ប្រជាសហគមន៍ និងសមាជិកសហជីពខ្លះ ចាប់ផ្តើមអបអរទិវាសិទ្ធិមនុស្សអន្តរជាតិនៅថ្ងៃនេះ
ដើម្បីអបអរទិវាសិទ្ធិមនុស្សអន្តរជាតិ១០ធ្នូ ឆ្នាំ២០១៥ ប្រជាពលរដ្ឋសរុបប្រមាណជា៦០០នាក់ នៅខេត្តពោធិ៍សាត់ និងនៅខេត្តសៀមរាប បានផ្តើមធ្វើសកម្មភាពពីថ្ងៃអាទិត្យ ទី០៦ ខែធ្នូ ឆ្នាំ២០១៥នេះតទៅហើយ។ ជាផ្នែកមួយនៃយុទ្ធនាការរបស់សង្គមស៊ីវិលនៅកម្ពុជា ការលើកបដាដើរហែរតាមផ្លូវ និងការធ្វើវេទិកាក្នុងបរិវេណទីស្នាក់ការ បានប្រព្រឹត្តទៅដោយខកបំណងខ្លះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
គឺចាប់ពីព្រឹកថ្ងៃអាទិត្យ ទី០៦ ខែធ្នូ ឆ្នាំ២០១៥នេះតទៅហើយ ដែលសមាជិកខ្លះនៃសង្គមស៊ីវិលក្នុងប្រទេសកម្ពុជា ចាប់ផ្តើមអបអរខួបលើកទី៦៧នៃទិវាសិទ្ធិមនុស្សអន្តរជាតិ១០ធ្នូ។ ក្រៅពីការធ្វើសកម្មភាពដោយពុំមានការរំខានគួរឱ្យកត់សម្គាល់ ក៏មានដែរការខកចិត្តបន្តិចបន្តួច។
នៅខេត្តពោធិ៍សាត់ ប្រជាពលរដ្ឋជិត៥០០នាក់បានលើកបដាដើរហែក្បួនតាមដងផ្លូវ ដោយចេញដំណើរពីផ្លូវជាតិលេខ៥ ឆ្ពោះទៅកាន់ទីលានប្រជាធិបតេយ្យ ក្បែរវត្តបន្ទាយដី ក្នុងក្រុងពោធិ៍សាត់។
សំឡេងខ្ញៀវខ្ញារនៃអ្នកចូលរួមហាក់បង្កើនទម្ងន់ទៅលើសារជាច្រើននៅលើបដាទាំងឡាយ ដែលទាមទារឱ្យបំបាត់អំពើពុករលួយ ឱ្យមានយុត្តិធម៌ ឱ្យដោះស្រាយជម្លោះដីធ្លី និងជាពិសេសឱ្យលើកកម្ពស់សិទ្ធិសេរីភាពរបស់ប្រជាជនទូទាំងប្រទេសកម្ពុជា។
ពុំមានការរារាំងណាមួយពីអាជ្ញាធរមូលដ្ឋានចំពោះការដើររបស់អ្នកចូលរួមដែលជាភាគច្រើនជាសមាជិកបណ្ដាញយុវជន សមាជិកសមាគម សមាជិកសហគមន៍ និងបុគ្គលិកអង្គការមិនមែនរដ្ឋាភិបាលនោះទេ។ ប៉ុន្តែ លោក ម៉េង ប៊ុនរឿន តំណាងសហគមន៍ព្រៃឈើឃុំឈើតុំ ស្រុកក្រគរ ខេត្តពោធិ៍សាត់ រាង«ខកចិត្តបន្តិច»ត្រង់ថា អាជ្ញាធរក្នុងក្រុងពោធិ៍សាត់បានស្នើអ្នកចូលរួមក្នុងក្បួនដង្ហែនោះ ឱ្យចៀសវាងឆ្លងកាត់ទីតាំងដែលមានមនុស្សម្នាកកកុញច្រើន។
ចំណែកឯក្នុងបរិវេណនៃទីស្នាក់ការសហព័ន្ធសហជីពកម្មករសំណង់ និងព្រៃឈើកម្ពុជានៅខេត្តសៀមរាបវិញ សមាជិកសហជីព និងអ្នកប្រកបរបរដឹកជញ្ជូនខ្លះ សរុបប្រហែល១០០នាក់ បានធ្វើវេទិកាដោយរលូន។
អ្នកចូលរួមបានលើកឡើងអំពីសិទ្ធិសេរីភាពក្នុងការបង្កើតសហជីពកម្មករសំណង់ បញ្ហាលំបាករបស់កម្មករសំណង់ និងជាពិសេសភាពចម្រូងចម្រាស់នៃសេចក្តីព្រាងច្បាប់ស្តីពីសហជីព។
សកម្មភាពដំបូងៗទាំងនេះគឺជាផ្នែកមួយនៃយុទ្ធនាការរបស់អង្គការមិនមែនរដ្ឋាភិបាលមួយចំនួននៅកម្ពុជា ដែលគ្រោងប្រមូលសមាជិករបស់ខ្លួនជាង៣០០០នាក់ ឱ្យមកជួបជុំគ្នានៅរាជធានីភ្នំពេញ ដើម្បីប្រារព្ធទិវាសិទ្ធិមនុស្សអន្តរជាតិ នៅថ្ងៃទី១០ ខែធ្នូ ឆ្នាំ២០១៥ ក្រោមប្រធានបទរួមស្តីពី«យុត្តិធម៌»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ