ប្រធានគណៈកម្មការព្រំដែនកម្ពុជា-ថៃជួបគ្នាឡើងវិញ
នៅថ្ងៃអង្គារនេះ ប្រធានគណៈកម្មការព្រំដែនចម្រុះកម្ពុជា និងថៃ បានផ្តើមជួបមុខគ្នាជាថ្មីឡើងវិញ ដើម្បីឈានដល់ការពិភាក្សា ដោះស្រាយបញ្ហាព្រំដែនរវាងប្រទេសទាំងពីរ។ កិច្ចប្រជុំដោយបិទទ្វារប្រហែលមួយម៉ោង នៅទីស្តីការគណៈរដ្ឋមន្ត្រី ក្នុងទីក្រុងភ្នំពេញ នៅព្រឹកថ្ងៃអង្គារ ទី ១១ មករា សមភាគីកម្ពុជា-ថៃ បានបង្ហាញឆន្ទៈក្នុងការពន្លឿនកិច្ចការរុករកបង្គោល និងវាស់វែងកំណត់ព្រំដែនរវាងប្រទេសទាំងពីរ ក្រោយពីកិច្ចការចរចាដោះស្រាយបញ្ហាព្រំដែនកម្ពុជា-ថៃ ជាប់គាំង គ្មានច្រកចេញ ដោយសារវិបត្តិនយោបាយ ក្នុងប្រទេសថៃ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លី ម៉េងហួរពីទីក្រុងភ្នំពេញ
លោក វ៉ា គីមហុង ប្រធានគណៈកម្មការព្រំដែន របស់រដ្ឋាភិបាលកម្ពុជា បានទទួលជួបលោក អាសដា ចាយ៉ាណាមា ( Asda Jayanama ) ប្រធានគណៈកម្មការព្រំដែនថៃ នៅទីស្តីការគណៈរដ្ឋមន្ត្រី ក្នុងទីក្រុងភ្នំពេញ។ លោក អាសដា អតីតឯកអគ្គរាជទូតថៃ ប្រចាំអង្គការសហប្រជាជាតិទើបតែទទួលការតែងតាំងថ្មី ជំនួសលោក វ៉ាសិន តៀរាវិចយ៉ាន ( Vasin Teeravechyan ) ដែលបានលាលែង ចេញពីប្រធានគណៈកម្មការព្រំដែនថៃ កាលពីថ្ងៃទី១ ខែវិច្ឆិកា ឆ្នាំ២០១០។
ក្នុងកិច្ចប្រជុំដោយបិទទ្វាររយៈពេលប្រហែលមួយម៉ោង នៅព្រឹកថ្ងៃអង្គារ ប្រធានគណៈកម្មការព្រំដែនកម្ពុជា-ថៃ បានពិភាក្សា និងព្រមព្រៀងគ្នាថា នឹងផ្តើមកិច្ចការ ប្រជុំចរចា ឈានទៅដោះស្រាយបញ្ហាព្រំដែនរវាងប្រទេសទាំងពីរឡើងវិញ។ ភាគីទាំងពីរ ក៏បានព្រមព្រៀងបញ្ជូនក្រុមការងារបច្ចេកទេស ទៅរុករកបង្គោលព្រំដែនកម្ពុជា-ថៃ ពីលេខ ១ ដល់លេខ ២៣ ដែលស្ថិតនៅព្រំដែនជាំសាងាំ ក្នុងខេត្តឧត្តរមានជ័យ នាពេលខាងមុខ។
ក្រោយពីកិច្ចប្រជុំ លោកទេសរដ្ឋមន្ត្រី វ៉ា គីមហុង ប្រធានគណៈកម្មការព្រំដែនរបស់រដ្ឋាភិបាលកម្ពុជាបានចាត់ទុកជំនួបជាមួយនឹងសមភាគីថៃ ជាចំណុចវិជ្ជមានមួយ ដើម្បីតភ្ជាប់ នូវទំនាក់ទំនងចរចា ឈានដល់កិច្ចប្រជុំរវាងគណៈកម្មការព្រំដែនចម្រុះកម្ពុជា-ថៃ ( JBC ) ដើម្បីដោះស្រាយបញ្ហាព្រំដែនរវាងប្រទេសទាំងពីរឡើងវិញ ក្រោយពីកិច្ចប្រជុំចុងក្រោយ រវាងគណៈកម្មការចម្រុះព្រំដែនកម្ពុជា-ថៃ ដឹកនាំដោយរដ្ឋមន្ត្រីការបរទេសប្រទេសទាំងពីរ បានធ្វើឡើង នៅភ្នំពេញ កាលពីឆ្នាំ២០០៩។
ចំណែកលោក អាសដា ចាយ៉ាណាមា ប្រធានគណៈកម្មការព្រំដែនថៃ ក៏បានឆ្លើយតបនឹងសំណួរអ្នកកាសែតកម្ពុជាថា រដ្ឋសភាថៃ កំពុងតែពិនិត្យលើកំណត់ហេតុទាំង ៣ នៃកិច្ចប្រជុំរវាងគណៈកម្មការចម្រុះព្រំដែនកម្ពុជា-ថៃ ដោយត្រូវចំណាយពេល ៣០ ថ្ងៃទៀត មុនពេលរដ្ឋសភា ត្រូវបញ្ជូនកំណត់ហេតុនោះ បន្តទៅកាន់ក្រុមប្រឹក្សាធម្មនុញ្ញ ដើម្បីពិនិត្យ និងសម្រេច។ ជាកំណត់ហេតុ ដែលឈានដល់ការចុះវាស់វែង និងកំណត់ព្រំដែនរវាងកម្ពុជា និងថៃ នៅព្រំដែនប្រាសាទព្រះវិហារ។
យ៉ាងណាក៏ដោយ លោក អាសដា អតីតឯកអគ្គរាជទូតថៃច្រើនជំនាន់ ក៏បានបញ្ជាក់ថា គណៈកម្មការព្រំដែនកម្ពុជា និងថៃ ត្រូវតែបន្តធ្វើការងារ ជួបចរចា និងដោះស្រាយបញ្ហាព្រំដែន ដើម្បីផលប្រយោជន៍របស់ប្រទេសទាំងពីរ។
សូមរម្លឹកថា គណៈកម្មការព្រំដែនចម្រុះកម្ពុជា និងថៃ បានខកខាន មិនបានដោះស្រាយ រុករក និងវាស់វែងទីតាំងបង្គោលព្រំដែនសម័យដើម ចាប់តាំងពីកងទ័ពថៃ ចូលលុកលុយព្រំដែនប្រទេសកម្ពុជា នៅចំណុចប្រាសាទព្រះវិហារ កាលពីថ្ងៃទី១៥កក្កដា ឆ្នាំ២០០៨។ កិច្ចប្រជុំរវាងគណៈកម្មការទាំងពីរ បានធ្វើឡើង ៣ លើក ជាបន្តបន្ទាប់ ចាប់តាំងពីមានជម្លោះព្រំដែន រហូតដល់ពាក់កណ្តាលឆ្នាំ២០០៩ តែមិនបានសម្រេចអ្វីជាផ្លូវការឡើយ ដោយសារតែរដ្ឋសភាថៃ មិនព្រមអនុម័តលើកិច្ចព្រមព្រៀងកំណត់ហេតុទាំង ៣ នោះ រហូតដល់សព្វថ្ងៃ។ ការមិនអនុម័តលើកិច្ចព្រមព្រៀងព្រំដែន ដោយសារតែនយោបាយផ្ទៃក្នុងប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ