អាមេរិកដាក់ទណ្ឌកម្មបង្កកទ្រព្យសម្បត្តិមេអង្គរក្សលោកហ៊ុន សែនដោយចោទថាបំពានសិទ្ធិមនុស្សធ្ងន់ធ្ងរ
ការិយាល័យគ្រប់គ្រងទ្រព្យសម្បត្តិបរទេសនៃក្រសួងរតនាគារជាតិអាមេរិកបានសម្រេចដាក់ទណ្ឌកម្មបង្កកទ្រព្យរបស់លោកហ៊ីង ប៊ុនហៀង ដែលជាមេបញ្ជាការនៃបញ្ជាការដ្ឋានអង្គរក្សរបស់លោកនាយករដ្ឋមន្រ្តីកម្ពុជាហ៊ុន សែន។ នេះបើតាមសេចក្តីប្រកាសព័ត៌មានរបស់ក្រសួងរតនាគារជាតិអាមេរិកនៅថ្ងៃទី១២ មិថុនា។ ការសម្រេចដាក់ទណ្ឌកម្មនេះ ធ្វើឡើងដោយអាមេរិកចោទលោកហ៊ីង ប៊ុនហៀងថា បានបំពានសិទ្ធិមនុស្សធ្ងន់ធ្ងរនៅក្នុងប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
តាមរយៈសេចក្តីប្រកាសព័ត៌មាននៅថ្ងៃទី១២ មិថុនា ក្រសួងរតនាគារជាតិអាមេរិកបានចោទលោកហ៊ីង ប៊ុនហៀងថា បានជាប់ទាក់ទងសកម្មភាពបំពានសិទ្ធិមនុស្សប្រឆាំងនឹងប្រជាពលរដ្ឋកម្ពុជា។ បើតាមសេចក្តីប្រកាសព័ត៌មានដដែលនេះ បញ្ជាការដ្ឋានអង្គរក្សរបស់លោកហ៊ីង ប៊ុនហៀង បានជាប់ជំពាក់វ៉ាកវិននៅក្នុងការវាយប្រហារជាច្រើនទៅលើពលរដ្ឋគ្មានអាវុធក្នុងរយៈពេលជាច្រើនឆ្នាំមកហើយដូចជាករណីនៅវត្តភ្នំនៅក្នុងឆ្នាំ២០១៣ និងករណីនៅមុខរដ្ឋសភានៅក្នុងឆ្នាំ២០១៥។ ករណីនៅក្នុងឆ្នាំ២០១៥នេះ ក្រសួងរតនាគារជាតិអាមេរិកបានកត់សម្គាល់ថា មានតែសមាជិកកងអង្គរក្ស៣នាក់ប៉ុណ្ណោះដែលចាប់ដាក់ពន្ធនាគារបន្ទាប់ពួកគេសារភាពថា បានចូលរួមវាយប្រហារលើអ្នកតំណាងរាស្រ្តបក្សប្រឆាំង ហើយក្រោយដោះលែងពួកគេត្រូវបានដំឡើងឋានន្តរស័ក្តិថែមទៀត។
បន្ថែមលើនេះ លោកហ៊ីង ប៊ុនហៀង និងកងអង្គរក្សរបស់លោកក៏បានជាប់ពាក់ព័ន្ធនឹងឧប្បត្តិហេតុនានាផងដែរនៅពេលដែលកងកម្លាំងយោធាត្រូវបានប្រើប្រាស់ដើម្បីគំរាមកំហែងការប្រមូលផ្តុំរបស់ក្រុមអ្នកតវ៉ា និងគណបក្សប្រឆាំងកាលពីឆ្នាំ១៩៩៧ ដែលក្នុងនោះក៏បានបណ្តាលឲ្យជនជាតិអាមេរិកម្នាក់ផងបានរងរបួស។ នេះបើតាមការបញ្ជាក់របស់ក្រសួងរតនាគារជាតិអាមេរិក។ សកម្មភាពទាំងអស់នេះ ត្រូវបានក្រសួងរតនាគារជាតិអាមេរិកចាត់ទុកថា ជាការរំលោភសិទ្ធិមនុស្សធ្ងន់ធ្ងរ ហើយបានសម្រេចដាក់ទណ្ឌកម្មទៅតាមច្បាប់Global Magnitsky។ ច្បាប់Global Magnitskyនេះ គឺចែងកំណត់ឲ្យបង្កកទ្រព្យសម្បតិ្តមនុស្សណាដែលជាប់ពាក់ព័ន្ធនឹងការរំលោភសិទ្ធិមនុស្សឬប្រព្រឹត្តអំពើពុករលួយធ្ងន់ធ្ងរ។
សូមបញ្ជាក់ថា ក្រៅពីមន្រ្តីជាន់ខ្ពស់យោធាកម្ពុជារូបនេះ ក្រសួងរតនាគារជាតិអាមេរិកក៏បានដាក់ទណ្ឌកម្មដូចគ្នានេះទៅលើសមាជិកសភាសាធារណរដ្ឋដូមីនីក(Dominica)លោក Bautista ផងដែរ។ ខុសពីលោកហ៊ីង ប៊ុនហៀង លោកBautista ត្រូវបានចោទប្រកាន់ពីការប្រព្រឹត្តអំពើពុករលួយក្នុងការសាងសង់ឡើងវិញនៅក្នុងប្រទេសហៃទី។ ចំពោះសកម្មភាពរបស់មនុស្សទាំងពីរនេះ ក្រសួងរតនាគារជាតិអាមេរិកបានអះអាងថា ទ្រព្យសម្បត្តិឬផលចំណេញដែលបានមកពីទ្រព្យសម្បត្តិរបស់ពួកគេបានបង្កក។ បន្ថែមលើនេះ ពលរដ្ឋអាមេរិកត្រូវបានហាមឃាត់មិនឲ្យជាប់ទាក់ទងក្នុងជំនួញជួញដូរជាមួយមនុស្សទាំងនេះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ