យុវជនខ្មែរត្រូវពង្រឹងចំណេះនិងជំនាញ ដើម្បីធានាទីផ្សារការងារ ពេលអាស៊ានធ្វើសមាហរណកម្មសេដ្ឋកិច្ច
ចុះផ្សាយនៅថ្ងៃ៖
ស្តាប់ - ០៥:២៦
ម្សិលមិញ ថ្នាក់ដឹកនាំកំពូលនៃប្រទេសជាសមាជិកសមាគមអាស៊ានទាំង១០ប្រទេស បានចុះហត្ថលេខាជាប្រវត្តិសាស្ត្រ បង្កើតសហគមន៍អាស៊ាន។ សហគមន៍អាស៊ាន ដែលប្រទេសជាសមាជិកទាំង១០ត្រូវធ្វើសមាហរណកម្មសេដ្ឋកិច្ចជាមួយគ្នា ចាប់ពីដើមឆ្នាំ២០១៦ខាងមុខតទៅ។ នៅក្នុងបរិបទធ្វើសមាហរណកម្មសេដ្ឋកិច្ចអាស៊ាន បញ្ហាទីផ្សារការងារ កំពុងតែក្លាយទៅជាក្ដីបារម្ភ សម្រាប់យុវជនកម្ពុជាមួយចំនួនធំ។ ឆ្លើយតបនឹងបញ្ហានេះ អ្នកជំនាញបានណែនាំឲ្យយុវជនខ្មែរ ត្រៀមខ្លួនឲ្យបានល្អប្រសើរ ដើម្បីធានាឲ្យបាននូវទីផ្សារការងាររបស់ខ្លួន នៅពេលអាស៊ានធ្វើសមាហរណកម្មសេដ្ឋកិច្ច។
អាស៊ានត្រូវបានបង្កើតឡើងនៅក្នុងឆ្នាំ១៩៦៧ ដោយប្រទេសក្នុងតំបន់អាស៊ីអាគ្នេយ៍ ក្នុងគោលដៅឱបក្រសោបបណ្ដាប្រទេសនៅក្នុងតំបន់នេះ ឲ្យក្លាយជាសហគមន៍ដ៏រឹងមាំមួយ លើវិស័យសេដ្ឋកិច្ច យោធា និងវប្បធម៌។ ប្រទេសកម្ពុជាឯណេះវិញ បានក្លាយជាសមាជិកអាស៊ាន នៅក្នុងឆ្នាំ១៩៩៩។
គ្មានការប្រែប្រួលទេ នៅឆ្នាំចុង២០១៥នេះ អាស៊ាននឹងធ្វើសមាហរណកម្មសេដ្ឋកិច្ចអាស៊ាន ដែលនឹងបើកចំហឲ្យមានលំហូរទំនិញ សេវាកម្ម មូលធន និងទុនវិនិយោគពីប្រទេសមួយទៅប្រទេសមួយទៀតដោយសេរី។ លើសពីនេះ ពលរដ្ឋដែលមានជំនាញច្បាស់លាស់នៃប្រទេសអាស៊ាន នឹងអាចធ្វើការនៅក្នុងប្រទេសជាសមាជិកអាស៊ានទាំង១០ ដោយសេរីផងដែរ។
តំបន់អាស៊ាន ដែលមានប្រជាពលរដ្ឋជាង៦០០លាននាក់ ត្រូវបានគេមើលឃើញថា ជាឱកាសសម្រាប់កម្ពុជា។ ជាឱកាស ព្រោះបើតាមការសិក្សាស្រាវជ្រាវ ផលិតផលសរុបក្នុងស្រុករបស់កម្ពុជា នឹងកើនឡើង៤,៥ភាគរយ ការវិនិយោគឯកជននឹងកើនឡើងជិត២៥ភាគរយ ហើយការនាំចេញរបស់កម្ពុជានឹងកើនឡើងប្រមាណ៥ភាគរយ នៅពេលអាស៊ានធ្វើសមាហរណកម្មសេដ្ឋកិច្ច នៅចុងឆ្នាំ២០១៥នេះ។
អ្នកវិភាគសង្គមបានគូសបញ្ជាក់ថា យុវជនកម្ពុជា ដើរតួនាទីសំខាន់ណាស់ ក្នុងការកសាងសហគមន៍អាស៊ាន ទាំងនៅក្នុងដំណាក់កាលបច្ចុប្បន្ន និងទៅអនាគត។ កម្ពុជាមានយុវជន ដែលមានអាយុក្រោម២៥ឆ្នាំ រហូតដល់ទៅជាង៥២ភាគរយ។ លើសពីនេះ បើនិយាយពីប្រជាជនវ័យក្មេងវ័យក្រោម៣៥ឆ្នាំ គឺកម្ពុជាមានរហូតដល់ទៅជិត៧០ភាគរយឯណោះ។ លក្ខណៈប្រជាសាស្ត្រនេះ អំណោយផលដល់កម្ពុជា សម្រាប់ចូលរួមក្នុងកម្លាំងពលកម្មអាស៊ាន។
ប៉ុន្តែយ៉ាងណាក៏ដោយ ទន្ទឹមនឹងផលចំណេញនេះ កម្ពុជាក៏នឹងត្រូវជួបប្រទះបញ្ហាប្រឈមមួយចំនួនផងដែរ។ ក្នុងចំណោមនោះ បញ្ហាទីផ្សារការងារ កំពុងតែក្លាយទៅជាក្ដីបារម្ភ សម្រាប់យុវជនកម្ពុជា មួយចំនួនធំ។ ក្ដីបារម្ភនោះ គឺខ្លាចថា សមាហរណកម្មសេដ្ឋកិច្ចអាស៊ាន នឹងប្រែក្លាយប្រទេសកម្ពុជាទៅជាជ្រោះជ្រៅមួយ ដែលមានសម្រាប់តែទឹកហូរចូល។ មានន័យថា ទីផ្សារការងាររបស់កម្ពុជា នឹងបើកចំហសម្រាប់យុវជនបរទេស ប៉ុន្តែវានឹងប្រែជាតូចចង្អៀត សម្រាប់យុវជនខ្មែរ។ យុវជនខ្មែរដែលមិនទាន់មានសមត្ថភាព មិនទាន់មានជំនាញ និងដែលមិនមានលទ្ធភាពរកការងារធ្វើបាន។
នៅក្នុងបរិបទដូច្នេះ តើយុវជនខ្មែរគួរត្រៀមខ្លួនយ៉ាងដូចម្ដេចខ្លះ ដើម្បីធានាឲ្យបាននូវទីផ្សារការងារ នៅពេលអាស៊ានប្រែក្លាយខ្លួនជាសហគមន៍តែមួយ?
ទីមួយ ដំបូងបង្អស់គឺចំណេះដឹងផ្នែកភាសា។ កន្លងមក និន្នាការនៃការជ្រើសរើសរៀនភាសារបស់យុវជននៅកម្ពុជា ប្រែប្រួលទៅតាមស្ថានភាពទីផ្សារការងារ។ តាំងពីដើមមកហើយ យុវជនខ្មែរផ្ដល់តម្លៃខ្លាំងទៅលើការសិក្សាភាសាអង់គ្លេស និងចិន ដោយសារតែងាយរកការងារធ្វើ និងងាយទទួលបានប្រាក់ខែខ្ពស់។ ប៉ុន្តែក្រោយមក ដោយសារតែមានអ្នកវិនិយោគកូរ៉េ ចូលមករកស៊ីនៅកម្ពុជាច្រើន យុវជនខ្មែរក៏បានងាកទៅរៀនភាសាកូរ៉េវិញ។ ភាពពេញនិយមរបស់ភាសាកូរ៉េបានថយចុះនាពេលបន្ទាប់មក ជំនួសមកវិញដោយភាសាជប៉ុន ក្រោយពីវត្តមានកុះកររបស់ក្រុមហ៊ុនជប៉ុននៅកម្ពុជា។ អ្នកជំនាញបានលើកទឹកចិត្ត ចំពោះចំណង់រៀនភាសាបរទេសរបស់យុវជនកម្ពុជា ប៉ុន្តែបានណែនាំឲ្យខិតខំប្រឹងប្រែងបន្ថែមទៀតចំពោះភាសាអង់គ្លេស ដែលជាភាសាការងារផ្លូវការរបស់អាស៊ាន។ ទន្ទឹមគ្នានេះ យុវជនខ្មែរក៏ត្រូវបានលើកទឹកចិត្តឲ្យសិក្សាភាសាមួយបន្ថែមទៀត។ ភាសាមួយណាក៏បាន នៃប្រទេសជាសមាជិកអាស៊ានទាំងដប់។
ទីពីរ៖ សំខាន់បំផុតគឺជំនាញវិជ្ជាជីវៈ។ ដូចបានលើកឡើងមុននេះហើយថា នៅពេលអាស៊ានធ្វើសមាហរណកម្ម ទីផ្សារការងារលែងមានព្រំដែនទៀតហើយ។ យុវជនមកពីគ្រប់ប្រទេសនៅក្នុងអាស៊ាន មានឱកាសស្មើៗគ្នា ក្នុងការដណ្ដើមយកការងារល្អៗ។ ប៉ុន្តែ ជំនាញវិជ្ជាជីវៈដែលនៅមានកម្រិត គឺជាឧបសគ្គមួយចម្បង ដែលរារាំងមិនឲ្យយុវជនកម្ពុជា ឈានជើងចូលទៅក្នុងទីផ្សារអាស៊ានឲ្យបានពេញលេញ។ ក្នុងន័យនេះ ក្រសួងអប់រំ និងស្ថាប័នពាក់ព័ន្ធទាំងអស់ ព្រមទាំងយុវជនខ្លួនឯងផង ត្រូវតម្រង់ទិសដៅការអប់រំ និងបណ្ដុះបណ្ដាលជំនាញវិជ្ជាជីវៈ ធ្វើយ៉ាងណាឆ្លើយតបឲ្យបានទៅនឹងក្របខណ្ឌគុណវុឌ្ឍិ និងការព្រមព្រៀងនៅក្នុងក្របខណ្ឌអាស៊ាន។
ក្រៅពីចំណេះដឹងភាសា និងជំនាញវិជ្ជាជីវៈ យុវជនកម្ពុជាក៏ត្រូវបានជំរុញឲ្យបង្កើនការយល់ដឹងពីវប្បធម៌ ឲ្យបានទូលំទូលាយ។ អាស៊ានជាបណ្ដុំប្រទេសចំនួន១០ ដែលក្រៅតែពីមានភាសាខុសគ្នាហើយ វប្បធម៌ក៏ខុសប្លែកពីគ្នាខ្លាំងណាស់ដែរ។ ការយល់ដឹងពីវប្បធម៌ឲ្យបានទូលំទូលាយ ជាពិសេសវប្បធម៌របស់ប្រទេសដែលជាគោលដៅបំពេញការងារ នឹងជួយឲ្យយុវជនបានច្រើន ទាំងនៅក្នុងការងារ និងការប្រាស្រ័យទាក់ទង។
ថ្វីត្បិតតែការរៀបចំត្រៀមខ្លួននៅពេលនេះ ហាក់ដូចជាយឺតពេលបន្តិច ក៏ប៉ុន្តែប្រសិនបើអាចសម្រេចបានមែននោះ យុវជនកម្ពុជានឹងអាចទាញយកផលប្រយោជន៍បានយ៉ាងច្រើន ពីសមាហរណកម្មសេដ្ឋកិច្ចអាស៊ាន។ សមាហរណកម្មសេដ្ឋកិច្ចអាស៊ាន ដែលនឹងខិតជិតចូលមកដល់នៅពេលដ៏ខ្លីខាងមុខនេះ។
អាស៊ានគឺជាតំបន់ដែលមានសក្ដានុពលខ្ពស់ ប៉ុន្តែទន្ទឹមគ្នានេះ បញ្ហាប្រឈមរបស់អាស៊ានក៏មានច្រើនផងដែរ។ ដូច្នេះប្រជាពលរដ្ឋវ័យក្មេងរបស់អាស៊ាន ច្បាស់ណាស់ថា នឹងត្រូវជួបប្រទះនូវបញ្ហាអស់ទាំងនោះ។ ហើយដើម្បីជោគជ័យ ដើម្បីការអភិវឌ្ឍ យុវជនអាស៊ាន ជាពិសេសយុវជនកម្ពុជា ចាំបាច់ត្រូវបង្កើនការទាក់ទងល្អជាមួយប្រទេសជិតខាង និងប្រទេសក្នុងតំបន់ និងជាពិសេស គឺត្រូវពង្រឹងសមត្ថភាព ព្រមទាំងជំនាញរបស់ខ្លួនឲ្យបានខ្លាំងក្លា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ