ទោសជាប់ពន្ធនាគារសម្រាប់សកម្មជនការពារសេរីភាពបញ្ចេញមតិនៅ ប្រទេសចិន
តុលាការនៅខេត្ត ក្វាងទុង នៅថ្ងៃសុក្រទី ២៧ វិច្ឆិកា បានសម្រេចផ្តន្ទាទោសសកម្មជនការពារសិទ្ធិមនុស្សចិន ចំនួន៣នាក់ ឲ្យជាប់ពន្ធនាគារ។ សកម្មជនចិនទាំងបីរូបត្រូវបានអាជ្ញាធរចិនចាប់ឃុំខ្លួន តាំងពីឆ្នាំ ២០១៣ បន្ទាប់ពី ពួកគេបានចូលរួមគាំទ្រចលនាបាតុកម្មមួយ ដែលប្រឆាំង នឹងការតាមដាន និងត្រួតពិនិត្យរបស់អាជ្ញាធរលើខ្លឹមសារបោះពុម្ពផ្សាយរបស់កាសែតក្នុងស្រុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
លោកគួ ហ្វេស្យុង ជាអ្នកច្បាប់ចិន ដែលធ្វើសកម្មភាពច្រើនដើម្បី ជំរុញឲ្យមានការគោរពសិទ្ធិសេរីភាពជាមូលដ្ឋាន នៅខេត្តក្វាងទុង។ នៅថ្ងៃសុក្រ លោកត្រូវបានតុលាការចិនប្រកាសផ្តន្ទាទោសឲ្យជាប់ពន្ធនាគារ ៦ ឆ្នាំ ចំណែកសកម្មជនចិនពីរនាក់ទៀតត្រូវទទួលទោសជាប់ពន្ធនាគារ ៣ឆ្នាំ និង២ឆ្នាំ។ សាលក្រមនៅថ្ងៃនេះ ជាលទ្ធផលនៃសវនាការរយៈពេល១ឆ្នាំ ដែលនៅក្នុងនោះ សកម្មជនចិនទាំង៣រូបត្រូវបានតុលាការខេត្តក្វាងទុងចោទប្រកាន់ បានប្រមែរប្រមូល មនុស្សឲ្យធ្វើបាតុកម្ម បង្កអសណ្តាប់ធ្នាប់សាធារណៈ។ លេសចោទប្រកាន់ដែលអាជ្ញាធរចិនតែងតែប្រើ ដើម្បី ចាប់បាតុករ និងសកម្មជន ដាក់ពន្ធនាគារ។
នៅក្រោយសវនាការបិទទ្វារជិត មេធាវីរបស់សកម្មជនចិនបានស្រែកបរិហារភាពអយុត្តិធម៌ នៅក្នុងការសម្រេចរបស់ចៅក្រម។ តាមលោកមេធាវីរបស់លោក គួ ហ្វេស្យុង សាលក្រមរបស់តុលាការជារឿងដែលគេមិនអាចទទួលយកបាន ព្រោះថា កូនក្តីរបស់លោកមិនបានធ្វើអ្វី ខុសទេ។
គួ ហ្វេស្យុង អាយុ ៤៨ឆ្នាំ ទើបតែចេញពី ពន្ធនាគារ នៅ ឆ្នាំ ២០១១ នៅក្រោយអនុវត្តទោសជាប់គុក ៥ឆ្នាំ ដោយសារការងារសកម្មជនរបស់លោក។ ការសម្រេចរបស់តុលាការចិន នៅថ្ងៃនេះបានបង្កឲ្យមានរលកតវ៉ា រិះគន់ពី អង្គការការពារសិទ្ធិមនុស្សអន្តរជាតិ។ សម្រាប់អ្នកតំណាងអង្គការការពារសិទ្ធិមនុស្សHuman Rights Watch ការប្រយុទ្ធប្រឆាំងអំពើពុករលួយ និងដើម្បីការពារសិទ្ធិមនុស្សមិនមែនជាបទឧក្រិដ្ឋនោះទេ។ អង្គការAmnesty International វិញ បានចាត់ទុកថ្ងៃសុក្រនេះថា ជាថ្ងៃងងឹតសូន្យសុង នៅពេលគេឃើញអ្នកការពារសេរីភាពកាសែត និងប្រជាធិបតេយ្យត្រូវតុលាការជាន់ឈ្លី និងកាត់ទោសឲ្យជាប់ពន្ធនាគារ។
គួររំលឹកថា សកម្មជនចិនទាំង៣នាក់ដែលតុលាការផ្តន្ទាទោសនៅថ្ងៃសុក្រនេះ ត្រូវបានអាជ្ញាធរចិនចាប់ខ្លួន នៅក្នុងពេលពួកគេចូលរួមជាមួយអ្នកកាសែតធ្វើបាតុកម្មក្នុងខេត្តក្វាងទុង នៅឆ្នាំ ២០១៣។ អ្នកកាសែតក្វាងទុងធ្វើបាតុកម្មតវ៉ានឹងអាជ្ញាធរមូលដ្ឋាន ដែលបានទាមទារឲ្យកាសែតកែតម្រូវ ខ្លឹមសារ អត្ថបទ នៅមុនការចុះផ្សាយ។ នៅក្នុងអំឡុងបុណ្យចូលឆ្នាំចិន នៅឆ្នាំ ២០១៣ វិចារណកថា របស់កាសែតឈ្មោះក្វាងទុង ណានហ្វាង ជូម៉ូ ធ្លាប់បានអំពាវនាវដល់រដ្ឋអំណាចប៉េកាំងឲ្យធានាសិទ្ធិធ្វើនយោបាយនៅ ប្រទេសចិន។ ការទាមទាររកសេរីភាព ដែលត្រូវអាជ្ញាធរឆ្លើយតបមកវិញ ជាមួយនឹងការដាក់ទោស ឲ្យជាប់ពន្ធនាគារ នៅប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ