នៅពេលពលរដ្ឋកម្ពុជា មិនសូវស្រឡាញ់អក្សរនិងភាសាជាតិ
ចុះផ្សាយនៅថ្ងៃ៖
ស្តាប់ - ០៤:៣៦
ភាសិតខ្មែរបុរាណថា វប្បធម៌រលត់ ជាតិរលាយ។ ប៉ុន្តែ អក្សរនិងភាសា ដែលជាផ្នែកមួយវប្បធម៌ដែរនោះ កំពុងតែត្រូវបានជនជាតិខ្មែរមួយចំនួន លែងសូវប្រើប្រាស់និងឲ្យតម្លៃខ្ពស់ដូចមុន។ នេះគឺជាគ្រោះថ្នាក់មួយដ៏ធំធេង ដែលអាចសម្លាប់អត្តសញ្ញាណជាតិខ្មែរបាន។
ភាសាអក្សរសាស្ត្រជាតិ គឺជាផ្នែកមួយដ៏សំខាន់នៃវប្បធម៌។ វាជាអត្តសញ្ញាណ ប្រើប្រាស់ សម្រាប់សម្គាល់ជាតិសាសន៍ ក្រុមមនុស្សនៃសង្គម ឬសហគមន៍ណាមួយ។ និយាយពីភាសា វាជាយាននៃការទាក់ទងដ៏មានតម្លៃ។ ចំណែកអក្សរសាស្ត្រ បានផ្ដល់ភាពងាយស្រួលដល់ ប្រជាពលរដ្ឋខ្មែរក្នុងការអាន និងការកត់ត្រារឿងហេតុផ្សេងៗរបស់ជាតិសាសន៍ខ្លួន។ ដោយសារតែអក្សរដែលបានឆ្លាក់នៅលើផ្ទាំងថ្ម និងនៅលើសាស្ត្រាស្លឹករឹតតាំងពីបុរាណ ទើបខ្មែរបានស្គាល់ខ្លួនឯងច្បាស់ ដូចសព្វថ្ងៃនេះ។
យ៉ាងណាក៏ដោយ សព្វថ្ងៃនេះ ភាសានិងអក្សរខ្មែរ ហាក់ដូចជាត្រូវពលរដ្ឋខ្មែរមើលរំលង ទៅហើយ។ ជនជាតិខ្មែរមួយចំនួន ជាពិសេស យុវជន ត្រូវបានគេសង្កេតឃើញថា មិនសូវ ប្រើ ប្រាស់និងឲ្យតម្លៃអក្សរ និងភាសាខ្មែរនោះទេ។ ខណៈដែលជនជាតិមួយចំនួនគ្មានភាសា និងអក្សរជារបស់ខ្លួន យុវជនខ្មែរសម័យឥឡូវ និយមចូលចិត្តយក អក្សរនិងភាសាបរទេសមក ប្រើប្រាស់ទៅវិញ ទាំងដែលខ្លួនមានអក្សរនិងភាសារបស់ខ្លួនរួចទៅហើយ។
នៅក្នុងជីវភាពរស់នៅប្រចាំថ្ងៃ ជារឿយៗ យុវជនច្រើនប្រើប្រាស់ភាសាអង់គ្លេស លាយនៅ ក្នុងប្រយោគជាភាសាខ្មែរ។ អាចទទួលយកបាន ប្រសិនបើពាក្យជាភាសាអង់គ្លេសនោះ មិនទាន់មានការបកប្រែផ្លូវការជាភាសាខ្មែរ ប៉ុន្តែវាពិតជាពិបាកទទួលយកណាស់ ប្រសិនបើ ពាក្យជាភាសាអង់គ្លេសនោះ មានការបកប្រែជាភាសាខ្មែរ តែគេបែរជាមិនប្រើទៅវិញ។
ការលើកទឹកចិត្តនិងការផ្ដល់តម្លៃ ហាក់មានកម្រិតតិចតួច នៅពេលដែលជនជាតិខ្មែរម្នាក់ ចេះយ៉ាងជំនាញនូវអក្សរនិងភាសាជាតិរបស់ខ្លួន។ គេធ្លាប់លឺឪពុកម្ដាយមួយចំនួន អួតអាងប្រកបដោយមោទនភាពថា កូនរបស់ខ្លួន អាចនិយាយនិងសរសេរភាសាអង់គ្លេស ព្រមទាំងចេះច្រៀងជាភាសាចិនបានយ៉ាងស្ទាត់ជំនាញ។ ប៉ុន្តែគេមិនដែលលឺសោះតែម្ដង ឪពុកម្ដាយដែលប្រាប់អ្នកដទៃថា កូនរបស់ខ្លួន ចេះបង្កើតពាក្យខ្មែរ តាមវិធីកម្លាយផ្នត់ដើម និងផ្នត់ជែក បានគ្រប់ទម្រង់។ ថាអ្នកខ្លះទៅចុះ ដែលមិននិយមប្រើភាសានិងអក្សរខ្មែរ តែអ្នកដែលកំពុងប្រើទៀតសោត ក៏ធ្វេសប្រហែស ពុំបានពិនិត្យឲ្យបានគ្រប់ជ្រុងជ្រោយ ដោយប្រើប្រាស់ខុសទាំងមិនដឹងខ្លួន ទាំងការនិយាយស្ដី និងការសរសេរ។
តាមការសង្កេត ជនជាតិខ្មែរសព្វថ្ងៃ បាននឹងកំពុងតែសរសេរនិងប្រើប្រាស់ពាក្យមួយចំនួន ដោយមិនត្រឹមត្រូវតាមអក្ខរាវិរុទ្ធ និងវេយ្យាករណ៍នៃពាក្យឡើយ។ គឺគ្រាន់តែសរសេរឲ្យតែ អានបាន យល់បានតែប៉ុណ្ណោះ មិនដែលចាប់អារម្មណ៍ខ្វាយខ្វល់ផ្ទៀងផ្ទាត់ឲ្យបានត្រឹមត្រូវនោះទេ។ នៅតាមកញ្ចក់ទូរទស្សន៍ កាសែត ទស្សនាវដ្ដី ឬសូម្បីតែនៅតាមស្លាកយីហោរបស់ ហាងមួយចំនួន ជារឿយៗ គេតែងតែប្រទះពាក្យខ្មែរដែលសរសេរខុស។ ការប្រើប្រាស់ខុស ដដែលៗ បង្កើតទៅជាទម្លាប់ បង្កើតទៅជាជំនឿថា អ្វីដែលខ្លួនប្រើខុសនោះ ត្រឹមត្រូវទៅវិញ។
ក្រៅពីការសរសេរដែលជួបវិបត្តិ ភាសាខ្មែរក៏កំពុងតែដើរលើផ្លូវទៅកាន់គ្រោះមហន្តរាយ ដូចគ្នាដែរ។ ភាសាខ្មែរ កំពុងតែត្រូវបានបំផ្លាញដោយសារជនជាតិខ្មែរខ្លួនឯង។ នៅតាមវិទ្យុនិងទូរទស្សន៍ អ្នកនិយាយព័ត៌មាន និងពិធីករ ប្រើប្រាស់ភាសាយ៉ាង អាណាធិបតេយ្យ។ ប្រព័ន្ធផ្សព្វផ្សាយទាំងនេះ ជះឥទ្ធិពលយ៉ាងខ្លាំងទៅលើសាធារណជនទូទៅ។ នៅពេលដែលប្រព័ន្ធផ្សព្វផ្សាយប្រើប្រាស់ភាសាខុស អ្នកមើលនិងអ្នកស្ដាប់ ក៏ប្រើប្រាស់ខុសទៅតាមនោះដែរ។ ដល់អ៊ីចឹងទៅ ភាសាខ្មែរត្រូវគេប្រើប្រាស់ច្រឡំបល់អស់។
ការប្រើប្រាស់អក្សរនិងភាសាខ្មែរឲ្យបានត្រឹមត្រូវ គឺជារឿងសំខាន់ខ្លាំងណាស់។ បើទោះបីជា បច្ចុប្បន្ន កម្ពុជាបានបើកចំហរជើងមេឃទៅកាន់ពិភពលោកហើយក៏ដោយ ក៏ការឲ្យតម្លៃ លើកកម្ពស់ អភិរក្ស និងអភិវឌ្ឍអក្សរនិងភាសាជាតិ នៅតែចាំបាច់ជានិច្ច។ នៅក្នុងប្រទេស កម្ពុជាដ៏ក្រីក្រ និងខ្ទេចខ្ទាំ នៅមានវិបត្តិភាសានិងអក្សរសាស្ត្រជាតិមួយទៀត ដែលគេគួរយកចិត្តទុកដាក់។
ដូច្នេះ ជនជាតិខ្មែរទាំងឡាយ គួរតែយកចិត្តទុកដាក់ និងប្រយ័ត្នប្រយែងច្រើនជាងនេះទៅទៀត ក្នុងការប្រើប្រាស់ភាសានិងអក្សរខ្មែរ។ កុលបុត្រកុលធីតាខ្មែរគ្រប់រូប ត្រូវចេះថែរក្សាការពារ ភាសានិងអក្សរសាស្ត្រជាតិឲ្យបានគង់វង្ស និងរីកចម្រើនទៅមុខ។ សុភាសិតខ្មែរបុរាណថា វប្បធម៌រលត់ ជាតិរលាយ។ អក្សរនិងភាសា ដែលជាផ្នែកមួយនៃវប្បធម៌នោះ កំពុងតែរអិល ធ្លាក់ជ្រោះ។ ហើយប្រសិនបើវប្បធម៌ធ្លាក់ជ្រោះ សង្គមជាតិក៏អាចនឹង រអិលទៅជាមួយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ