អ្នកឆ្លងមេរោគអេដស៍ក្នុងឃុំរការ កើនឡើងដល់ជាង ២០០នាក់
រហូតមកទល់នឹងពេលនេះ ចំនួនអ្នកផ្ទុកមេរោគអេដស៍នៅក្នុងឃុំរការ ស្រុកសង្កែ ខេត្តបាត់ដំបងបានកើនឡើងរហូតដល់ជាង ២០០នាក់ ហើយ ខណៈដែលអ្នកភូមិនេះនៅតែបន្តទៅធ្វើតេស្តឈាមរកមេរោគនៅតាមមណ្ឌលសុខភាពជាបន្តបន្ទាប់។ ក្នុងចំណោមពួកគេ មានមនុស្ស១៥០នាក់ហើយដែលទទួលបានថ្នាំប្រឆាំងមេរោគអេដស៍ឬថ្នាំពន្យារជីវិត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ប្រជាជននៅក្នុងឃុំរការ នៅតែបន្តទៅធ្វើតេស្តឈាមរកមេរោគអេដស៍ជាបន្តបន្ទាប់។ នៅរយៈពេលចុងក្រោយនេះ ក្នុងមួយថ្ងៃៗ មានប្រជាជនប្រមាណជា ២០ ទៅ ៣០នាក់ បានទៅធ្វើតេស្ត ហើយគេបានរកឃើញអ្នកទទួលបានលទ្ធផលវិជ្ជមានដែរ។ ការរកឃើញជាបន្តបន្ទាប់នេះ បានធ្វើឲ្យចំនួនអ្នកផ្ទុកមេរោគនៅក្នុងឃុំរការនៅពេលបច្ចុប្បន្ននេះ បានកើនឡើង រហូតដល់ជាង ២០០នាក់។ នេះបើតាមការអះអាងរបស់មន្ត្រីសុខភាពឃុំ។
ប៉ុន្តែលោក មាន ឈីវុន នាយកមជ្ឈមណ្ឌលជាតិ ប្រយុទ្ធនឹងជំងឺអេដស៍ សើស្បែក និងកាមរោគពន្យល់ថា នៅមិនទាន់មានទិន្ននយ័ច្បាស់លាស់នោះទេ ដោយសារតែមន្ត្រីសុខាភិបាលកំពុងតែស្រង់ស្ថិតិនៅតាមមណ្ឌលសុខភាពនានានៅក្នុងឃុំរការ និង ក្នុងស្រុកសង្កែទាំងមូល។
លោក មាន ឈីវុន បានបន្តថានៅពេលឆាប់ៗនេះ ក្រសួងសុខាភិបាលនិងចេញសេចក្តីសម្រេចរួមមួយស្តីអំពីមូលហេតុនៃការឆ្លងរាលដាលមេរោគអេដស៍ដ៏ច្រើននៅក្នុងឃុំរការខេត្តបាត់ដំបងនេះ ខណៈដែលមន្ត្រីជំនាញកំពុងតែរង់ចាំការសម្រេចចុងក្រោយ។
លោកថាការបង្ហាញនូវលទ្ធផលជារួមនោះនឹងមិនរង់ចាំការបញ្ជាក់ពីលទ្ធផលសំណាកពិនិត្យឈាមពីមន្ទីរពិសោធវេជ្ជសាស្រ្តរបស់កូរ៉េខាងត្បូងនិងអាមេរិកដែលកម្ពុជាបានសុំអោយជួយនិងបានបញ្ជូនសំណាកឈាមទៅកាន់ប្រទេសទាំងពីរកាលពីខែធ្នូនោះទេ។
បើតាមមន្ត្រីសុខាភិបាលដដែល ការបញ្ជាក់សំណាកឈាមពីប្រទេសទាំងពីរត្រូវការពេលវេលាច្រើនទៀតព្រោះកម្ពុជាជាអ្នកស្នើសុំគេអោយជួយ។
មន្ត្រីសុខភាពក្នុងឃុំរការ បានឲ្យដឹងថា នៅពេលនេះ មានមនុស្សចាស់ជាច្រើននាក់បានធ្លាក់ខ្លួនឈឺ ហើយសម្រាកនៅក្នុងមណ្ឌលសុខភាព ខណៈដែលអ្នកផ្ទុកមេរោគដ៏ទៃផ្សេងទៀត កំពុងតែបាក់ទឹកចិត្ត និងមិនអាចប្រកបការរកស៊ីដូចមុនបាន។
ទន្ទឹមគ្នានេះ មន្ទីរសុខភាពខេត្តបាត់ដំបងក៏បានសម្រួលដល់ប្រជាជនទាំងអស់មិនចាំបាច់ទៅបើកថ្នាំប្រឆាំងមេរោគអេដស៍នៅទីរួមខេត្តនោះទេ គឺអាចទៅបើកនៅមណ្ឌលសុខភាពឃុំរការ ហើយក៏មានអង្គការក្រៅរដ្ឋាភិបាលមួយចំនួនចុះទៅជួយអប់រំ និងលើកទឹកចិត្តដល់ពួកកាត់ផងដែរ។ រហូតមកដល់ពេលនេះ មានមនុស្សចំនួន ១៥០ នាក់ហើយដែលបានទទួលថ្នាំពន្យារជីវិត។ នេះបើយោងតាមមន្ត្រីសុខភាពឃុំរការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ