រដ្ឋាភិបាលកម្ពុជា ចុះហត្ថលេខាលើគម្រោងអនុវត្តបច្ចេកវិទ្យាដ៏ប្រសើរ ដើម្បីគ្រប់គ្រងប្រព័ន្ធសំណល់
ក្រសួងបរិស្ថាន និងសាលារាជធានីភ្នំពេញ រួមសហការជាមួយមូលនិធិបរិស្ថានសកល អង្គការសហប្រជាជាតិដើម្បីអភិវឌ្ឍន៍ឧស្សាហកម្ម ហៅកាត់ថា UNIDO រួមនឹងប្រទេសគោលដៅចំនួន ៥ផ្សេងទៀត នៅព្រឹកថ្ងៃទី ១៨ឧសភានេះ បានធ្វើសិក្ខាសាលា និងចុះហត្ថលេខាប្រកាសរួមគ្នា ដើម្បីគម្រោងសកម្មភាពអនុវត្តន៍បច្ចេកវិទ្យាដ៏ប្រសើរ ដែលអាចរកបាន និងការប្រតិបត្តិបរិស្ថាន នៅលើទីលានចាក់សំណល់ ក្នុងតំបន់អាស៊ីអាគ្នេយ៍ និងអាស៊ីបូព៌ា។ កម្មវិធីនេះ បានធ្វើឡើងនៅសណ្ឋាគារ អាំងទែ កុងទីណង់តាល់ ក្រុងភ្នំពេញ ដោយមានអ្នកចូលរួមប្រមាណជា ៥០នាក់។
ចុះផ្សាយនៅថ្ងៃ៖
ស្តាប់ - ០២:០២
ដោយមានការគាំទ្រថវិកាពីមូលនិធិបរិស្ថានសកល និងអង្គការ UNIDO កម្ពុជាក្នុងនាមជាប្រទេសគោលដៅមួយ បានប្រកាសដាក់ឲ្យដំណើរការជាផ្លូវការនៅគម្រោងប្រចាំតំបន់ ដែលមានឈ្មោះថា «គម្រោងសកម្មភាពអនុវត្តន៍បច្ចេកវិទ្យាដ៏ប្រសើរដែលអាចរកបាន និងការប្រតិបត្តិបរិស្ថានដ៏ប្រសើរ នៅទីលានសំណល់ ក្នុងតំបន់អាស៊ីអាគ្នេយ៍ និងអាស៊ីខាងកើត ដើម្បីឆ្លើយតបទៅនឹងអនុសញ្ញាស្តុកខូម ស្តីពីសារធាតុបំពុលសរីរាង្គមិនងាយបំបែកធាតុ ឬហៅកាត់ថា (POPs)»។ គម្រោងនេះ មានរយៈពេល ៥ឆ្នាំ និងមានថវិកាសរុបចំនួនជាង ៧លាន៥សែនដុល្លារអាមេរិក។ គម្រោងនេះផងដែរ ក៏មានប្រទេសចំនួន ៥ ចូលរួម រួមមាន កម្ពុជា ឡាវ ម៉ុងហ្គោលី ហ្វីលីពីន និងវៀតណាម។
លោកសៅ សុភាព នាយកខុទ្ទកាល័យ និងជាទីប្រឹក្សាក្រសួងបរិស្ថាន បានឲ្យដឹងថា គម្រោងនេះ មានសារៈសំខាន់ណាស់សម្រាប់អ្នកដែលចូលរួមទាំង៥ ព្រោះបញ្ហាគ្រប់គ្រងសំណល់ទាំងរឹង និងរាវ នៅកម្ពុជា គឺនៅមានបញ្ហាប្រឈមច្រើន។ គម្រោងនេះ ជាការអនុវត្តសាកល្បងមួយ សម្រាប់សំណល់គ្រោះថ្នាក់ ដូចជាសំណល់វេជ្ជសាស្ត្រ និងសំណល់ឧស្សាហកម្មជាដើម។
លោកហេង ណារ៉េត ប្រធាននាយកដ្ឋានត្រួតពិនិត្យ ការបំពុលបរិស្ថាន បានពន្យល់ថា បច្ចេកវិទ្យាដ៏ប្រសើរ គឺជាការគ្រប់គ្រងសំណល់រឹង ដើម្បីកាត់បន្ថយការបង្កគ្រោះថ្នាក់ដល់បរិស្ថាន តាមរយៈការរៀបចំទីលានចាក់សំរាម ដើម្បីកុំឲ្យបំពុលដល់ទឹកក្រោមដី និងទៅលើអាកាស។ គម្រោងនេះ គឺផ្តោតលើការបញ្ឃប់ការដុតចំហរ ព្រោះការដុតសម្រាមជាចំហរ គឺបានបង្កគ្រោះថ្នាក់ច្រើនដល់សុខភាពរបស់ប្រជាជន។ ហើយដើម្បីកុំឲ្យមានការដុតចំហរ គេអាចដុតសម្រាមក្នុងឡ រួចទាញយកឧស្ម័នដែលដុតទាំងនោះ យកមកប្រើប្រាស់ជាថាមពលអគ្គិសនី ដែលការងារនេះ ត្រូវទាមទារការសិក្សាឲ្យបានលម្អិតជាបន្តទៀត។
តាមលោកហេង ណារ៉េត មកដល់នេះ ទីក្រុងភ្នំពេញ មានទីលានចាក់សម្រាមតែមួយកន្លែងប៉ុណ្ណោះ គឺនៅទីលានជើងឯក ព្រោះទីលាននៅស្ទឹងមានជ័យ បានបិទ ៣ឆ្នាំមកហើយ។ ហើយសម្រាមដែលយកទៅចាក់នៅទីនោះ គឺមានប្រមាណ ២,១០០តោន ក្នុងមួយថ្ងៃៗ។ គេនៅមិនទាន់សម្រេចពីការជ្រើសរើសទីលានចាក់សម្រាម សម្រាប់អនុវត្តគម្រោង POPsនេះ នៅឡើយទេ។ ការសម្រេចនឹងត្រូវធ្វើឡើងនៅក្នុងសិក្ខាសាលា ក្រោយពីពិធីប្រកាសឲ្យអនុវត្តគម្រោងនេះ ពីពេលនេះ រហូតដល់៥ឆ្នាំទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ