លោកវ៉ា គឹមហុង៖ទង្វើលោកអ៊ុំ សំអាន កំពុងញុះញង់ឲ្យអន្តរជាតិបាត់ទំនុកចិត្តលើកម្ពុជា
ទង្វើ និងអាកប្បកិរិយារបស់លោកអ៊ុំ សំអាន តំណាងរាស្ត្រមណ្ឌលសៀមរាប របស់គណបក្សសង្គ្រោះជាតិ កំពុងតែញុះញង់ឲ្យមជ្ឃដ្ឋានជាតិ និងអន្តរជាតិ បាត់ទំនុកចិត្តលើរដ្ឋាភិបាលកម្ពុជា។ បាត់ទំនុកចិត្ត ដោយសារលោកអ៊ុំ សំអាន បានលើកឡើងនូវចំនុចមិនពិត និងព្យាយាមកាឡៃផែនទីកម្ពុជា។ នេះគឺជាការថ្លែងរបស់លោកវ៉ា គឹមហុង ទេសរដ្ឋមន្ដ្រីទទួលបន្ទុកកិច្ចការព្រំដែន នៅក្នុងសន្និសីទកាសែត នារសៀលថ្ងៃសុក្រ ទី ២៨សីហានេះ នៅទីស្តីការគណៈរដ្ឋមន្ត្រី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
«អាកប្បកិរិយា ឬសម្តីរបស់លោកតំណាងរាស្ត្រអ៊ុំ សំអាន គឺជាអាកប្បកិរិយា ឬសម្តី ញុះញង់ ដែលធ្វើឲ្យមានការប៉ះពាល់ដល់ទំនាក់ទំនងអន្តរជាតិរបស់យើង ជាមួយនឹងវៀតណាម។ ឲ្យអស្ថិរភាព នៅតាមបណ្តោយព្រំដែនកម្ពុជា អស្ថិរភាព ធ្វើឲ្យរំខាន ដល់ការបោះបង្គោលព្រំដែនរវាងប្រទេសជាតិយើង មិនឲ្យទៅមុខបាន! » នេះគឺជាការលើកឡើងរបស់លោកវ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន នៅក្នុងសន្និសីទកាសែត នារសៀលថ្ងៃទី ២៨សីហា ដើម្បីឆ្លើយតបទៅកាន់លោកអ៊ុំ សំអាន។ លោកអ៊ុំ សំអាន ដែលកាលពីថ្ងៃព្រហស្បតិ៍ ទើបបានបង្ហាញថា បានរកឃើញផែនទីចំនួន ២៦ផ្ទាំង ហើយលោកអះអាងថា ជាផែនទីបោន ដែលមិនមានត្រាប្រទេសវៀតណាមនោះទេ និងត្រូវបានព្រះបរមរតនកោដ្ឋ យកទៅតម្កល់ទុកនៅសហរដ្ឋអាមេរិក តាំងពីឆ្នាំ១៩៦៤ ថែមទៀត។
ចំពោះចំនុចនេះ លោកវ៉ា គឹមហុង បានបញ្ជាក់ថា ការពិតផែនទី ដែលលោកអ៊ុំ សំអាន បានរកឃើញនៅពេលនេះ គឺជាផែនទីដែលរដ្ឋាភិបាលកំពុងតែប្រើប្រាស់សព្វថ្ងៃ។ ហើយផែនទីនេះ ត្រូវបានយកមកកម្ពុជា តាំងពីជាង ១០ឆ្នាំមុន និងកំពុងតំកល់ទុកនៅជាន់ទី៥ នៃទីស្តីការគណៈរដ្ឋមន្ត្រី។ ដោយសារសំអាងនេះ ទើបលោកវ៉ា គឹមហុង យល់ថា ទង្វើរបស់លោកអ៊ុំ សំអាន ជាការញុះញង់ បង្កអស្ថិរភាព។
មួយវិញទៀត លោកវ៉ា គឹមហុង ថែមទាំងបានចាត់ទុកថា លោកអ៊ុំ សំអាន កំពុងតែចង់ប្រមាថអង្គការសហប្រជាជាតិ។ ប្រមាថ ដោយសារតែលោកអ៊ុំ សំអាន ដែលកំពុងស្ថិតនៅសហរដ្ឋអាមេរិក បានអះអាងថា នឹងធ្វើដំណើរទៅកាន់ទីស្នាក់ការអង្គការសហប្រជាជាតិ ដើម្បីស្វែងរកមូលហេតុថា តើហេតុអ្វីបានជាអង្គការសហប្រជាជាតិរកផែនទីខ្មែរមិនឃើញ?
លោកវ៉ា គឹមហុង យល់ថា នេះជាការផ្គើនទៅស្ថាប័នមួយនេះ ព្រោះថាអង្គការសហប្រជាជាតិ បានផ្ញើរលិខិតសុំទោសមករដ្ឋាភិបាលកម្ពុជា និងបញ្ជាក់ថា រកផែនទីនោះមិនឃើញទេ។ តាមលោកវ៉ា គឹមហុង បើមន្ត្រីជំនាញអង្គការសហប្រជាជាតិ រកមិនឃើញផង តើលោកអ៊ុំ សំអាន សំអាងអីអាចទៅរកឃើញ?
លោកវ៉ា គឹមហុង នៅក្នុងសន្និសីទរបស់ខ្លួន បានស្នើឲ្យលោកអ៊ុំ សំអាន បញ្ឈប់សកម្មភាពដេញដោលពីផែនទីបន្តទៀត ហើយត្រូវចាំមើលការផ្ទៀងផ្ទាត់ ផែនទីកម្ពុជាដែលនៅក្នុងដៃរបស់បារាំង យ៉ាងយូរត្រឹមសប្តាហ៍ក្រោយ។ ក្នុងនោះ លោកវ៉ា គឹមហុង ក៏ទទូចទៅលោកតំណាងរាស្ត្រគណបក្សសង្គ្រោះជាតិទាំងអស់ថា គួរឈប់គិតពីរឿងផែនទី ហើយបែរមករួមគ្នាបោះបង្គោលព្រំដែនឲ្យឆាប់ចប់វិញ ប្រសើរជាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ