កម្ពុជាជាប្រទេសមួយក្នុងចំណោមប្រទេស៤ដែលអាមេរិកដាក់ទណ្ឌកម្មទិដ្ឋាការ
រដ្ឋបាលលោកប្រធានាធិបតី ដូណាល់ត្រាំ នៃសហរដ្ឋអាមេរិក ប្រកាសដាក់ទណ្ឌកម្មរឹតបន្តឹងទិដ្ឋាការលើប្រទេសកម្ពុជា និងប្រទេសចំនួនបីផ្សេងទៀត ក្រោមហេតុផលប្រទេសទាំងនោះរឹងរូសមិនព្រមទទួលយកពលរដ្ឋរបស់ខ្លួន ក្រោយអាមេរិករកឃើញថា ប្រព្រឹត្តិកំហុស និងត្រូវបាននិរទេសចេញពីទឹកដីអាមេរិក។ យ៉ាងណាមិញ រដ្ឋាភិបាលកម្ពុជាហាក់សម្តែងការមិនភា្ញក់ផ្អើលនោះឡើយ។
ចុះផ្សាយនៅថ្ងៃ៖
ប្រទេសទាំងបួនដែលប្រឈមនឹងការរឹតបន្តឹងទិដ្ឋាការចូលទឹកដីសហរដ្ឋអាមេរិកនាពេលនេះ រួមមាន កម្ពុជា អេរីទ្រា ហ្គីនៀ និងសៀរ៉ាលីអូន។ សារព័ត៌មាន CNN របស់អាមេរិក អះអាងថា ប្រជាជននៃប្រទេសទាំងនេះ អាចឈានដល់ការហាមប្រាមមិនឲ្យចូលទឹកដីអាមេរិកទៀតផង។ ការរឹតបន្តឹងនេះ បានកើតឡើងកាលពីសប្ដាហ៍មុន ក្រោយក្រសួងសន្តិសុខមាតុភូមិអាមេរិក បានផ្ញើលិខិតជូនដំណឹងទៅក្រសួងការបរទេស ហើយ ក្រសួងនេះ ប្រកាសថា នឹងចាត់វិធានការទៅតាមដំណាក់កាល។ នេះបើតាមសារព័ត៌មានដដែល។
ទាក់ទងទៅនឹងការរឹតបន្តឹងចូលអាមេរិកដល់ពលរដ្ឋកម្ពុជា លោក ផៃ ស៊ីថាន អ្នកនាំពាក្យទីស្តីការគណៈរដ្ឋមន្ត្រី បានថ្លែងថា ការប្រកាសរឹតបន្តឹងទិដ្ឋាការរបស់ស្ថានទូតអាមេរិកនេះ មិនមែនជារឿងថ្មីនោះទេ។ យ៉ាងណាក៏ដោយ លោកសង្កត់ធ្ងន់ថា កម្ពុជានឹងនៅតែសហការជាមួយអាមេរិកទាក់ទងទៅនឹងការបញ្ជូនពលរដ្ឋខ្មែរអាមេរិកមកកម្ពុជា។
ចំណែកប្រមុខរដ្ឋាភិបាលកម្ពុជាវិញ ក៏ធ្លាប់ស្នើសុំអាមេរិក ឲ្យធ្វើវិសោធនកម្មកិច្ចព្រមព្រៀងដែលបានចុះហត្ថលេខារួមគ្នាកាលពីឆ្នាំ២០០២។ លោក ហ៊ុន សែន ចង់ឲ្យពលរដ្ឋខ្មែររស់នៅអាមេរិក ដែលប្រព្រឹត្តិកំហុស ហើយទទួលទោសទៅតាមច្បាប់អាមេរិករួចរាល់ គួរតែទទួលពួកគេឲ្យស្នាក់បន្តទៀត ដើម្បីជួបជុំក្រុមគ្រួសារ ខណៈដែលរួមរស់ជាមួយគ្នា អស់រយៈពេលជាច្រើនឆ្នាំកន្លងមក។
កាលពីឆ្នាំ២០១៦ កន្លងទៅ ប្រធានាធិបតីអាមេរិក ដូណាល់ត្រាំ បានលើកឡើងនៅក្នុងសុន្ទរកថា របស់លោកថា មានប្រទេសចំនួន២៣ ដែលបានបដិសេធមិនទទួលយកពលរដ្ឋត្រឡប់ទៅវិញដោយពួកគេជាប់ឧក្រិដ្ឋកម្មហិង្សាច្រើន។ កន្លងមក ធ្លាប់មានប្រទេសចំនួនពីរបានទទួលការដាក់ទណ្ឌកម្មតាមច្បាប់ គឺប្រទេស Guyana និង Gambia។ នៅចន្លោះឆ្នាំ ២០១៣ ដល់ ២០១៦ មានជនអន្តោប្រវេសន៍គ្មានឯកសារត្រឹមត្រូវ ជាង ៨ពាន់នាក់ ត្រូវបានដោះលែងបន្ទាប់ពីជាប់ពន្ធនាគារដោយសារប្រព្រឹត្តឧក្រិដ្ឋកម្មហិង្សា។
ជាការកត់សម្គាល់ ព័ត៌មាននៃការប្រកាសរឹតបន្តឹងទិដ្ឋាការចូលទឹកដីអាមេរិកលើកម្ពុជា នាពេលនេះ ត្រូវបានផ្សព្វផ្សាយ បន្ទាប់ពីប្រមុខរដ្ឋាភិបាលកម្ពុជា ប្រកាសបិទវិទ្យាស្ថានជាតិប្រជាធិបតេយ្យ(NDI) និងបណ្តេញបុគ្គលិកជាជនជាតិបរទេសចេញពីកម្ពុជា រយៈពេល១សប្តាហ៍។លើសពីនេះបញ្ហាកាសែត The Cambodia Daily ការនិយាយពីវិទ្យុអាស៊ីសេរី វិទ្យុ VOAដែលសុទ្ធសឹងជាប្រព័ន្ធផ្សព្វផ្សាយ ពាក់ព័ន្ធនឹងអាមេរិច កំពុងក្លាយជារបៀបវារៈដ៏ក្តៅគគុកនៃការបិទ និងប្រឈមនឹងផ្លូវច្បាប់ កម្ពុជាពីវិស័យសារព័ត៌មាននិងពន្ធដារ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ