ធនាគារពិភពលោក៖ កំណើនសេដ្ឋកិច្ចកម្ពុជានៅតែរឹងមាំ តែមានសញ្ញាណថមថយខ្លះ
នៅថ្ងៃនេះ ធនាគារពិភពលោកប្រចាំកម្ពុជា បានចេញរបាយការណ៍សិក្សាថ្មី បញ្ជាក់ថា កំណើនសេដ្ឋកិច្ចកម្ពុជានៅតែរឹងមាំ គឺក្នុងរង្វាន់ ៦,៩ភាគរយ សម្រាប់ឆ្នាំ ២០១៧នេះ និងឆ្នាំក្រោយទៀត។ កំណើនសេដ្ឋកិច្ចនេះ គឺដោយសារតែការទ្រទ្រង់ពីវិស័យសំណង់និងកាត់ដេរសម្លៀកបំពាក់។ ក៏ប៉ុន្តែបញ្ហាប្រឈមរបស់កម្ពុជា គឺផ្នែកហេដ្ឋារចនាសម្ព័ន្ធ និងសេវាសាធារណៈ!
ចុះផ្សាយនៅថ្ងៃ៖
ស្តាប់ - ០២:១៧
កំណើនសេដ្ឋកិច្ចរបស់ប្រទេសខ្មែរ ដែលនៅតែបន្តមានភាពរឹងមាំ គឺត្រូវបានទទួលការអបអរសាទរពី លោកស្រី Inguna Dobrajaអ៊ីហ្គូណា ដូបា្រចា ប្រធានគ្រប់គ្រងធនាគារពិភពលោកប្រចាំកម្ពុជា។ លោកស្រី គូសបញ្ជាក់ថា កំណើនសេដ្ឋកិច្ចកម្ពុជានៅតែបន្តរឹងមាំក្នុងរយៈពេលប៉ុន្មានឆ្នាំខាងមុខទៀត ហើយអត្រានៃភាពក្រីក្រ នឹងកាន់តែបន្តថយចុះ។
ជាមួយគ្នានេះ វិស័យទេសចរណ៍ ជាចំណុចគួរកត់សម្គាល់សំខាន់ដែរ គឺដោយសារតែការបង្កើតឲ្យមានជើងហោះហើរដោយផ្ទាល់ ទើបនឹងបើកសម្ពោធថ្មីៗនេះ និងគំនិតផ្តួចផ្តើមថ្មីៗទៀតដែលជំរុញឲ្យមានកំណើនភ្ញៀវទេសចរ។
ក្រៅពីលើកសរសើរ ធនាគារពិភពលោកប្រចាំកម្ពុជា ក៏បានព្យាករណ៍ពីសញ្ញាណនៃការថមថយលើវិស័យមួយចំនួន។ ជាក់ស្តែង ការនាំចេញសម្លៀកបំពាក់ គឺកំពុងប្រឈមនឹងការប្រកួតប្រជែងធំធេង។ បញ្ហានៅត្រង់ថា តម្លៃប្រាក់ដុល្លារឡើងថ្លៃ និងកម្រៃពលកម្មកើនឡើង ព្រមទាំងមានការប្រកួតប្រជែងពីប្រទេសក្នុងតំបន់ ដែលមានកម្រៃពលកម្មទាប។ ដូច្នេះ នាំឲ្យកំណើនក្នុងវិស័យនាំចេញសម្លៀកបំពាក់នេះ នឹងទទួលបានត្រឹមតែ ៨,៤ភាគរយប៉ុណ្ណោះក្នុងឆ្នាំ ២០១៦ បើធៀបទៅឆ្នាំ២០១៥ គឺបានទៅដល់ ប្រមាណ១២,៣ភាគរយ។
ការសិក្សារបស់ស្ថាប័នអន្តរជាតិនេះ មើលឃើញទៀតថា វិស័យកសិកម្មកំពុងតែងើបដើរយឺតសន្សឹមៗ ហើយការវិនិយោគលើហេដ្ឋារចនាសម្ព័ន្ធនិងសេវាសាធារណៈ គឺជាបញ្ហាប្រឈមចំពោះការបោះពួយទៅមុខរបស់សេដ្ឋកិច្ចជាតិ។
ចំពោះធនាគារពិភពលោក, វាពិតជាសំខាន់ណាស់ ក្នុងការធានាថា ការវិនិយោគរបស់ប្រទេសលើវិស័យហេដ្ឋារចនាសម្ព័ន្ធសាធារណៈ ដែលវានឹងផ្តល់ប្រយោជន៍ដល់ពលរដ្ឋក្រីក្រ។ ដូច្នេះ ការលើកកម្ពស់ការផ្គត់ផ្គង់សេវាសាធារណ: ក៏ជាគន្លឹះសម្រាប់សម្របសម្រួលដល់ការអភិវឌ្ឍន៍វិស័យឯកជនដែរ។
ធនាគារពិភពលោកប្រចាំកម្ពុជា ឲ្យជាយោបល់គន្លឹះមួយចំនួន ដើម្បីរក្សាកំណើនសេដ្ឋកិច្ចខ្មែរនៅលើផ្លូវវិជ្ជមាន។ ពោលគឺជំរុញបង្កើតផលិតភាពការងារ ដើម្បីជាថ្នូរនឹងការកើនឡើងប្រាក់ឈ្នួលពិត។ អាទិភាពជាចំបង គឺលើកកម្ពស់គុណភាពនៃការអប់រំមូលដ្ឋាន ហើយលើកកម្ពស់ជំនាញវិជ្ជាជីវៈនិងជំនាញបច្ចេកទេស។ ទន្ទឹមនេះ ក៏ត្រូវកាត់បន្ថយតម្លៃអគ្គិសនី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ