តុលាការផ្តន្ទាទោស លោកយ៉ែម ជ្រិន ២៥ឆ្នាំ និងពិន័យ៥លានរៀលរឿងចម្លងមេរោគអេដស៍
តុលាការខេត្តបាត់ដំបង នៅព្រឹកថ្ងៃទី៣ ខែធ្នូ នេះ បានប្រកាសសាលក្រមផ្តន្ទាទោសលោកយ៉ែម ជ្រិន ឲ្យជាប់ពន្ធនាគាររយៈពេល២៥ឆ្នាំ និងពិន័យជាទឹកប្រាក់ចំនួន៥លានរៀល នៅក្នុងសំណុំរឿងធ្វើឲ្យអ្នកភូមិរកានៅក្នុងខេត្តបាត់ដំបង ប្រមាណ៣០០នាក់ បានឆ្លង និងស្លាប់ដោយសារមេរោគអេដស៍។ សាលក្រមនេះ បានប្រកាសឡើងបន្ទាប់ពីបានបើកសវនាការជាអសាធារណៈជាបន្តបន្ទាប់រួចមក។
ចុះផ្សាយនៅថ្ងៃ៖
ស្តាប់ - ០១:៤៨
នៅទីបំផុត លោកគ្រូពេទ្យយ៉ែម ជ្រិន ដែលរងការចោទប្រកាន់ថា បានចម្លងមេរោគអេដស៍ដ៏កាចសាហាវទៅដល់អ្នកភូមិរការាប់រយនាក់នាពេលកន្លងមកនោះ ត្រូវបានតុលាការខេត្តបាត់ដំបងសម្រេចផ្តន្ទាទោសរយៈពេល២៥ឆ្នាំនៅក្នុងពន្ធនាគារ។ តុលាការក៏បានតម្រូវឲ្យលោកបង់ប្រាក់ពិន័យចំនួន៥លានរៀលចូលជាថវិការដ្ឋ និងបង់ប្រាក់សំណងជំងឺចិត្តដល់ជនរងគ្រោះចំនួន១២០នាក់ចាប់ពី៥ម៉ឺនរហូតដល់១២លានរៀលផងដែរ។ ក្រៅពីនេះ តុលាការខេត្តបាត់ដំបងក៏បានហាមឃាត់មិនឲ្យលោកយ៉ែម ជ្រិន ប្រកបវិជ្ជាជីវៈឯកជនក្នុងវិស័យវេជ្ជសាស្រ្ត អមវេជ្ជសាស្រ្ត និងជំនួយវេជ្ជសាស្រ្តថែមទៀត។
មានវ័យ៥៦ឆ្នាំ សញ្ជាតិខ្មែរ លោកយ៉ែម ជ្រិន ត្រូវបានតុលាការចោទប្រកាន់បីបទល្មើសផ្សេងគ្នា គឺបទបើកកន្លែងពិគ្រោះព្យាបាលជំងឺដោយគ្មានការអនុញ្ញាតពីក្រសួងសុខាភិបាល បទប្រព្រឹត្តក្នុងចេតនាចម្លងមេរោគអេដស៍ទៅអ្នកដទៃ និងបទទារុណកម្មដែលមានស្ថានទម្ងន់ទោសដោយសារតែមរណៈនៃជនរងគ្រោះ ដែលប្រព្រឹត្តទៅនៅឃុំរកា ស្រុកសង្កែ ខេត្តបាត់ដំបង កាលពីអំឡុងឆ្នាំ១៩៩៦ ដល់ឆ្នាំ២០១៤។ បទចោទទាំងនេះ ត្រូវបានកែប្រែថ្មីពីបទចោទចាស់ គឺបទឃាតកម្មដោយអំពើឃោរឃៅតាមមាត្រា២០៥ នៃក្រមព្រហ្មទណ្ឌកម្ពុជា។
គួរបញ្ជាក់ថា លោកគ្រូពេទ្យ យ៉ែម ជ្រិន ត្រូវបានអាជ្ញាធរចាប់ខ្លួន កាលពីអំឡុងខែធ្នូ ឆ្នាំ២០១៤ បន្ទាប់ពីមានអ្នកភូមិរកាប្រមាណជា៣០០នាក់បានទៅធ្វើតេស្តឈាម ហើយរកឃើញថា មានផ្ទុកមេរោគអេដស៍ជាបន្តបន្ទាប់។ តុលាការខេត្តបាត់ដំបង បានចាប់ផ្តើមបើកសវនាការជំនុំជម្រះលើជនជាប់ចោទយ៉ែម ជ្រិន កាលពីថ្ងៃទី២០ ខែតុលា ឆ្នាំ២០១៥។ សវនាការជំនុំជម្រះនោះ បានធ្វើឡើងរយៈពេល ៥ថ្ងៃ គឺចាប់ពីថ្ងៃទី២០ ដល់ថ្ងៃទី២៤ ខែតុលា។
យ៉ាងណាក៏ដោយ មកដល់ពេលនេះ អ្នកភូមិរកា ដែលរងការចម្លងមេរោគអេដស៍ដោយសារតែលោកគ្រូពេទ្យយ៉ែម ជ្រិន មាន១០នាក់ហើយបានស្លាប់បាត់បង់ជីវិត។ អ្នកស្លាប់ទាំងនោះ មានប្រុស ៦នាក់ និងស្រី ចំនួន៤នាក់។
សូមរម្លឹកថា តុលាការខេត្តបាត់ដំបង បានចាប់ផ្តើមបើកសវនាការជំនុំជម្រះលើជនជាប់ចោទ គ្រូពេទ្យ យ៉ែម ជ្រិន កាលពីថ្ងៃទី២០ ខែតុលា ឆ្នាំ២០១៥។ សវនាការជំនុំជម្រះនោះ បានធ្វើឡើងរយៈពេល ៥ថ្ងៃ គឺចាប់ពីថ្ងៃទី២០ ដល់ថ្ងៃទី២៤ ខែតុលា។
គ្រូពេទ្យប្រចាំភូមិរកា យ៉ែម ជ្រិន ត្រូវបានចាប់ខ្លួន កាលពីខែធ្នូ ឆ្នាំ២០១៤ បន្ទាប់ពីមានអ្នកភូមិរការាប់រយនាក់ ទៅធ្វើតេស្តឈាម នៅមណ្ឌលសុខភាពរកា។ លទ្ធផលនៃការធ្វើតេស្តឈាមទាំងនោះ រកឃើញថា អ្នកភូមិប្រមាណជាជិត ៣០០នាក់ មានផ្ទុកមេរោគអេដស៍។ មកដល់ខែធ្នូ ឆ្នាំ២០១៥នេះ មានអ្នកផ្ទុកមេរោគអេដស៍ ប្រមាណជា ១០នាក់បានស្លាប់ ដោយសារជំងឺអេដស៍។ មេរោគអេដស៍នោះ ត្រូវបានឆ្លងដោយការព្យាបាលជំងឺរបស់គ្រូពេទ្យ យ៉ែម ជ្រិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ