រដ្ឋាភិបាលកម្ពុជាសោកស្តាយដែលសភាអឺរុប មិនឲ្យតំលៃការងារខ្លួន
ក្រសួងការបរទេសកម្ពុជា បានចេញសេចក្តីថ្លែងការណ៍មួយចុះថ្ងៃទី ១២មិថុនា ដោយបានបញ្ជាក់ថា រដ្ឋាភិបាល មានការសោកស្តាយចំពោះសេចក្តីសម្រេចចិត្តរបស់សភាអឺរុប។ សោកស្តាយ ដោយសាររដ្ឋាភិបាលកម្ពុជា យល់ថា សភាអឺរុប មិនបានឲ្យតំលៃការងារការពារជាតិរបស់ខ្លួន ហើយថារដ្ឋាភិបាល មិនអាចទទួលយកការជ្រៀតជ្រែកកិច្ចការផ្ទៃក្នុងរបស់សភាអឺរុបបាននោះទេ ព្រោះកម្ពុជា ពុំស្ថិតនៅក្រោមអភិបាលកិច្ចរបស់ស្ថាប័នបរទេសនោះឡើយ។ សូមបញ្ជាក់ថា កាលពីថ្ងៃទី ០៩មិថុនា សភាអឺរុប បានចេញសេចក្តីសម្រេច ៧ចំនុច ដែលមានខ្លឹមសារឲ្យរដ្ឋាភិបាលកម្ពុជា ត្រូវតែបន្ធូរបន្ថយភាពតានតឹងនយោបាយ ដោយដោះលែងសកម្មជននយោបាយ និងសកម្មជនការពារសិទ្ធិមនុស្ស ឲ្យបានមុនការបោះឆ្នោតឆ្នាំ ២០១៧ និង២០១៨។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
សេចក្តីថ្លែងការណ៍របស់អ្នកនាំពាក្យក្រសួងការបរទេស បានឲ្យដឹងថា រដ្ឋាភិបាលកម្ពុជា មានការភ្ញាក់ផ្អើលយ៉ាងខ្លាំង ក្រោយពីបានអានឯកសារមួយ ដែលអនុម័តដោយសភាអឺរ៉ុប។ រដ្ឋាភិបាលខ្មែរ បានហៅការអនុម័តនោះ ថាធ្វើឡើងដោយមិនបានផ្អែកលើព័ត៌មានពិត និងបានជំរុញឲ្យសភាអឺរុប គួរតែសក្សា ស៊ើបអង្កេតឲ្យបានម៉ត់ហ្មត់ ដោយមិនមែនសំអាងលើប្រភពលំអៀង ពាក្យចចាមអារាម ឬព័ត៌មានដែលមានលក្ខណៈបំភ័យនយោបាយនោះឡើយ។
គួររម្លឹកជូនថា កាលពីថ្ងៃទី ០៩មិថុនា សភាអឺរុប បានចេញសេចក្តីសម្រេច ៧ចំនុច ដែលរួមមាន អំពាវនាវ និងជំរុញឲ្យរដ្ឋាភិបាលកម្ពុជា ត្រូវតែបន្ធូរបន្ថយកំដៅនយោបាយនាពេលបច្ចុប្បន្ន ហើយត្រូវបញ្ឈប់ ការយាយីដោយប្រព័ន្ធតុលាការ ទៅលើមេដឹកនាំគណបក្សប្រឆាំង លោកសម រង្ស៊ី និងលោកកឹម សុខា រួមទាំងសកម្មជនការពារសិទ្ធិមនុស្ស ដែលកំពុងជាប់ឃុំផ្សេងទៀត ហើយត្រូវទំលាក់រាល់បទចោទប្រកាន់ទៅលើពួកគេ។ ក្នុងនោះ សភាអឺរុប បានសម្រេចជំរុញឲ្យអាជ្ញាធរកម្ពុជា ត្រូវត្រលប់មកបង្កើតវប្បធម៌សន្ទនាជាថ្មី ដើម្បីរក្សាសន្តិភាពជាមួយនឹងគណបក្សប្រឆាំង មុនពេលការបោះឆ្នោតក្រុមប្រឹក្សាក្រុមសង្កាត់ នៅឆ្នាំ ២០១៧ និងការបោះឆ្នោតជាតិ នៅឆ្នាំ ២០១៨។
សភាអឺរុប បានរម្លឹកឲ្យរដ្ឋាភិបាលកម្ពុជា ត្រូវគោរព និងពង្រឹងគោលការណ៍ប្រជាធិបតេយ្យ កិច្ចព្រមព្រៀងសហប្រត្តិបតិ្តការ និងច្បាប់ស្តីពីការការពារសិទ្ធិមនុស្សអន្តរជាតិ។ ហើយសភាអឺរុប ក៏អំពាវនាវឲ្យបញ្ឈប់ការរំលោភសិទ្ធិ តាមរយៈសកម្មភាពឃុំខ្លួនជនសង្ស័យ ហើយត្រូវដោះលែងអ្នកទោសនយោបាយមកវិញជាបន្ទាន់ និងផ្តល់សេរីភាពដល់អង្គការសង្គមស៊ីវិលជាថ្មី។
ជាការឆ្លើយបកទៅសភាអឺរុបវិញ អ្នកនាំពាក្យក្រសួងការបរទេស ដែលតំណាងឲ្យរដ្ឋាភិបាលកម្ពុជា បានបញ្ជាក់ថា គេមិនបានគាបសង្កត់សិទ្ធិសេរីភាពបញ្ចេញមតិរបស់សង្គមស៊ីវិល សមាជិក ឬមេដឹកនាំគណបក្សសង្គ្រោះជាតិណាម្នាក់នោះទេ ដោយនេះគ្រាន់តែជាការអនុវត្តតាមប្រព័ន្ធតុលាការ ព្រោះពួកគេពិតជាបានប្រព្រឹត្តិកំហុស រួមមានការញុះញង់ឲ្យមានការរើសអើងជាតិសាសន៍ បង្កអស្ថេរភាពដល់សង្គមជាតិ ប្រឌិតព័ត៌មាន បរិហាកេរ្តិ៍ និងជេរប្រមាថអ្នកដទៃ។ រដ្ឋាភិបាលកម្ពុជា បានឌឺទៅសភាអឺរុបវិញថា ការអនុវត្តនីតិវិធីច្បាប់នេះ គឺជារឿងសាមញ្ញមួយ ដែលប្រទេសលោកខាងលិចទាំងអស់ ក៏មានការដាក់ទណ្ឌកម្ម ដូចគ្នាផងដែរ មិនមែនតែនៅកម្ពុជានោះទេ។
រដ្ឋាភិបាលកម្ពុជា ថែមទាំងចោទថា សភាអឺរុប កំពុងតែអនុវត្ត ស្តង់ដារពីរ ប៉ុន្តែព្រមានថាកម្ពុជា មិនអាចទទួលយកការជ្រៀតជ្រែកចូលកិច្ចការផ្ទៃក្នុងនេះបានទេ ត្បិតកម្ពុជា ជារដ្ឋអធិបតេយ្យមួយ ដែលពុំស្ថិតនៅក្រោមអភិបាលកិច្ចរបស់ស្ថាប័នបរទេសឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ