សហជីពអាស៊ានចាប់ផ្តើមជជែកពីអនាគតពលករចំណាកស្រុកនៅពេលសមាហរណកម្ម
ក្រុមមេដឹកនាំសហជីពអាស៊ានចាប់ផ្តើមជជែកគ្នាពីស្ថានភាពពលករចំណាកស្រុក និងជំនាញការងាររបស់ពួកគេ មុនកាល បរិច្ឆេទសមាហរណកម្មអាស៊ានចូលមកដល់នៅដំណាច់ឆ្នាំ២០១៥នេះ។ អ្វីដែលជាការប្រឈមនោះគឺសមត្ថភាពនិងលទ្ធភាពការងារ ជំនាញវិជ្ជាជីវៈ ពលករនៅក្នុងប្រទេសអាស៊ាន មានលក្ខណៈមិនទាន់ស្ថិតនៅក្នុងក្របខណ្ឌនៃស្តង់ដារតែមួយ ដែលជាការព្រួយបារម្ភរបស់ប្រទេសជាសមាជិកមួយចំនួន ដែលមានភាពទន់ខ្សោយ។
ចុះផ្សាយនៅថ្ងៃ៖
ស្តាប់ - ០២:០២
តាមរយៈកិច្ចប្រជុំរបស់មេដឹកនាំសហជីពអាស៊ានរយៈពេល៣ថ្ងៃគឺពីថ្ងៃទី២៦ដល់ថ្ងៃទី២៨តុលាឆ្នាំ២០១៥ កន្លងទៅនេះនៅប្រទេសសិង្ហបុរី ស្ថានភាពពលករ ស្តង់ដារប្រាក់ឈ្នួលអប្បរមា ស្តង់ដារសុវត្ថិភាព ការការពារ និងស្តង់ដារលក្ខខណ្ឌការងារនៅក្នុងប្រទេសអាស៊ាន ត្រូវបានលើកយកមកពិភាក្សាជាប្រធានបទសំខាន់។
ដោយកន្លងមកមិនទាន់មានភាពទូលំទូលាយ សិទ្ធទទួលបានការងារ សិទ្ធិទទួលបានការការពារនៅក្នុងប្រទេសទទួល នៅមានកំរិតនៅឡើយ។បញ្ហានេះត្រូវបានជជែកនិងស្នើឲ្យមានកិច្ចព្រមព្រៀងក្នុងតំបន់អាស៊ាន ដើម្បីឲ្យមានការទទួលស្គាល់សិទ្ធិពលករចំណាក ស្រុកក្នុងការចូលឬបង្កើតសហជីពនៅប្រទេសដែលពួកគេប្រកបការងារ។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ស៊ីខៅឌូ លោក អាត់ ធន់ ដែលបានទៅចូលរួមកិច្ចប្រជុំនេះលើកឡើងថា ពលករខ្មែរមានការប្រឈមខ្លាំងនៅពេលដែលមានការច្របាច់បញ្ចូលទីផ្សារការងារអាស៊ាន ជាពិសេសពលករកម្ពុជាដែលមានជំនាញតិចតួច អាចនឹងបាត់បង់ឱកាសពីការងារដែលមានប្រាក់ចំណូលខ្ពស់។
សម្រាប់ពលករចំណាកស្រុកកម្ពុជាបច្ចុប្បន្ន ទើបតែមានកិច្ចព្រមព្រៀងរួមជាមួយប្រទេសថៃប៉ុណ្ណោះ ក្នុងការធានាដល់កម្មករខ្មែរ ដែលទៅធ្វើការនៅប្រទេសថៃអាចមានសិទ្ធិចូលជាសមាជិកសហជីពនៅក្នុងប្រទេសថៃនោះ ឬអាចបង្កើតជាសហជីពនៅទីនោះតែម្តង។ ក្រុមមេដឹកនាំសហជីពមើលឃើញថា ការដែលមានសហជីព ឬសមាគមជួយការពារពួកគេនៅក្នុងប្រទេសដែលទទួលឲ្យធ្វើការនោះ គឺមានសារៈសំខាន់ណាស់ ធានាបាននិងទប់ស្កាត់ការរំលោភសិទ្ធិពលករ ដែលកន្លងមក មានការកេងប្រវ័ញ្ជពីនិយោជកគ្រប់រូបភាពដូចជាការផ្តល់ប្រាក់ឈ្នួលមិនសមស្រប តាមកំលាំងការងារជាដើម។
សូមបញ្ជាក់ថាពលករខ្មែរបានដែលធ្វើចំណាកស្រុកទៅធ្វើការនៅក្រៅប្រទេសទាំងស្របច្បាប់និងមិនស្របច្បាប់ មានប្រមាណជា១លាននាក់ ក្នុងនោះជាង៨សែននាក់នៅប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ