ហ៊ុន សែន៖ ជម្លោះព្រំដែនកម្ពុជា-ថៃដោះស្រាយរួចរាល់ហើយ
នៅព្រឹកថ្ងៃច័ន្ទ ទី៦ធ្នូនេះ លោកនាយករដ្ឋមន្ត្រី ហ៊ុន សែន បានប្រកាសថា សភាពការណ៍ព្រំដែនកម្ពុជា-ថៃ បានវិលត្រឡប់ទៅរកសភាពធម្មតា ដូចមុនថ្ងៃ ១៥ កក្កដា ឆ្នាំ២០០៨ វិញហើយ។ នោះគឺកងទ័ពកម្ពុជា និងកងទ័ពថៃ ត្រូវបានវិលទៅឈរជើងនៅទីតាំងដើម ដោយមិនមានការប្រឈមមុខដាក់គ្នាទៀតឡើយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីភ្នំពេញ
ក្នុងពិធីចែកសញ្ញាប័ត្រដល់គរុសិស្សបញ្ចប់ការសិក្សា នៅព្រឹកមិញ លោកនាយករដ្ឋមន្ត្រី ហ៊ុន សែន បានមានប្រសាសន៍យ៉ាងខ្លី អំពីបញ្ហាព្រំដែនកម្ពុជា-ថៃ ដែលមានភាពតានតឹងជាងពីរឆ្នាំមកហើយនោះថា ត្រូវបានដោះស្រាយហើយនៅពេលនេះ។
ដោយមិនបកស្រាយអ្វីវែងឆ្ងាយ លោកប្រមុខរដ្ឋាភិបាល ហ៊ុន សែន បានគូសបញ្ជាក់ថា សភាពការណ៍តាមទល់ដែនកម្ពុជា-ថៃ បានវិលទៅរកមុនថ្ងៃ ១៥កក្កដា ឆ្នាំ២០០៨។ ថ្ងៃ១៥កក្កដា ឆ្នាំ២០០៨ ជាថ្ងៃដែលកងទ័ពថៃ បានចូលទន្ទ្រានទឹកដីកម្ពុជា នៅចំណុចព្រំដែនប្រាសាទព្រះវិហារ ដែលនាំឲ្យមានការប្រឈមមុខដោយយោធា រហូតដល់មានការបាញ់ប្រយុទ្ធគ្នា ធ្វើឲ្យកងទ័ពទាំងសងខាងស្លាប់ និងរបួសជាច្រើននាក់។
ជាមួយនឹងការលើកឡើងដូច្នេះ លោកនាយករដ្ឋមន្ត្រី ហ៊ុន សែន ក៏បានបន្ថែមថា តាមទល់ដែនកម្ពុជា-ថៃទាំងមូល ក៏មានការកែសម្រួលកងទ័ព និងការទាក់ទងផ្លាស់ប្តូរទំនិញទៅវិញទៅមក បន្ទាប់ពីនាយករដ្ឋមន្ត្រីទាំងពីរបានជួបពិភាក្សារកដំណោះស្រាយ ៤លើករួចមក។
ប្រមុខរដ្ឋាភិបាលកម្ពុជាក៏បានគូសបញ្ជាក់ផងដែរថា បញ្ហាព្រំដែនរវាងកម្ពុជា និងថៃ មិនទាន់ចប់ទាំងស្រុងនោះទេ។ ទៅថ្ងៃក្រោយ នៅមានការវាស់វែង និងការដោះមីនតាមព្រំដែន ហើយក៏នៅមានការបើកច្រកព្រំដែនបន្ថែមទៀតរវាងកម្ពុជា-ថៃ ដើម្បីជំរុញសហប្រតិបត្តិការ រវាងប្រទេសជាប់ព្រំដែនទាំងពីរ។
ដើម្បីរម្លឹកខួបលើកទី៦០ឆ្នាំ នៃទំនាក់ទំនងការទូតកម្ពុជា-ថៃ ប្រទេសទាំងពីរបានរៀបចំការប្រគំតន្ត្រីរួមគ្នានៅទីក្រុងបាងកក និងនៅទីក្រុងភ្នំពេញ នៅថ្ងៃ ១៩ ធ្នូខាងមុខ ដោយមានវត្តមានរបស់លោករដ្ឋមន្ត្រីការបរទេសថៃ កាស៊ីត ភីរម្យ ចូលរួមផងដែរ។
ជារួម លោកនាយករដ្ឋមន្ត្រី ហ៊ុន សែន បានប្រកាសយ៉ាងខ្លីថា ប្រក្រតីកម្មនៃទំនាក់ទំនងកម្ពុជា-ថៃ កើតមានពេញលេញហើយ នៅពេលនេះ។
ជាការកត់សម្គាល់ ចាប់តាំងពីដើមខែធ្នូនេះ កងទ័ពកម្ពុជា និងកងទ័ពថៃ ត្រូវបានកែសម្រួលតាមព្រំដែន ពិសេសព្រំដែនប្រាសាទព្រះវិហារ។ ពោលគឺកម្លាំងកងទ័ព បានដកទៅឈរជើង ក្នុងបន្ទាយ និងបានលុបលានដ្ឋាន លែងភ្ជង់កាំភ្លើងដាក់គ្នាទៀតហើយ។
យ៉ាងណាក៏ដោយ បញ្ហាព្រំដែនកម្ពុជា និងថៃ នៅតែជាប្រធានបទដ៏ក្តៅគគុក នៃនយោបាយផ្ទៃក្នុងរបស់ប្រទេសថៃ។ សម្ព័ន្ធប្រជាជនដើម្បីលទ្ធិប្រជាធិបតេយ្យ ដែលជាក្រុមអាវលឿងថៃ ជាអ្នកគាំទ្ររដ្ឋាភិបាលរបស់លោកអាភិស៊ីត បានប្រកាសធ្វើបាតុកម្មនៅទូទាំងប្រទេស នាថ្ងៃទី២៥មករា ដើម្បីប្រឆាំងជំទាស់នឹងការអនុម័តរបស់សភាថៃ លើកំណត់ហេតុនៃកិច្ចប្រជុំរួម ស្តីពីព្រំដែនកម្ពុជា-ថៃ។ ជាកំណត់ហេតុ សម្រាប់ដោះស្រាយវិវាទព្រំដែនកម្ពុជា-ថៃ នៅព្រំដែនប្រាសាទព្រះវិហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ