កិច្ចសន្ទនាតាមទូរស័ព្ទ៖ លោក បាន គីមូន បង្ហាញ ក្តីព្រួយបារម្ភជុំវិញ បញ្ហាសិទ្ធិមនុស្ស និងស្ថានភាពនយោបាយនៅកម្ពុជា
អគ្គលេខាធិការអង្គការសហប្រជាជាតិលោក បាន គីមូន បានសម្តែងការព្រួយបារម្ភពីបញ្ហាសិទ្ធិមនុស្ស និងស្ថានភាពនយោបាយនៅកម្ពុជា។ ក្នុងនោះ រួមមានទាំងសិទ្ធសេរីភាពក្នុងការបញ្ចេញមតិផងដែរ។ នេះគឺជាខ្លឹមសារនៃកិច្ចសន្ទនាតាមខ្សែទូរស័ព្ទដ៏កម្ររវាងលោក បាន គីមូន អគ្គលេខាធិការអង្គការសហប្រជាជាតិ និងលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា កាលពីល្ងាចថ្ងៃអង្គារ ទី ៧ មិថុនា។អត្តបទដោយ @ប៉ុន សោភ័ណ៖
ចុះផ្សាយនៅថ្ងៃ៖
ស្តាប់ - ០២:០៦
កិច្ចសន្ទនាតាមខ្សែទូរស័ព្ទដ៏កម្រ រវាងលោកបាន គីមូន និងលោក ប្រាក់ សុខុន ត្រូវបានការិយាល័យអ្នកនាំពាក្យ របស់អង្កការសហប្រជាជាតិ បានដកស្រង់ខឹ្លមសារនៃកិច្ចសន្ទនានោះផ្សព្វផ្សាយនៅលើគេហទំព័ររបស់ខ្លួន។ នៅក្នុងនោះលោក បាន គីមូន បានបង្ហាញពីក្តីព្រួយបារម្ភរបស់លោកជុំវិញរបាយការណ៍នៃការចាប់ខ្លួនមន្រ្តីសង្គមស៊ីវិល មន្ត្រីគ.ជ.ប អ្នកសារព័ត៌មាន និងសមាជិករបស់គណបក្សប្រឆាំងនៅពេលថ្មីនេះ។ លោកបានគូសបញ្ជាក់ និងសង្ឃឹមថា រដ្ឋាភិបាលកម្ពុជាអាចនឹងពិនិត្យមើលឡើងវិញពីស្ថានភាពសិទ្ធិមនុស្សនៅកម្ពុជា ដែលរួមមានទាំងសិទ្ធិសេរីភាពក្នុងការបញ្ចេញមតិ ការប្រមូលផ្តុំ និងអភ័យឯកសិទ្ធិនៅក្នុងរដ្ឋសភាជាដើម។ លោក បាន គីមូន ក៏បានអំពាវនាវឲ្យមានការពិនិត្យមើលឡើងវិញពីវប្បធម៌សន្ទនារវាងគណបក្សប្រជាជនកម្ពុជា និងគណបក្សសង្គ្រោះជាតិផងដែរ។ នេះបើតាមសេចក្តីថ្លែងការណ៍របស់អង្គការសហប្រជាជាតិ ដែលបានចេញផ្សាយនៅថ្ងៃទី ៨ មិថុនាម្សិលមិញនេះ។
ទាក់ទងទៅនឹងការសន្ទនាតាមទូរស័ព្ទរវាងលោក បាន គីមូន និង លោក ប្រាក់ សុខុន ត្រូវបានអ្នកនាំពាក្យក្រសួងការបរទេសកម្ពុជាបញ្ជាក់ប្រាប់វិទ្យុបារាំងថា នឹងអាចចេញផ្សាយនៅថ្ងៃទី១០ ខែមិថុនានេះ។
ទន្ទឹមនឹងនេះ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានចាត់ទុកថា ការលើកឡើង របស់ លោក បាន គីមូន គឺជាការសម្តែងមតិផ្ទាល់ខ្លួនរបស់លោកតែប៉ុណ្ណោះ ដែលជាការវាយតម្លៃ ដោយមិនបានពិនិត្យមើលពីតថភាពសង្គមកម្ពុជា នាពេលបច្ចុប្បន្ន។ ដោយឡែក ចំពោះវប្បធម៌សន្ទនាវិញ លោកមានការស្វាគមន៍ ដោយលោកសង្ឃឹមថាគណបក្សទាំងពីរអាចនឹងជួបគ្នានាពេលខាងមុខ។ លោក សុខ ឥសាន ក៏បានធ្វើការសំណូមពរទៅកាន់លោក អគ្គលេខាធិការអង្គការសហប្រជាជាតិ ជួយណែនាំគណបក្សប្រឆាំងផង សូមកុំឱ្យប្រព្រឹត្តិអី្វដែលល្មើសច្បាប់ ដូច្នេះបញ្ហានឹងអាចបញ្ចប់។
សូមបញ្ជាក់ថា ស្ថានការនយោបាយនៅក្នុងប្រទេសកម្ពុជាមួយរយៈពេលចុងក្រោយនេះ បានឡើងកម្តៅឥតឈប់ឈរ។ ឡើងកម្តៅ ព្រោះមានការចាប់ឃុំខ្លួន សកម្មជនគណបក្សប្រឆាំង តំណាងរាស្រ្ត មន្ត្រីអង្កការសង្គមស៊ីវិល មន្រ្តីគ.ជ ប ហើយ មេបក្សប្រឆាំង នៅកម្ពុជាកំពុងប្រឈម នឹងការចាប់ខ្លួនផងដែរ។ ក៏ប៉ុន្តែរដ្ឋាភិបាល បានបរិយាយលើរឿងរ៉ាវទាំងអស់នោះថា នេះជាការអនុវត្តច្បាប់នៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ