប្រុសរបស់លោក នៅតាមបណ្តាប្រទេសមួយចំនួនទៀត ដែលតែងតែបង្កើតឱកាសជួបជុំគ្នារវាងពលរដ្ឋក្រៅស្រុក។ ចំណែកគណបក្សប្រឆាំងក៏តែងតែជួបជុំសមាជិករបស់ខ្លួននៅឯក្រៅប្រទេសផងដែរ។
សូមបញ្ជាក់ថានៅក្នុងប្រទេសសមាជិកអាស៊ាន ក៏មានប្រទេសមីយ៉ាន់ម៉ាមួយដែរ ដែលជាប្រទេសមួយបានរៀបចំឲ្យប្រជាពលរដ្ឋសញ្ជាតិមីយ៉ាន់ម៉ានៅឯក្រៅប្រទេសមានឱកាសក្នុងការប្រើសិទ្ធិបោះឆ្នោតរបស់ខ្លួន ដើម្បីបោះឆ្នោតជ្រើសរើសសមាជិកសភា ដែលនឹងធ្វើឡើងនៅថ្ងៃទី៨ ខែវិច្ឆិកាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ